Ruka
Te tia korea ana Euangkerio Ruka ao te boki ae Mwakuri n te Nu Tetemanti ao toan Bauro ni mitinare. E bungiaki irouia ana karo aika I-Erene ao taan katoki aoraki (Koro. 4:14). Ruka bon te aomata ae korakora ana reirei. E kaotia bwa ngaia bon toan te Abotoro ae Bauro ngke e ira Bauro i Teroa (Mwak. 16:10–11). Ruka bon raon naba Bauro i Biribi n ana kabanea ni mwananga Bauro nako Ierutarem (Mwak. 20:6), ao a uaia ni ikotaki ni karokoa ae a roko i Rom. Ruka bon raon naba Bauro ngke e kabureaki te kauatai i Rom (2Tim. 4:11). Ni kaineti ma te katei e mate ibukin ana koaua.
Ana Euangkerio Ruka
Te rongorongo ae koreia Ruka ibukin Iesu Kristo ao Ana mwakuri ni ibuobuoki ngke e maiu n rabwata. Te boki ae Aia Mwakuri Taan Tuatua bon reitan ana Euangkerio Ruka. Ruka e katuka rongorongon Ana mwakuri ni ibuobuoki Iesu ae nako raoi koreana, ni kaotia bwa Iesu bon te Tia Kamaiuia Iutaia ao Tientaire. E bati ae koreia ibukin Ana reirei ao Ana mwakuri Iesu. N Ruka ti ngaia ae reke iai rongorongon kawaran Takaria ao Maria iroun Kabiriera (Ruka 1); kawarakin Iesu te teei irouia taan kawakin tiibu (Ruka 2:8–18); Iesu n te tembora ngke tebwi ma uoua ana ririki (Ruka 2:41–52); a rineaki itingaun ao a kanakoaki (Ruka 10:1–24); E tinako maonon Iesu te raraa (Ruka 22:44); Ana maroro Iesu ma te tia ira i aon te kaibangaki (Ruka 23:39–43); Iesu E kana te ika ao ana karewe te maniberu i mwin Mangautina (Ruka 24:42–43).
Ibukin karinanin bwaai aika riki i nanon maiun te Tia Kamaiu aika kabwarabwaraki n ana Euangkerio Ruka, tara Nakoraoin taian Euangkerio n te abentekiti.