Botaki n Toa

Ibukiia Aomata aika Itiaki ni Boong aika Kaitira, botaki n toa e kaineti nakon te otenanti ibukin kanakin te kariki ao nimakin te ran ni kauringa Ana karea ni kamaiu Kristo. Te kariki are e tabeutaki e tei ibukin irikona are e uruaki; te ran e tei ibukin te raraa are E kawawaea ni karaoa te mwakuri ni kamaiu ibukin ara bure (1Korin. 11:23–25; R&B 27:2). Ngkana a anaa te toa kaain te Ekaretia aika tau, a berita bwa a na katoka i aoia aran Kristo, n ururingnga n tai nako, ao ni kawakin Ana tua nako. Rinanon te otenanti aei, kaain te Ekaretia a manga kaboui aia berita aika tabu n te bwabetito.

N te Kabanea n Amwarake, Iesu e kabwarabwara te otenanti ae te toa ngke E kanna ma Abotoro ake Tengaun ma Uoman (Mat. 26:17–28; Ruka 22:1–20).