Moomon, Te Nibwaite ae te Burabeti
Te Nibwaite ae te burabeti, te tienera n te tanga ni buaka, te tia kawakin rongorongo n Ana Boki Moomon. Moomon e maiu n uakaan ma 311–385 N.K. (Moom. 1:2, 6; 6:5–6; 8:2–3). Bon te mataniwi n te tanga ni buaka n angin maiuna, ni moa ma ngke tebwi ma nimaiua ana ririki (Moom. 2:1–2; 3:8–12; 5:1; 8:2–3). Amaron e reireina Moomon bwa e na katauraoia bwa e na tararuai rongorongo ao ni kawakinan rongorongo (Moom. 1:2–5; 2:17–18). I mwin tauan mwiin rongorongon oin maiuna, Moomon e kakimototoi kanoan ana bwaatua Nibwaai ake a bubura nako aon ana bwaatua Moomon. Rimwi riki e anga rongorongo aika tabu nakon natina ae Moronaai. Bwaatua aikai bon mwakoron rongorongo are e raira Ana Boki Moomon mai iai Iotebwa Timiti.
Ana Taeka Moomon
Te boki ae uarereki n Ana Boki Moomon. I marenan ana kabanea n tae Amareki n ana boki Ominai ao moan taeka n ana boki Motiaea, Moomon, te eteta ibukin rongorongo ni kabane, e karina ae uarereke aio. (Tara “Te Kabwarabwara ae Kimototo ibukin Ana Boki Moomon” i moa n Ana Boki Moomon.)
Ana boki Moomon
Te boki ae okoro i nanon bokin koroboki aika tabu ae ataaki bwa Ana Boki Moomon. Mwakoro 1–2 e taekina Amaron, aia burabeti Nibwaite, ngke e tuanga Moomon bwa ningai ao n te tabo ra are e na karekei iai bwaatua. Buaka aika korakora a moanaki naba, ao Nibwaite ake Teniman a anaaki ibukin buakakaia aomata. Mwakoro 3–4 e taekina Moomon ngke e takaruaea te rairannano nakoia te botanaomata, ma a aki namakinna, ao e teimatoa ni korakora riki te buakaka nakon ake mai mwaina i Iteraera. Mwakoro 5–6 bon taekan kabanea ni bubuaka i marenaia Nibwaita ao Reimwanaite. Moomon e tiringaki ma angaiia te botanaomata aika Nibwaite. Ni mwakoro 7, i mwain matena, Moomon e weteia aomata—n te tai arei ao n taai aika a na roko—bwa a na raira nanoia. Mwakoro 8–9 e koreaki iai bwa n tokina ao ti natin Moomon te mwaane, ae Moronaai, ae tiku. Ngaia ae korei rongorongon kabanean bwaai aika riki n te mate ao te tiriaomata, ni ikotaki ma buan te botanaomata aika Nibwaite, ao e korea te rongorongo nakoia rooro n taai aika a na roko ao taan wareware n te rongorongo aei.