1 Kaakano olwatuuka oluvannyuma lw’enkomerero ya Koliko, Aluma nga afunye amawulire nti Abazolamu baali bakyamya amakubo ga Mukama, era nti Zolamu, eyali omukulembeze waabwe, yali abuzaabuza emitima gy’abantu okuvunnamira ebifaananyi ebitayogera, omutima gwe nate gwaddamu okulwala olw’obubi bw’abantu.

2 Kubanga kye kyaviirako ennaku nnyingi eri Aluma okumanya obubi mu bantu be; n’olwekyo omutima gwe gwali munakuwavu eby’ensusso olw’okwawukana kw’Abazolamu okuva ku Baneefi.

3 Kaakano Abazolamu baali beekuŋŋaanyizza wamu mu nsi gye baayita Antiyonamu, eyali ebuvanjuba obw’ensi ya Zalakemula, eyali okumpi ng’ensalagana n’olubalama lw’ennyanja, eyali mu bukiika obwa ddyo obw’ensi ya Yasoni, era eyali esalagana n’olukoola ebukiika obwa ddyo, olukoola olwali lujjudde Abalamani.

4 Kaakano Abaneefi baatya nnyo nti Abazolamu baali bagenda kuggulawo empuliziganya n’Abalamani, era nti kyandiviiriddeko okufiirwa ennyo ku ludda lw’Abaneefi.

5 Era kaakano, ng’okubuulira ekigambo bwe kwali kwesigamye ennyo ku kulembera abantu okukolanga ekyo ekyali eky’obwenkanya; weewaawo, kwali kulina enkizo ey’amaanyi ennyo ku birowoozo by’abantu okusinga ekitala, oba ekintu ekirala kyonna, ekyali kibatuuseeko; n’olwekyo Aluma yalowooza nti kyali kigwanidde okugezesa obulungi bw’ekigambo kya Katonda.

6 N’olwekyo y’atwala Amoni, ne Alooni, ne Omuneeri; era Kimuni gwe yaleka mu kkanisa e Zalakemula; naye abasatu abasoose be y’atwala wamu naye, era ate ne Amuleki ne Zeziromu, abaali e Mereki; era ate n’atwala ababiri ku batabani be.

7 Kaakano omukulu ku batabani be teyagenda naye, era erinnya lye Keramani; naye amannya g’abo be yagenda nabo gaali Sibulooni ne Koliyantoni; era gano ge mannya g’abo abaagenda naye mu Bazolamu, okubabuulira ekigambo.

8 Kaakano Abazolamu baali bakyewaggula okuva ku Baneefi; n’olwekyo baali bafuunako okubuulirwa ekigambo kya Katonda.

9 Naye baali bagudde mu nsobi ez’amaanyi, kubanga tebafuba kukuuma biragiro bya Katonda n’amateeka ge, okusinziira ku mateeka ga Musa.

10 So tebafaayo ku bikolebwa mu kkanisa, okunyiikira mu kusaba n’okwegayirira eri Katonda buli lunaku, baleme okugenda mu kukemebwa.

11 Weewaawo, mu bufunze, baakyamya amakubo ga Mukama mu by’okulabirako bingi nnyo; n’olwekyo, olw’ensonga eno, Aluma ne baganda be baagenda mu nsi okubabuulira ekigambo.

12 Kaakano, bwe baali batuuse mu nsi, laba, ekyabewuunyisa kwe kusanga ng’Abazolamu baali bazimbye amakuŋŋaaniro, era baakuŋŋaniranga wamu ku lunaku lumu mu sabbiiti, olunaku olwo lwe baayita olunaku lwa Mukama; era baasinzanga mu ngeri Aluma ne baganda be gye batalabangako;

13 Kubanga baali bazimbye ekifo waggulu mu masekkati g’ekkuŋŋaaniro lyabwe, ekifo eky’okuyimirirako, ekyali ekigulumivu okusukka ku mutwe; era ku ntikko yaakyo nga wayingirayo omuntu omu yekka.

14 N’olwekyo, buli ey’ayagalanga okusinza nga alina okugenda n’ayimirira waggulu waakyo, n’agololera emikono gye eri eggulu, era n’awanjaga mu ddoboozi ery’omwanguka ng’agamba:

15 Omutukuvu, omutukuvu Katonda; tukkiriza nti oli Katonda, era tukkiriza nti oli mutukuvu, era nti wali mwoyo, era nti oli mwoyo, era nti oliba mwoyo emirembe gyonna.

16 Katonda Omutukuvu, tukkiriza nti otwawudde ku baganda baffe; era tetukkiririza mu nnono ya baganda baffe, eyabaweebwa olw’obuto bwa bakitaabwe; naye tukkiriza nti ggwe watulonda tubeere abaana bo abatukuvu; era ate otutegeezezza nti tewalibaawo Kristo.

17 Naye ggwe atakyuka eggulo, leero, n’emirembe gyonna; era ggwe otulonze tulokolebwe, so nga bonna abatwetoolodde balondeddwa okusuulibwa n’obusungu bwo wansi mu ggeyeena; olw’obutukuvu obwo, Ayi Katonda, tukwebaza; era ate tukwebaza olw’okutulonda, tuleme okubuzaabuzibwa nga tugoberera obulombolombo obw’obusirusiru obwa baganda baffe, obubasibira wansi mu kukkiriza kwa Kristo, ekituusa emitima gyabwe okutaayaayira ewala okuva w’oli, Katonda waffe.

