Baibara

Ikotakin aia koroboki Ebera ao Kiritian are kanoan bon kaotioti mai iroun te Atua. Te taeka ae baibara nanona bon “taian boki.” Te Baibara bon aia mwakuri burabeti aika mwaiti ao taan koroboki aika kairaki iroun te Tamnei aika mwakuri i aan ana kairiiri te Tamnei ae Tabu (2Bet. 1:21).

Iai uoua mwakoro n aia Baibara Kiritian, a rangi n ataki bwa te O ao te Nu Tetemanti. Te O Tetemanti kanoana bon bookin koroboki aika tabu ake a kabonganaki i buakoia Iutaia i Baretain n ana tai ni mwakuri ni ibuobuoki te Uea ngke e maiu n rabwata. Te Nu Tetemanti kanoana bon koroboki man aia tai Abotoro ao e taraki bwa bon titebo tabuia ao te kariaia ma aia boki aika tabu Iutaia. Bokin te O Tetemanti a bon anaaki man koroboki aika tabangaki i nanon tienture aika mwaiti ao a kuri bane ni koreaki n te taetae n Ebera, ma bokin te Nu Tetemanti bon te mwakuri i nanon te roro ae ti teuana ao angiina a koreaki n te taetae n Erene.

N te O Tetemanti te taeka ae tetemanti e tei ibukin te taeka n Ebera ae nanona “berita ae tabu.” Te Berita ae Tabu Ngkoa bon te tua are e anganaki Mote ngke Iteraera e aki butimwaea bwaninin te euangkerio are iai irouia ana aomata te Atua man moanaki te maiu ae mamate. Te Berita ae Tabu ae Boou bon te euangkerio n arona are e reiakinaki iroun Iesu Kristo.

N te Baibara n Ebera (te O Tetemanti) booki a tibwaaki nakon teniua rinanna: te Tua, Burabeti, ao taian Koroboki. Te Baibara are e kabonganaki irouia Kiritian n te Aonaba e katanakoi booki ni kaineti ma boto ni iango iai, n aron rongorongo, kario, ao taetae ni burabeti.

Bokin te Nu Tetemanti a bon baireaki n aron aei: Euangkerio ake aua ao Mwakuri; ana reta Bauro; aia reta ae tabangaki Iakobo, Betero, Ioane, ao Iuta; ao ana Kaotioti Ioane.

Ana Ekaretia Iesu Kristo ibukiia Aika Itiaki ni Boong aika Kaitira e kamoamoaa ao e karinea te Baibara ao e kamatoa naba bwa te Uea e reitinako n angaanga riki kaotioti rinanoia Ana burabeti ni boong aika kaitira ake a boutoka ao ni kaota koauan rongorongo n te Baibara ibukin ana mwakuri te Atua ma aomata.