O Tetemanti

Aia koroboki burabeti n taai ake ngkoa ake a mwakuri i an ana kairiiri te Tamnei ae Tabu ao ake a kakoaua i nanon tienture aika bati ibukin Kristo ao Ana mwakuri ni ibuobuoki n tai aika na roko. Kanoana naba bon tauan mwiin rongorongon ngkoa Aberaam ao ana kariki, ni moa maiiroun Aberaam, ao te berita ae tabu, ke taeka ni kakoaua, are e karaoia te Uea ma Aberaam ao kanoana.

Booki ake nimaua mai moa n te O Tetemanti a bon koreaki iroun Mote. Bon aikai Karikani Bwai, Te Otinako, Nakoaia Ibonga, Warekaia Iteraera, ao Te Tua-Kaua. Karikani Bwai e taekina moan rikin te aonaba, te botanaomata, taian taetae, reeti, ao moanakin te bata are Iteraera.

Booki i aon rongorongon ngkoa e taekini bwaai aika riki iroun Iteraera. Booki aikai bon Iotua, Taan Motiki Taeka, Ruta, 1 ao 2 Tamuera, 1 ao 2 Uea, 1 ao 2 Rongorongo, Etira, Neemia, ao Etita.

Boki ni kario a tauaki iai mwiin tabeua rabakauia ao aia koroboki burabeti. Bon aikai Iobi, Taian Areru, Taeka n Rabakau, Te Minita, Ana Anene Toromon, ao Bwaebwaeti.

Burabeti a kauringa Iteraera ibukin ana bure ao kakoaua ibukin kakabwaia aika reke man te ongeaba. A taetae ni burabeti ibukin rokon Kristo, are e na karaoa te mwakuri ni kamaiu ibukin aia bure naake a raira nanoia, a karekei otenanti, ao a maiuakina te euangkerio. Aikai aia boki burabeti Itaia, Ieremia, Etekiera, Taniera, Otea, Ioera, Amota, Obwaria, Iona, Mika, Naum, Abakuka, Tebania, Akai, Tekaria, ao Maraki.

Angiin bokin te O Tetemanti a koreaki n te taetae n Ebera. Tabeua koroboki kanoaia bon te taetae n Aramia, te taetae ae irekereke ma ngaia.