Timiti, Iotebwa, te Ataei

Te burabeti are e rineaki bwa e na manga kaoka ana Ekaretia Iesu Kristo ae koaua nakon te aonaba. Iotebwa Timiti e bungiaki n te aba ae Vermont n te United States of America ao e maiu man 1805 nakon 1844.

N te 1820, te Atua te Tama ao Iesu Kristo a kaoti nakon Iotebwa, ao e reiakinna bwa akea ekaretia i aon te aonaba ae koaua (IT—R 1:1–20). I mwina e kawaraki iroun te anera ae Moronaai, are e kaota te tabo are e karabaki iai taian bwaatua aika koora ake kanoana bon rongorongoia aomata n taai ake ngkoa i aon te kontenanti ae Amerika (IT—R 1:29–54).

Iotebwa Timiti e rairi bwaatua aika koora ao n te 1830 e boretiia bwa Ana Boki Moomon (IT—R 1:66–67, 75). N te 1829, e karekea te kariaia n te nakoanibonga mai iroun Ioane te Tia Bwabetito ao mai iroun Betero, Iakobo, ao Ioane (R&B 13; 27:12; 128:20; IT—R 1:68–70).

N te kairiri mai iroun te Atua, Iotebwa ao tabeman riki a katea Ana Ekaretia Iesu Kristo ae manga kaokaki n Eberi 6, 1830, (R&B 20:1–4). I an ana kairiri Iotebwa, te Ekaretia e rikirake i Canada, England, ao mwakoron te United States are mai maeao, moara riki i Ohio, Missouri, ao Illinois. A ririmwiaki n te bwainikirinaki ae korakora Iotebwa ao Aomata aika Itiaki n taabo nako are a maeka iai. N Tuun 27, 1844, Iorebwa ao tarina ae Hyrum a tiringaki ibukin aia onimaki i Carthage, Illinois, n te United States i America.