1 Ena ikatolu ni Okotova ena yabaki duanaudolu ciwanadrau tinikawalu, au a dabe toka kina ena noqu rumu ka vakasamataka tiko na ivolanikalou;

2 Kau vakananuma na isoro cecere ni veivakaduavatataki ka a vakacabora na Luve ni Kalou, me baleta na sereki ni vuravura;

3 Kei na loloma cecere ka vakasakiti erau sa vakaraitaka na Tamada kei na Luvena ena nona lako mai na Dauveisereki ki vuravura;

4 Ena vuku ni nona veisorovaki, kei na talairawarawa ki na ivakavuvuli ni kosipeli, me vakabulai kina na tamata.

5 Ia ni’u vakasamataka tiko na veika oqo, au qai nanuma lesu na veika a vola ko Pita na iApositolo, vei ira na yalododonu ni gauna e liu ka ra dui tutu mai Ponito, Kalatia, Kapatosia kei na veiyasana eso mai Esia, na veivanua a qai vunautaki kina na kosipeli ni sa vakamatei oti ena kauveilatai na Turaga.

6 Au a cereka na iVolatabu ka wilika na ikatolu kei na ikava ni wase ena imatai ni ivola i Pita, ia ni’u wilika tiko sa lauti au vakalevu sara me vaka e se bera vakadua ni bau yaco vei au e liu, na veitikina oqo:

7 Ni sa vakararawataki tale ga vakadua na Karisito ena vuku ni ivalavala ca, io na bula dodonu ena vukudra na sega ni bula dodonu, me kauti keda kina vua na Kalou, raica sa vakamatei na yagona, a sa vakabulabulataki na Yalona:

8 A sa lako tale ga ko koya ka vunau vei ira na yalo era sa tiko ena vale ni veivesu;

9 Io ko ira era a talaidredre e liu, ni sa vosota vakadede na Kalou ka sa dau wawa ena gauna i Noa, ni sa vakarautaki tiko na waqa, raica era sa lewe vica ga sa vakabulai kina e loma ni wai, io e le walu wale ga. (1 Pita 3:18–20).

10 Ena vuku ni ka oqo sa vunautaki kina na kosipeli vei ira tale ga era sa mate, me ra lewai kina me vaka na tamata ena yagodra, ia me ra bula ga vua na Kalou ena yalodra. (1 Pita 4:6).

11 Ni’u sa vakananuma tiko na veika sa volai oqo, sa dolavi na mata ni yaloqu, ka sa curumi au na Yalo ni Turaga, ka’u raici ira na lewevuqa era sa mate, na tamata lalai kei na turaga.

12 Raica era sa soqoni vata ena dua na vanua e dua na ilawalawa bula dodonu sega ni wiliki rawa, ko ira era sa yalodina sara ka muria na ivakavuvuli i Jisu ena nodra bula vakayago;

13 Ka ra cabora na isoro sa vakatautauvatataki kei na isoro cecere ni Luve ni Kalou, ka sotava na veivakararawataki ena yacana na Dauveisereki.

14 Ko ira kece oqori era sa mate yani, ka tudei tu ena nodra vakanuinui ki na dua na tucake tale lagilagi, ena loloma soli wale ni Kalou na Tamana kei na Luvena e Duabau Ga, ko Jisu Karisito.

15 Au raica ni ra sa vakasinaiti ena reki kei na marau, ka ra sa vakamolimoli vata ni sa voleka mai na siga me ra sereki kina.

16 Era sa soqoni vata ka waraka na nona lesu yani na Luve ni Kalou ki na vuravura ni yalo, ka tukuna ni ra sa sereki mai na ivau ni mate.

17 Ena qai vakalesui tale na kuvu ni soso sa moce no ki na kena itutu e uasivi sara, io ena veiuturi vata na sui ka ologi ena ua kei na viciko, raica ena cokoti vata tale na yalo kei na yago me sega tale ni veitawasei, io me ra rawata na marau sa vuabale.

18 Ni ra sa wawa ka veivosaki tiko na lewe vuqa, ka reki vakalevu ena auwa ni nodra sereki mai na sinucodo ni mate, sa rairai na Luve ni Kalou, ka tukuna na galala vei ira na yalodina era vesu tu;

19 Ia mai kea sa vunautaka kina vei ira ko koya na kosipeli tawamudu, na ivunau ni tucake tale kei na nodra vueti na kawatamata mai na lutu, ka vakakina mai na ivalavala ca ni tamata yadua, kevaka era sa veivutuni.

20 Ia a sega ni lako vei ira na tamata ivalavala ca, ka sa sega ni rogo yani na domona vei ira sa sega ni vakalou kei ira sa sega ni via veivutuni ka ra sa itovo vakasisila ena bula vakayago oqo;

21 Era sa sega talega vakakina ni raica na nona iserau, se raica na matana ko ira era a sega ni ciqoma na nona ivakadinadina kei na nodra ivakasala na parofita e liu.

22 Na vanua era tu kina ko ira oqo, sa tu ga kina na butobuto, ia ena kedra maliwa na buladodonu sa kune kina na vakacegu;

23 Era sa reki na yalododonu ni ra sa vueti, ka ra sa lolou e durudra ka vakadinadinataka ni sa nodra Dauveivueti ka Dauveisereki mai na mate kei na sinucodo kei eli na Luve ni Kalou.

24 Sa serau na kedra irairai, ka sa tiko vei ira na lumisa ni rarama mai na kena iserau na Turaga, ka ra sa vakacaucautaka tiko ga na yacana tabu.

