1 Era kaakano, mutabani wange, ntegeera nti waliwo ekisingawo ekitawaanya endowooza yo, ky’otasobola kutegeera; ekikwata ku bwenkanya bwa Katonda mu kubonerezebwa kw’omwonoonyi; kubanga ogezaako okulowooza nti si bwenkanya omwonoonyi okuweebwayo mu mbeera ey’ennaku.

2 Kaakano laba mutabani wange, nja kukunnyonnyola ekintu kino. Kubanga laba, oluvannyuma lwa Mukama Katonda okugoba bazadde baffe abaasooka okuva mu lusuku Adeni, okukabala ettaka, mwe baggibwa; weewaawo, yaggyayo omuntu, n’ateeka ku nkomerero ey’ebuvanjuba w’olusuku Adeni, bakerubi, n’ekitala ekyaka omuliro ekyakyukanga buli ludda, okukuuma omuti ogw’obulamu;

3 Kaakano, tulaba nti omuntu oyo yali afuuse nga Katonda, ng’amanyi ekirungi n’ekibi; era olw’okutya nti ayinza okugolola omukono gwe, n’akwata ku muti ogw’obulamu, n’alya n’abeera omulamu olubeerera, Mukama Katonda yateeka bakerubi n’ekitala ekyaka omuliro, aleme okulya ku kibala;

4 Era bwe tutyo bwe tulaba, nti waaliwo ekiseera ekyaweebwa omuntu okwenenya, weewaawo, ekiseera eky’okugezesebwa, ekiseera eky’okwenenya n’okuweereza Katonda.

5 Kubanga laba, singa Adamu yagolola omukono gwe amangu ago, era nga alidde ku muti ogw’obulamu, yandibadde mulamu olubeerera, okusinziira ku kigambo kya Katonda, nga tasigazza bbanga lya kwenenya; weewaawo, era n’ekigambo kya Katonda kyandibadde kya butaliimu, era n’entegeka enkulu ey’obulokozi yandiremeseddwa.

6 Naye laba, kyagererwa omuntu okufa; n’olwekyo, nga bwe baasalibwako okuva ku muti ogw’obulamu bwe balina okufa okuva ku lukalu lw’ensi; era omuntu yafuuka ey’abula olubeerera, weewaawo, bafuuka abantu abagudde.

7 Era kaakano, olaba olw’ekyo nti bazadde baffe abaasooka baaboolebwa mu mubiri ne mu mwoyo okuva mu maaso ga Mukama; era bwe tutyo tulaba baafuuka abafugibwa abagoberera okwagala kwabwe.

8 Kaakano laba, kyali tekisaanidde omuntu okubbululwa okuva mu kufa kuno okw’omubiri, kubanga ekyo kyandisaanyizzaawo entegeka enkulu ey’essanyu.

9 N’olwekyo, nga omwoyo bwe gwali teguyinza kufa, era nga okugwa mu kibi kwali kuleetedde abantu bonna okufa okw’omwoyo awamu n’okw’omubiri, kwe kugamba, baali babooleddwa okuva mu maaso ga Mukama, kyali kisaanidde abantu okubbululwa okuva mu kufa kuno okw’omwoyo.

10 N’olwekyo, nga bwe baali bafuuse ab’obw’omubiri, ab’egombi, era aba setaani, mu butonde, embeera eno ey’okugezesebwa yafuuka embeera gye baalina okwetegekeramu; yafuuka embeera ey’okuteekateeka.

11 Era kaakano jjukira, mutabani wange, singa teyali ntegeka ey’okununulwa, (nga ogitadde ku bali) amangu ddala nga bafudde emyoyo gyabwe gyandibadde minakuwavu, nga gibooleddwa okuva mu maaso ga Mukama.

12 Era kaakano, tewaaliwo ngeri yonna ya kubbulula bantu mu mbeera eno ey’okugwa mu kibi, omuntu gye yali yereeseeko olw’obujeemu bwe ye yennyini;

13 N’olwekyo, okusinziira ku bwenkanya, entegeka ey’okununulwa teyandisobose kubeerawo, okuggyako ku bukwakkulizo obw’okwenenya kw’abantu mu mbeera eno ey’okugezesebwa, weewaawo, embeera eno ey’okuteekateeka; kubanga okuggyako nga kyali ku bukwakkulizo buno, okusaasira tekwalisobodde kutandika kukola okuggyako nga kusaanyawo okukola okw’obwenkanya. Kaakano okukola okw’obwenkanya kwali tekusobola kusanyizibwawo; singa kiba bwe kityo, Katonda yandibadde takyali Katonda.

14 Era bwe tutyo tulaba ng’abantu bonna baali bagudde mu kibi, era nga bali mu mikono egy’obwenkanya; weewaawo, obwenkanya bwa Katonda, obwa bawaayo olubeerera okuboolebwa okuva mu maaso ge.

