Reirei ao Berita aika Tabu

Ikotan taian kaotioti mai iroun te Atua ni boong aika kaitira ao taeka man ana kairiri te tamnei. Te Uea e anga aikai nakon Iotebwa Timiti ao naake a onea mwiina aika mwaiti ibukin katean ao tautaekanakin uean te Atua i aon te aonaba ni boong aika kaitira. Reirei ao Berita aika Tabu bon teuana mai buakon booki aika tabu ake a kabonganaki n Ana Ekaretia Iesu Kristo ibukiia Aika Itiaki ni Boong aika Kaitira, ni ikotaki ma te Baibara, Ana Boki Moomon, ao te Bwaeao ae Bati Bona. E ngae n anne, Reirei ao Berita aika Tabu bon akea aekakina, ibukina bwa bon tiaki rairan rongorongon ngkoa; te Uea e anga kaotioti aikai nakoia Ana burabeti ake E rineia ni boong aikai bwa e aonga ni kaokaki ueana. I nanon kaotioti ko kona n ongo bwanaan te Uea ae Iesu Kristo ae akoi ma e matoa (R&B 18:35–36).

N Rongorongon Iotebwa Timiti e taekinaki bwa Reirei ao Berita aika Tabu bon aan te Ekaretia ni boong aika kaitira ao te kabwaia nakon te aonaba (R&B 7 kabwarabwarana). Kaotioti ake i nanona a moana wakin te mwakuri ni katauraoa te kawai ibukin Kauaokin te Uea, ni kakoroi nanon taeka ni kabane ake a taekinaki irouia burabeti man moan rikin te aonaba.