Onikakin te Rabwata
Aroia aomata ake a bitaki tarakiia ao anuaia n te tai ae uarereke—are, a tabekaki rake nakon rinanin te aro n tamnei ae rietata riki—bwa aonga ni kona moan kaotiia ao mimitongiia aomata mai karawa.
Onikakin Rabwatan Kristo
Betero, Iakobo, ao Ioane a noora te Uea ni kamimitongaki ao n onikaki i mataia. Te Tia Kamaiu e tia ni berita rimoa bwa Betero e na karekei kiingin te abanuea ae karawa (Mat. 16:13–19; 17:1–9; Mar. 9:2–10; Ruka 9:28–36; 2Bet. 1:16–18). N te tai are riki iai te bwai ae kakawaki aio, te Tia Kamaiu, Mote, ao Eriati (Eria) a anga kiing n te nakoanibonga are a beritanaki nakoia Betero, Iakobo, ao Ioane. Ma kiing n te nakoanibonga aikai, e a reke irouia Abotoro te mwaaka n reitanako mwakurin te abanuea i mwin Waeraken Iesu nako karawa.
Iotebwa Timiti e reirei bwa i aon te Maunga ni Bitaki, Betero, Iakobo, ao Ioane a onikaki naba. A noora te kaotioti ibukin te aonaba n aron taraakina n taai aika na roko n arona ni mimitong (R&B 63:20–21). A noora Mote ao Eria, uoman aomata aika tia n onikaki, ao a ongo bwanan te Tama. E taku te Tama, “Aio Natiu ae Tangiraki, are I kakatonga irouna; ongo irouna” (Mat. 17:5).