1 ʻOku folofola pehē ʻe he ʻEikí ko homou ʻOtuá, ʻa ia ko Sīsū Kalaisi, ko e Ko Au Lahí, ko e ʻĀlifá mo e ʻŌmeká, ko e kamataʻangá mo e ngataʻangá, ko ia ia naʻá ne mamata hifo ki he fuʻu ʻatā ʻo e taʻengatá pea mo e fuʻu tokolahi ʻo e kau selafimi ʻo e langí, ʻi he teʻeki ai ke ngaohi ʻa e māmaní;

2 ʻA ia ʻokú ne ʻiloʻi ʻa e ngaahi meʻa kotoa pē, he ʻoku hā mai ʻa e meʻa kotoa pē ki hoku matá;

3 Ko au ia naʻe leá, pea naʻe ngaohi ʻa e māmaní, pea naʻe tupu ʻa e ngaahi meʻa kotoa pē ʻiate au.

4 Ko au ia ʻa ia naʻe ʻave ʻa e Saione ʻo ʻĪnoké ki hoku fatafata ʻoʻokú; pea ko e moʻoni, ʻoku ou pehē, ʻio mo kinautolu kotoa pē kuo nau tui ki hoku hingoá, he ko Kalaisi au, pea ʻi hoku hingoa ʻoʻokú, pea ʻi he mālohi ʻo e toto kuó u lilingí, kuó u taukapoʻi ʻa kinautolu ʻi he ʻao ʻo e Tamaí.

5 Kae vakai, ko e toenga ʻo e kau fai angahalá kuó u tuku ʻi he ngaahi sēini ʻo e fakapoʻulí kae ʻoua ke hokosia ʻa e fakamaau ʻo e fuʻu ʻaho lahi, ʻa ia ʻe hoko mai ʻi he ngataʻanga ʻo e māmaní;

6 Pea ʻe pehē pē ʻeku pule ke taʻofi ʻa e kau fai angahala ʻa ia ʻe ʻikai te nau fanongo ki hoku leʻó kae fakafefeka honau lotó, pea ko e malaʻia, malaʻia, malaʻia ʻa honau ikuʻangá.

7 Kae vakai, ko e moʻoni, ko e moʻoni, ʻoku ou pehē kiate kimoutolu ʻoku mamata hoku matá kiate kimoutolu. ʻOku ou ʻi homou lotolotongá pea ʻoku ʻikai te mou lava ʻo mamata kiate au;

8 Ka ʻe vave mai ʻa e ʻaho te mou mamata ai kiate au, ʻo ʻiloʻi ʻoku ou ʻi ai; he ʻe toe siʻi pē pea ʻe mavaeua ʻa e veili ʻo e fakapoʻulí, pea ko ia ia kuo ʻikai ke fakamaʻá ʻe ʻikai te ne kātakiʻi ʻa e ʻahó.

9 Ko ia, nonoʻo homou kongalotó pea mou teuteu. Vakai, ʻoku ʻomoutolu ʻa e puleʻangá, pea ʻe ʻikai ke ikuna ʻe he filí.

10 Ko e moʻoni, ʻoku ou pehē kiate kimoutolu, ʻoku mou maʻa, kae ʻikai ko hono kotoa; pea ʻoku ʻikai mo ha niʻihi kehe ʻoku ou fiemālie ai;

11 He kuo fakalielia ʻa e kakano kotoa pē ʻi hoku ʻaó; pea ʻoku mafola ʻa e ngaahi mālohi ʻo e fakapoʻulí ʻi he māmaní, ʻi he lotolotonga ʻo e fānau ʻa e tangatá, ʻi he ʻao ʻo hono kotoa ʻo e fuʻu tokolahi taʻefaʻalaua ʻo e langí—

12 ʻA ia ʻoku fakatupu ʻa e pule ʻa e lōngonoá, pea ʻoku mamahi hono kotoa ʻo e taʻengatá, pea ʻoku tatali ʻa e kau ʻāngeló ki he fekau mamafa ke tuʻusi hifo ʻa e māmaní, ke tānaki ʻa e ngaahi teá koeʻuhi ke tutu ia; pea vakai, ʻoku kau fakataha ʻa e filí.

13 Pea ko ʻeni, ʻoku ou fakahā kiate kimoutolu ha meʻa lilo, ha meʻa ʻoku fai ʻi he ngaahi loki lilo, koeʻuhi ke fakahoko ai homou fakaʻauhá ʻo ka hokosia hono taimí, pea naʻe ʻikai te mou ʻiloʻi ia;

14 Ka ko ʻeni ʻoku ou tala ia kiate kimoutolu, pea ʻoku mou monūʻia, ʻo ʻikai koeʻuhí ko hoʻomou angahalá, pe ko homou loto-taʻetuí; he ko e moʻoni ʻoku ʻi ai hamou niʻihi ʻoku halaia ʻi hoku ʻaó, ka te u ʻaloʻofa ki homou vaivaí.

