1 Kaakano olwatuuka mu mwaka ogw’amakumi asatu ogw’obufuzi bw’abalamuzi eri abantu ba Neefi, oluvannyuma lwa Moloni okufuna n’okusoma ebbaluwa ya Keramani, yasanyuka nnyo olw’eby’embeera ye ennungi, weewaawo, obuwanguzi obw’ekitalo Keramani bwe yali afunye, mu kufuna ensi ezo ezaali zitwaliddwa.

2 Weewaawo, era yakimanyisa abantu be bonna, mu nsi yonna okwetooloolawo mu kitundu ekyo gye yali, olwo nabo basanyuke.

3 Era olwatuuka amangu ago n’aweereza ebbaluwa eri Pakolani, ng’ayagala alagire abasajja okukuŋŋaanyizibwa okuzaamu Keramani amaanyi, oba amagye ga Keramani, okukkakkana nti kimubeerera kyangu okukuuma ekitundu ekyo eky’ensi kye yali afunye mu obuwanguzi mu ngeri ey’ekyamagero okukyeddiza.

4 Era olwatuuka Moloni bwe yamala okuweereza ebbaluwa eno mu nsi y’e Zalakemula, yatandika nate okuteekawo enteekateeka asobole okufuna eby’obugagga n’ebibuga ebyo ebyali bisigadde Abalamani bye baali baabaggyako.

5 Era olwatuuka Moloni bw’atyo bwe yali akola enteekateeka ez’okugenda okulumba Abalamani okulwana, laba, abantu ba Nefayika, abaali bakuŋŋaanyiziddwa okuva mu kibuga kya Moloni n’ekibuga kya Leki n’ekibuga kya Moliyantoni, baalumbibwa Abalamani.

6 Weewaawo, ddala n’abo abaali bawaliriziddwa okudduka okuva mu nsi ya Manti, era n’okuva mu nsi okwetooloolawo, baali bazze nga beegasse ku Balamani mu kitundu kino eky’ensi.

7 Era bwe batyo nga bangi nnyo, weewaawo, era nga bafuna amaanyi lunaku ku lunaku, olw’ekiragiro kya Amolooni baavaayo okulumba abantu ba Nefayika, era baatandika okubatta n’okusanjagibwa okw’amaanyi ennyo.

8 Era amagye gaabwe gaali mangi nnyo nti abantu ba Nefayika abaasigalawo baawalirizibwa okudduka mu maaso gaabwe; era bajja ddala ne beegatta ku ggye lya Moloni.

9 Era kaakano nga Moloni bwe yali alowoozezza nti wandibaddewo abasajja abasindikibwa mu kibuga kya Nefayika, okuyamba abantu okulabirira ekibuga ekyo, era ng’amanyi nti kyali kyangu okukuuma ekibuga ekyo obutagwa mu mikono gy’Abalamani okusinga okukyeddiza okuva gye bali, yalowooza nti kyandibabeerera ekyangu okulabirira ekibuga ekyo.

10 N’olwekyo yasigaza eggye lye lyonna okulabirira ebifo ebyo bye yali anunudde.

11 Era kaakano, Moloni bwe yalaba nga ekibuga Nefayika kitwaliddwa yanakuwala nnyo, n’atandika okubuusabuusa, olw’obwonoonefu bw’abantu, oba tebaalina kugwa mu mikono gya baganda baabwe.

12 Kaakano bwe kityo bwe kyali ku bassenkulu ab’eggye be bonna. Baabuusabuusa era ne beewuunya nate olw’obwonoonefu bw’abantu, era kino olw’obuwanguzi bw’Abalamani ku bo.

13 Era olwatuuka Moloni yali munyiivu eri obufuzi, olw’obutafaayo bwabwe ku bikwata ku ddembe ly’ensi yaabwe.