15 Era kaakano, entegeka ey’okusaasira nga tesobola kuleetebwa okuggyako omutango nga gukoleddwa; n’olwekyo Katonda yennyini atangirira ebibi eby’ensi, okuleetawo entegeka ey’okusaasira, okutuukiriza ebyetaago eby’obwenkanya, olwo Katonda alyoke abeere Katonda atuukiridde, Katonda omwenkanya, era ate Katonda omusaasizi.

16 Kaakano, okwenenya kwali tekuyinza kujja eri abantu okuggyako nga waaliwo ekibonerezo, nga nakyo kyali kya lubeerera ng’obulamu obw’omwoyo bwe bulina okuba, nga kiyungiddwako mu kukontana n’entegeka ey’essanyu, eyali ey’olubeerera era nga obulamu obw’omwoyo.

17 Kaakano, omuntu yandisobodde atya okwenenya okuggyako nga ayonoonye? Yandisobodde atya okwonoona singa tewaaliwo tteeka? Etteeka lyandibaddewo litya okuggyako nga waaliwo ekibonerezo?

18 Kaakano, waaliwo ekibonerezo ekyayungibwako, n’etteeka ery’obwenkanya eryaweebwa, eryaleeta okwejjusa okw’endowooza eri omuntu.

19 Kaakano, singa tewaali tteeka lyaweebwa; singa omuntu yattanga yandibadde afa; yanditidde nti ajja kuffa singa atta?

20 Era ate, singa tewaali tteeka lyaweebwa ku kibi abantu tebanditidde kwonoona.

21 Era singa tewaali tteeka lyaweebwa, singa abantu baayonoonanga obwenkanya bwandikoze ki, oba wadde okusaasira, kubanga tebyandibadde na kimu kye bituukiriza ku kitonde?

22 Naye waliwo etteeka eriteekeddwawo, era n’ekibonerezo ekiyungiddwako, era n’okwenenya okuweereddwa; nga okwenenya okwo, okusaasira okwo kwe kubanja; bwe kitaba ekyo, obwenkanya bubanja ekitonde era bussa mu nkola etteeka, era etteeka liteekawo ekibonerezo; bwe kitaba bwe kityo, okukola kw’obwenkanya kwandisaanyewo, era Katonda yandibadde takyali Katonda.

23 Naye Katonda talekera awo kubeera Katonda, era n’okusaasira kubbulula aboneredde, era okusaasira kujja olw’omutango; era omutango guleetawo okuzuukira kw’abafu; era okuzuukira kw’abafu kukomyawo abantu mu maaso ga Katonda; era bwe batyo bakomezebwawo mu maaso ge, okulamulwa okusinziira ku bikolwa byabwe, okusinziira ku tteeka n’obwenkanya.

24 Kubanga laba, obwenkanya bukakaatika ebyetaago byabwo byonna, era ate okusaasira kubanja byonna ebyakwo; era bwe kityo, tewali n’omu okuggyako ababoneredde ddala mu mazima be balokolebwa.

25 Kiki, otebereza nti okusaasira kuyinza okunyaga obwenkanya? Nkugamba nti, nedda; wadde n’akamu. Singa kiba bwe kityo, Katonda yandibadde takyali Katonda.

26 Era bwe kityo Katonda aleetawo ebigendererwa bye ebikulu era eby’olubeerera, ebyategekebwa okuva ku musingi gw’ensi. Era obulokozi n’okununulibwa kw’abantu bwe bityo bwe bijja, era ate n’okuzikirizibwa kwabwe n’ennaku.

27 N’olwekyo, wattu mutabani wange, buli oyo yenna an’ajja, ajje era anywe ku mazzi ag’obulamu ku bwereere; era na buli oyo yenna atajje y’omu atawalirizibwe kujja; naye ku lunaku olw’enkomerero kirimuddizibwa okusinziira ku bikolwa bye.

28 Singa abeera ayagadde okukola ekibi, era n’ateenenya mu nnaku ze, laba, ekibi kirimukolebwako, okusinziira ku kuzzibwawo okwa Katonda.

29 Era kaakano, mutabani wange, njagala oleme kuleka bintu bino okukutawaanya nate, era leka ebibi byo byokka bikutawaanye, n’okutawaana okwo okulikukkakkanya wansi okutuusa okwenenya.

30 Wattu mutabani wange, njagala oleme nate okwegaana obwenkanya bwa Katonda. Tofuba kwekwasa n’akatono olw’ebibi byo, nga ogaana obwenkanya bwa Katonda; naye oleke obwenkanya bwa Katonda, n’okusaasira kwe, n’okugumiikiriza kwe okugundiivu biyingire omutima gwo; era kikukkakkanye wansi mu nfuufu mu bwetoowaze.

31 Era kaakano, wattu mutabani wange, oyitiddwa Katonda okubuulira ekigambo eri abantu bano. Era kaakano, mutabani wange, genda makubo go, olangirire ekigambo n’amazima n’obwesimbu, osobole okuleeta emyoyo eri okwenenya, olwo entegeka enkulu ey’okusaasira esobole okutuukirira gye bali. Era Katonda akuwe okusinziira ku bigambo byange. Amiina.