Ieremia
Te burabeti n te O Tetemanti are bungiaki nakon te utu ni ibonga ao e taetae ni burabeti i Iuta man 626 ni karokoa 586 I.K. E maiu ni uakaan ma aia tai burabeti aika kakannato ake tabeman: Riaai, Etekiera, Otea, ao Taniera.
Ieremia e katabuaki bwa e na riki bwa te burabeti n te maiu i mwaain te maiu aei (Iere. 1:4–5). I nanon ana tai ni burabeti ae kania abwi te ririki e reirei ni kaitara taromaurian bouananti ao maiuakinan te bure i buakoia te botanaomata ae Iutaia (Iere. 3:1–5; 7:8–10). E aki toki ni aitara ma kakaitara ao kamatauninga (Iere. 20:2; 36:18–19; 38:4). I mwin bwakan Ierutarem, Iutaia ake a birinako nako Aikubita a kaira Ieremia ma ngaiia (Iere. 43:5–6), ike, ni kaineti ma katein te aba, a karebanaia n te atibu n ua matena.
Ana boki Ieremia
Mwakoro 1–6 kanoana bon taetae ni burabeti are a kaotaki n ana tai n tautaeka Iotia. Mwakoro 7–20 bon taetae ni burabeti n ana tai Ieoiakim. Mwakoro 21–38 e tabe ma ana tautaeka Tetekia. Mwakoro 39–44 kanoana bon taetae ni burabeti ao a kabwarabwarai bwaai aika a riki n tai ake ngkoa i mwin bwakan Ierutarem. Mwakoro 45 kanoana bon te berita nakon Baruka, ana tia koroboki, bwa maiun Baruka e na kawakinaki. Te kabanea, mwakoro 46–51 bon taetae ni burebeti ni kaitaraia aaba ake ianena. Mwakoro 52 bon rongorongo ni kainin. Tabeua ana taetae ni burabeti Ieremia a koreaki i nanon bwataua aika burati ake iroun Raban ao a anaki iroun Nibwaai (1Nib. 5:10–13). E taekinaki naba Ieremia uatai riki n Ana Boki Moomon (1Nib. 7:14; Erem. 8:20).
E koreaki naba n ana boki Ieremia butimwaian ae maiu te aomata i mwain te maiu aio ao katabuan Ieremia i mwain bungiakina (Iere. 1:4–5); te taetae ni burabeti ibukin okin Iteraera man aroia ni maenako, ni ikotia kakatabeman man te kawa teuana ao kaka uoman man utu nako nakon Tion, te aba ae tamaroa ike a kona ni maeka iai Iteraera ao Iuta n te kamanoaki ao te rau (Iere. 3:12–19); ao te taetae ni burabeti ibukin ikotakin Iteraera iroun te Uea ni kamwanangaia taan “akawa” ao taan “kaeman” aika bati bwa a na kakaeia (Iere. 16:14–21). Te bwai ae na riki aei ni boong aika kaitira e na korakora riki buburana nakon kairakin Iteraera iroun Mote mai Aikubita (Iere. 16:13–15; 23:8).