Ana Kaotioti Ioane

Te kabanea ni boki n te Nu Tetemanti, are kanoana bon kaotioti ake e anganaki Ioane te Abotoro. E kariaiakaki bwa e na noora rongorongon te aonaba, moara riki boong aika kaitira (Kaoti. 1:1–2; 1Nib. 14:18–27; R&B 77). Ana Kaotioti Ioane e ataaki naba bwa te Abokaribwa.

Ioane e karekea te kaotioti aei n ana bong te Uea i aon te atimwakoro ae Batemoti (Kaoti. 1:9–10), e mena i nanoaan mataniwin te aba ae Atia, ae aki raroa mai Ebeto. E aki ataaki raoi bongin te kaotioti.

Bwaai aika kakawaki ibukin te matata n te boki a kaairaki n 1Nib. 14:18–27 ao Reirei ao Berita aika Tabu 77 (Ita 4:15–16).

Mwakoro 1–3 bon te kabwarabwara nakon te boki ao reeta nakoia ekaretia aika itiua i Atia. Ioane e koroi reeta ni buokia Aomata aika Itiaki ni katoki kaangaanga aika onoti. Mwakoro 4–5 e koreaki iai mi ni burabeti are e karekei Ioane are a kaoti kakannaton ao raoiroin mwaakan te Atua ao Kristo. Ni mwakoro 6–9, 11, Ioane e koroia bwa e noori booki aika kabaeaki ni kabaebae aika itiua, kabaebae n tatabeua nako a tei ibukin te teuana ni nga n ririki n rongorongon bwain aonaba. Mwakoro aikai a tabe riki ma bwaai aika riki ake kanoan te kaitiua ni kabaebae (tara Kaoti. 8–9; 11:1–15). Mwakoro 10 e kabwarabwara te boki are e kanna Ioane. Te boki e tei ibukin ana mwakuri ni ibuobuoki n taai aika a na roko are e na karaoia. Mwakoro 12 e koreaki iai te mi ni burabeti ibukin te buakaka are moanaki i karawa ngke kakaitara Tatan ao e teweaki nako. Te buaka are moanaki ikekei e reitinako ni buakanaki i aon te aba. Ni mwakoro 13, 17–19, Ioane e kabwarabwarai uean aonaba aika buakaka ake a tauaki mwiia iroun Tatan ao e korea tokiia, ni ikotaki ma kabanean kamaunakin te buakaka. Mwakoro 14–16 e kabwarabwara aron raoiroia Aomata aika Itiaki i buakon te buakaka i mwain raoi Kauaokin Kristo. Mwakoro 20–22 e kabwarabwara te Tenga n Ririki, te kaawa ae tikiraoi ae Ierutarem ae Boou, ao kabanean bwaai aika riki n rongorongon te aonaba.