15 Ko ia, ke mou mālohi ʻo fai atu mei heni; ʻoua ʻe manavahē, he ʻoku ʻomoutolu ʻa e puleʻangá.

16 Pea ʻoku ou fai kiate kimoutolu ʻa e fekau, koeʻuhi ko homou fakamoʻuí, he kuó u fanongo ki hoʻomou ngaahi lotú, pea kuo lāunga ʻa e kau masivá ʻi hoku ʻaó, pea kuó u fakatupu ʻa e kau koloaʻiá, pea ʻoku ʻaʻaku ʻa e kakano kotoa pē, pea ʻoku ʻikai te u filifilimānako.

17 Pea kuó u ngaohi ʻa e māmaní ke koloaʻia, pea vakai ko hoku tuʻunga vaʻé ia, ko ia, te u toe tuʻu ʻi hono fungá.

18 Pea ʻoku ou ʻoatu peá u loto ke foaki kiate kimoutolu ʻa e ngaahi koloa lahi ange, ʻio ʻa e fonua ʻo e talaʻofá, ʻa e fonua ʻoku mahutafea ʻi he huʻahuhu mo e hone, ʻa ia ʻe ʻikai ke ʻi ai ha fakamalaʻia ʻo ka haʻu ʻa e ʻEikí;

19 Pea te u foaki ia kiate kimoutolu ke hoko ko e fonua ʻo homou tofiʻá, ʻo kapau te mou kumi ki ai ʻaki homou lotó kotoa.

20 Pea ʻe hoko ʻeni ko ʻeku fuakava mo kimoutolu, te mou maʻu ia ke hoko ko e fonua ʻo homou tofiʻá, pea mo e tofiʻa ʻo hoʻomou fānaú ʻo taʻengata, lolotonga ʻa e kei tuʻu ʻa e māmaní, pea te mou toe maʻu ia ʻi he taʻengatá, pea ʻe ʻikai toe mole atu.

21 Ka, ko e moʻoni ʻoku ou pehē kite kimoutolu ʻe hokosia ʻa e taimi ʻe ʻikai ke ʻi ai hamou tuʻi pe pule, he te u hoko au ko homou tuʻí pea tokangaʻi ʻa kimoutolu.

22 Ko ia, fanongo ki hoku leʻó pea muimui ʻiate au, pea te mou hoko ko ha kakai tauʻatāina, pea ʻe ʻikai ke ʻi ai haʻamou ngaahi lao ka ko ʻeku ngaahi fonó pē ʻo kau ka haʻu, he ko au ko homou tokotaha foaki fonó, pea ko e hā ha meʻa te ne lava ʻo taʻofi ʻa hoku nimá?

23 Ka, ko e moʻoni ʻoku ou pehē kiate kimoutolu, mou feakoʻiʻaki ʻiate kimoutolu, ʻo fakatatau ki he lakanga kuó u fakanofo ʻa kimoutolu ki aí;

24 Pea tuku ke ʻofa ʻa e tangata kotoa pē ki hono tokouá ʻo hangē pē ko iá, pea ngāue ʻi he angamaʻa mo e māʻoniʻoni ʻi hoku ʻaó.

25 Pea ko e tahá ʻoku ou pehē kiate kimoutolu, tuku ke ʻofa ʻa e tangata kotoa pē ki hono tokouá ʻo hangē pē ko iá.

26 He ko hai ha tangata ʻiate kimoutolu ʻoku ʻi ai hano ngaahi foha ʻe toko hongofulu mā ua, pea ʻoku ʻikai te ne filifilimānako kiate kinautolu, pea ʻoku nau tauhi kiate ia ʻi he loto-talangofua, peá ne pehē ki he tokotaha: Ke ke kofu koe ʻaki ʻa e ngaahi pulupulu ʻo nofo hifo ʻi heni; pea ki he tokotaha: Ke ke kofu koe ʻaki ʻa e ngaahi kofu mahaehae ʻo nofo hifo ʻi hena–peá ne mamata ki hono ngaahi fohá ʻo ne pehē, ʻoku ou angatonu?

27 Vakai, kuó u foaki ʻeni kiate kimoutolu ko ha lea fakatātā, pea ʻoku hangē pē ko aú. ʻOku ou pehē kiate kimoutolu, ke mou taha pē; pea kapau ʻoku ʻikai te mou taha, ʻoku ʻikai ʻaʻaku ʻa kimoutolu.

28 Pea ko e tahá, ʻoku ou pehē kiate kimoutolu ʻoku kumi ʻa e fili ʻi he ngaahi potu liló ki hoʻomou moʻuí.

29 ʻOku mou fanongo ki he ngaahi tau ʻi he ngaahi fonua mamaʻó, pea ʻoku mou pehē ʻe vavé ni ha hoko ha ngaahi fuʻu tau lalahi ʻi he ngaahi fonua mamaʻó, ka ʻoku ʻikai te mou ʻiloʻi ʻa e loto ʻo e kakai ʻi homou fonua ʻomoutolú.