18 Era nate tukwebaza, ayi Katonda, nti tuli bantu abalonde era abatukuvu. Amiina.

19 Kaakano olwatuuka Aluma era ne baganda be era ne batabani be nga bawulidde okusaba kuno, beewuunya ekisukiridde.

20 Kubanga laba, buli muntu yagendanga n’asaba essaala zino ze zimu.

21 Kaakano ekifo ekyo bo bakiyitanga Lamwemputomu, nga kivvunulwa, kye kituuti ekitukuvu.

22 Kaakano, ku kituuti kino baasabanga, buli muntu, essaala y’emu eri Katonda, nga beebaza Katonda waabwe nti baalondebwa ye, era nti teyabakyamya kugoberera bulombolombo bwa baganda baabwe, era nti emitima gyabwe tegyabbibwa kukkiririza mu bintu ebigenda okujja, bye batamanyangako.

23 Kaakano, oluvannyuma lw’abantu bonna okuwaayo okwebaza mu ngeri eno, baddangayo mu maka gaabwe, nga tebaddirangamu ddala kwogera ku Katonda waabwe nate okutuusa nga bazzeemu okukuŋŋaana awamu ku kituuti ekitukuvu, okuwaayo okwebaza mu ngeri yaabwe.

24 Kaakano Aluma bwe yalaba kino omutima gwe ne gunakuwala; kubanga yalaba nga baali abantu ababi era abakyamye; weewaawo, yalaba ng’emitima gyabwe giteekeddwa ku zaabu, era ne ku ffeeza, era ne ku bintu ebirungi ebya buli ngeri.

25 Weewaawo, era y’alaba ng’emitima gyabwe gikulumbalidde mu kwegulumiza okw’amaanyi, mu malala gaabwe.

26 Era n’ayimusa eddoboozi lye eri eggulu, n’awanjaga ng’agamba nti: Naye, kumala bbanga ki, ayi Mukama lyo naaleka abaweereza bo okubeera wansi wano mu mubiri, okulaba obubi obw’amaanyi bwe butyo mu baana b’abantu?

27 Laba, ayi Katonda, bakuwanjagira, naye emitima gyabwe gibulidde mu malala gaabwe. Laba, ayi Katonda, bakuwanjagira n’emimwa gyabwe, nga beegulumiza, ddala n’amaanyi, n’ebintu eby’ensi ebitaliimu nsa.

28 Laba, ayi Katonda wange, engoye zaabwe ez’omuwendo omungi, n’empeta zaabwe, n’obukomo bwabwe, n’eby’okwewunda byabwe ebya zaabu, era n’ebintu byabwe byonna eby’omuwendo bye beewuundisa; era laba, emitima gyabwe giteekeddwa ku byo, era naye ne bakuwanjagira nga bagamba; Tukwebaza, ayi Katonda, kubanga tuli bantu abalonde gy’oli, so ng’abalala balizikirira.

29 Weewaawo, era bagamba nti obamanyisizza nti tewalibaawo Kristo.

30 Ayi Mukama Katonda, kumala bbanga ki lyo naaleka obubi obw’engeri eno n’obutali bwesigwa okubeera mu bantu bano? Ayi Mukama, on’ampa amaanyi, ndyoke ngumire obunafu bwange. Kubanga ndi munafu, era obubi bwe butyo mu bantu bano bulumya emmeeme yange.

31 Ayi Mukama, omutima gwange munakuwavu nnyo; on’abudaabuda emmeeme yange mu Kristo. Ayi Mukama, on’ampa obusobozi okufuna amaanyi, nsobole okubonaabona nga gumiikiriza ebibonoobono bino ebigenda okuntuukako, olw’obutali butuukirivu bw’abantu bano.

32 Ayi Mukama, on’abudaabuda emmeeme yange, era on’ampa obuwanguzi, era ate ne bakozi bannange abali nange; weewaawo, Amoni, ne Alooni, ne Omuneeri, ate ne Amuleki ne Zeziromu, era ate ne batabani bange ababiri; weewaawo, ddala bano bonnaon’abudaabuda, ayi Mukama. Weewaawo, on’abudaabuda emyoyo gyabwe mu Kristo.

33 On’abawa okufuna amaanyi, nti basobole okugumiikiriza okubonaabona kwabwe okunaabatuukako olw’obubi bw’abantu bano.

34 Ayi Mukama, on’atuwa okufuna obuwanguzi mu kubakomyawo gy’oli nate mu Kristo.

35 Laba, ayi Mukama, emyoyo gyabwe gya muwendo mungi, era bangi ku bo baganda baffe; n’olwekyo, tuwe, ayi Mukama, amaanyi n’amagezi tulyoke tukomyewo bano, baganda baffe, nate gy’oli.

36 Kaakano olwatuuka Aluma bwe yamala okwogera ebigambo bino, n’abakubira mu ngalo bonna abaali naye. Era laba, bwe yali abakubira mu ngalo, bajjula Omwoyo Omutukuvu.

37 Oluvannyuma lw’ekyo beeyawula omu ku munne, nga tebalowooza ku kye balina okulya, oba kye banaanywa, oba kye banaayambala.

38 Era Mukama y’abawa ebyetaago baleme okulumwa njala, wadde okubeera abayonta; weewaawo, era n’abawa amaanyi, nti baleme kufuna bibonoobono eby’engerizonna, okuggyako nga byamiribwa mu ssanyu lya Kristo. Kaakano kino kyali okusinziira ku kusaba kwa Aluma; era kino kubanga yasaba n’okukkiriza.