Man te waaki aei aomata a kona n riki n rabwata i aon te aonaba aei. Ngke Atam ao Ewa a kana te uanikai are e tabuaki, a riki n rabwata ae mamate, are nanona, a tautaekanaki n te bure ao te mate. Atam e riki bwa te “moan rabwata” i aon te aonaba (Mote 3:7). Kaotioti ni boong aika kaitira a kamatata bwa te Bwaka bon te kakabwaia ao bwa Atam ao Ewa a riai ni karineaki bwa moan karo irouia aomata ni kabane.
Te Bwaka bon te mwaneka ae kainnanoaki n rikiraken te aomata. Ibukina bwa te Atua e ataia bwa e na riki te Bwaka, E a kaman babaire n te maiu i mwaain te maiu aei ibukin te Tia Kamaiu. Iesu Kristo e roko i nukan te tai bwa e na karaoa te mwakuri ni kamaiu ibukin Bwakan Atam ao ibukin naba ana bure teuana ma teuana te aomata ti ngkana e raira nanona te aomata.