30 ʻOku ou tala ʻa e ngaahi meʻá ni kiate kimoutolu koeʻuhi ko hoʻomou ngaahi lotú; ko ia, ke mou mataʻikoloa ʻaki ʻa e potó ʻi homou lotó, telia naʻa fakahā ʻe he fai angahala ʻa e tangatá ʻa e ngaahi meʻá ni kiate kimoutolu ʻaki ʻenau fai angahalá, ʻi ha founga ʻe lea ki homou telingá ʻi ha leʻo lahi ange ʻi he leʻo te ne lulululuʻi ʻa e māmaní; ka ʻo kapau te mou mateuteu, ʻe ʻikai te mou manavahē.

31 Pea koeʻuhi ke mou hao mei he mālohi ʻo e filí, pea tānaki fakataha ʻa kimoutolu kiate au ko ha kakai māʻoniʻoni, taʻe-ʻi ai ha ʻila pea taʻehalaia—

32 Ko ia, ko hono ʻuhinga ʻeni naʻá ku fai ai ʻa e fekau kiate kimoutolu ke mou ʻalu ki ʻOhaioó; pea te u ʻoatu ai kiate kimoutolu ʻa ʻeku fonó; pea ʻe fakakoloaʻiaʻi ai ʻa kimoutolu ʻaki ʻa e mālohi mei ʻolunga;

33 Pea ʻe ʻalu atu mei ai, ʻa kinautolu kotoa pē te u loto ki aí ki he lotolotonga ʻo e ngaahi puleʻanga kotoa pē, pea ʻe fakahā kiate kinautolu ʻa e meʻa ke nau faí; he ʻoku ʻi ai ha ngāue lahi ʻaʻaku kuo teuteu, koeʻuhi he ʻe fakamoʻui ʻa ʻIsileli, pea te u tataki ʻa kinautolu ki he feituʻu kotoa pē te u loto ki ai, pea ʻe ʻikai taʻofi ʻe ha mālohi ʻa hoku nimá.

34 Pea ko ʻeni, ʻoku ou tuku ki he siasi ʻi he ngaahi feituʻu ko ʻení ha fekau, ke fili ha kau tangata ʻe niʻihi ʻiate kinautolu, pea ke fili ʻa kinautolu ʻe he leʻo ʻo e siasí;

35 Pea ke nau tokangaʻi ʻa e masivá mo e faingataʻaʻiá, pea tokoniʻi ʻa kitautolu koeʻuhí ke ʻoua te nau faingataʻaʻia; pea fekauʻi atu ʻa kinautolu ki he feituʻu kuó u fekau kiate kinautolú;

36 Pea ʻe hoko ʻeni ko ʻenau ngāué, ke puleʻi ʻa e ngaahi meʻa ʻoku kau ki he koloa ʻa e siasí ni.

37 Pea ko kinautolu ʻoku ʻi ai ʻenau ngaahi faama ʻa ia ʻoku ʻikai lava ke fakatau atú, tuku ke nau tuku ia pe nō atu ʻa e ngaahi fāmá ʻo fakatatau ki he meʻa ʻoku hā ngali lelei kiate kinautolú.

38 Tokanga ke tauhi maʻu ʻa e ngaahi meʻa kotoa pē; pea ʻo ka fakakoloaʻi ʻa e tangatá ʻaki ʻa e mālohi mei ʻolunga mo fekauʻi atu ʻa kinautolu, ʻe tānaki fakataha mai ʻa e ngaahi meʻá ni kotoa pē ki he loto siasí.

39 Pea kapau te mou kumi ki he ngaahi koloa ʻa ia ko e finangalo ʻo e Tamaí ke foaki kiate kimoutolú, te mou hoko ko e kakai koloaʻia taha ʻi he kakai kotoa pē, he te mou maʻu ʻa e ngaahi koloa ʻo e taʻengatá; pea ʻoku ʻaʻaku ʻa e ngaahi koloa ʻo e māmaní ke foaki; kae vakai telia ʻa e loto-hīkisiá, telia naʻa mou hoko ʻo tatau mo e kau Nīfai ʻo e kuonga muʻá.

40 Pea ko e tahá, ʻoku ou pehē kiate kimoutolu, ʻoku ou fai kiate kimoutolu ha fekau, ke ʻalu atu ʻa e tangata kotoa pē, ʻa e kaumātuʻá, taulaʻeikí, akonakí mo e kāingalotú foki, ʻo ngāue ʻaki hono tūkuingatá, ʻi he ngāue ʻa hono nimá, ke teuteuʻi mo fakahoko ʻa e ngaahi meʻa ʻa ia kuó u fekaú.

41 Pea tuku ke hoko hoʻomou ngaahi malangá ko e leʻo fakatokangá, ko e tangata taki taha ki hono kaungāʻapí, ʻi he angavaivai pea mo e angamalū.

42 Pea ke mou ʻalu atu mei he lotolotonga ʻo e kau fai angahalá. Fakahaofi ʻa kimoutolu. Ke maʻa ʻa kimoutolu ʻoku fua ʻa e ngaahi ipu ʻa e ʻEikí. ʻE pehē. ʻĒmeni.