Boutoka n te Kamatebwai
Betero


Betero

N te Nu Tetemanti, Betero e bon ataki mai moana bwa Timeon ke Timon (2Bet. 1:1), te tia akawa mai Betatiata ae maeka i Kaberenaum ma buuna. Iesu e katoka aorakin tinan buun Betero (Mar. 1:29–31). Betero e weteaki ma tarina ae Anterea bwa a na riki bwa ana reirei Iesu Kristo (Mat. 4:18–22; Mar. 1:16–18; Ruka 5:1–11). Arana n te taetae n Aramia, Keba, are nanona “te tia mamata” ke “te atibu” e bon anganaki iroun te Uea (Ioane 1:40–42; ARIT, Ioane 1:42 [Abentekiti]). Ngkai te Nu Tetemanti e taekini tabeua mamaran Betero n te rabwata, e kabwarabwara bwa e tokanikai i aoia ao e riki ni korakora n ana onimaki iroun Iesu Kristo.

E taekinna Betero bwa Iesu bon te Kristo ao Natin te Atua (Ioane 6:68–69), ao te Uea e rineia bwa e na taui kiingin te abanuea i aon te aonaba (Mat. 16:13–19). I aon te Maunga ni Onikaki, Betero e nora te Tia Kamaiu are onikaki, ni ikotaki ma Mote ao Eriati (Eria) (Mat. 17:1–9).

Betero bon te mataniwi n Abotoro n ana bong. I mwin maten, Mangautin, ao Waeraken te Tia Kamaiu, e wetea te Ekaretia ni ikotia ao ni bairea wetean temanna te Abotoro n onea mwiin Iuta Itekariota (Mwak. 1:15–26). Betero ao Ioane a kamaiua te mwaane ae mwauku ma ngke bungiaki (Mwak. 3:1–16) ao kainaomatakia n te kakai man te umwa ni kaikain (Mwak. 5:11–29; 12:1–19). Bon rinanon ana mwakuri ni ibuobuoki Betero are e moan kaukaki iai te euangkerio nakoia Tientaire (Mwak. 10–11). Ni boong aika kaitira, Betero, ma Iakobo ao Ioane, a roko mai karawa ao anga te Nakoanibonga ae te Merekitereka ao kiingina nako aon Iotebwa Timiti ao Oliver Cowdery (R&B 27:12–13; 128:20).

Ana moan reta Betero

Te moan reta e koreaki mai “Bwaburon” (te katautau bwa Rom) ao e kanakoaki nakoia Aomata aika Itiaki n te tabo are aranaki ngkai bwa Atia n te tai ae aki maan i mwin are moana bwainikirinakia Kiritian Nero.

Mwakoro 1 e taekina kaman katabuan nakoan Kristo bwa te Tia Kabooira. Mwakoro 2–3 e kabwarabwara bwa Kristo bon te oi n atibun te maninganinga, ngaia are Aomata aika Itiaki a taua te nakoanibonga ni uea, ao bwa Kristo e kabwarabwara nakoia tamnei n te uma ni kaikain. Mwakoro 4–5 a kabwarabwara bwa tera bukina ngkai te euangkerio e tataekinaki nakoia maate ao tera bukina ngkai unimwaane a riai ni kamwarakea te nanai.

Ana kauoua n reta Betero

Mwakoro 1 e kaungaia Aomata aika Itiaki bwa a na kamatoai weteaia ao rineakiia. Mwakoro 2 e kauringiia ibukiia taan reirei ni kewe. Mwakoro 3 e taekina boong aika kaitira ao Kauaokin Kristo.