25 Au sa kurabui, ni’u kila ni a yabaki tolu na nona cakacaka voli na iVakabula vei ira na Jiu kei ira na mataqali i Isireli, ena nona segata me vakavuvulitaka vei ira na kosipeli tawamudu ka sureti ira me ra veivutuni;

26 Ia, e dina ga ni a kitaka na cakacaka lelevu e vuqa, kei na caka mana, kei na kacivaki ni ka dina, ena kaukauwa levu kei na dodonu, era lewe vica walega era rogoca na domona, ka reki ena nona iserau, ka rawata na veivakabulai mai na ligana

27 Ia na nona veiqaravi vei ira na sa mate a vakaiyalayala walega, mai na gauna ga a vakamatei kina ena kauveilatai me yacova na nona tucake tale;

28 Kau vakananuma na vosa nei Pita—ena nona kaya ni a vunau na Luve ni Kalou vei ira na yalo era sa tiko ena vale ni veivesu, ka ra dau talaidredre ena so na gauna, ni sa vosota vakadede na Kalou ka sa dauwawa ena gauna i Noa—ka vakakina na sala sa rawa kina vua me vunau vei ira na yalo oqori ka vakayacora na veicakacaka e ganita ena loma ni gauna lekaleka oqori.

29 Ia ni’u sa vakananuma tiko, sa dolavi na mataqu ka vakabulabulataki na noqu kila ka, ka’u qai raica ni a sega ni lako vakatamata na Turaga me vakavulici ira na tamata ivalavala ca kei ira na dau talaidredre, ka ra a cata na dina;

30 Ia raica, mai vei ira ga na buladodonu, a conaka kina ko koya na nona ilawalawa ka lesi ira na nona italai, era vakaisulu ena kaukauwa kei na dodonu, ka talai ira me ra lako yani ka kauta na rarama ni kosipeli ki vei ira era tu ena butobuto, io vei ira kecega na yalo ni tamata; ia sa vakaoqori na kena vunautaki na kosipeli vei ira na mate.

31 A ra sa lako yani na nona italai digitaki ka tukuna na gauna vinaka ni Turaga ka vunautaka na veisereki vei ira na bobula era vesuki tu, io vei ira kece era na veivutunitaka na nodra ivalavala ca ka ciqoma na kosipeli.

32 A sa vakaoqori na vunautaki ni kosipeli vei ira sa mate ena nodra ivalavala ca, ka sega ni kila na ivakavuvuli dina, se ko ira sa talaidredre ka sega ni vakabauti ira na parofita.

33 Sa vakavulici me ra vakabauta na Kalou, veivutuni mai na ivalavala ca, veisosomitaki ena papitaiso me baleta na bokoci ni ivalavala ca, kei na isolisoli ni Yalo Tabu ena veitabaki ni liga.

34 Kei na ivakavuvuli kece tale ni kosipeli e yaga me ra kila me qai rawa kina ni ra lewai me vaka na tamata ena bula vakayago, ia me ra bula me vaka na Kalou ena yalodra.

35 Ka sa vakatakilai kina vei ira na sa mate, ko ira na tamata lalai kei na turaga, ko ira na sega ni yalododonu kei ira sa yalododonu, ni sa rawa ga na veisereki ena nona veisorovaki ena kauveilatai na Luve ni Kalou.

36 A vakaoqori na kena vakatakilai mai ni a vakayagataka na noda Dauveivueti, na gauna e veiqaravi kina ena nodra vuravura na yalo, me veidusimaki ka vakarautaka na yalodra na parofita yalodina era dau vakadinadinataki koya ena nodra bula vakayago;

37 Me ra kauta yani na itukutuku ni veivueti vei ira kecega era sa mate, ki vei ira a sega ni rawa me lako kina vakataki koya, ena vuku ni nodra veisaqasaqa ka ivalavala ca, me rawa kina vei ira ena nodra veiqaravi na nona italai me ra rogoca na nona vosa.

38 A maliwai ira na turaga kei ira na qaqa era a tiko ena ivavakoso vakaitamera ni buladodonu oqo na Tamada ko Atama, ko koya sa Bula Mai Liu Sara ka tamadra na tamata kecega.

39 Kei na Tinada uasivi ko Ivi, kei ira tale ga na luvena yalewa yalodina era a bula ena veitabagauna ka ra a qarava na Kalou bula ka dina.

40 A tiko kina ko Epeli, na imatai ni tamata ka a vakamatei ena nona vakabauta, kei Seci tale ga na tacina, e dua vei ira na qaqa, o koya sa ucuya vinaka sara na tamana, ko Atama.

41 Ko Noa, o koya a veivakasalataki ena vuku ni waluvu; ko Semi, na bete levu cecere; ko Eparaama, na tama ni vakabauta; ko Aisake, Jekope, kei Mosese, na daunilawa levu vei ira na Isireli;

42 Kei Aisea, ko koya ka a tukuna ena parofisai ni sa lumuti na Dauveivueti me vauci ira sa yalo raramusumusu, me vunautaka na bula galala vei ira na bobula, kei na veisereki vei ira sa tiko ena vale ni veivesu, a tiko talega kina.

43 Ka vakakina ko Isikeli, o koya a vakaraitaki vua ena raivotu na buca levu ni sui mamaca, ka na vakasulumi ena yago, me tucake tale mai ena nodra vakaturi cake tale na mate, me ka bula;

44 Kei Taniela, ko koya a raica ka tukuna taumada ni na tauyavutaki na matanitu ni Kalou ena siga mai muri, ena sega sara ni vakarusai rawa ka sega ni biu tu me nodra na tamata tani;

45 Kei Iliesa, o koya erau a rairai vata mai kei Mosese ena Ulunivanua ni Veivakamataliataki;

46 Kei Malakai, na parofita ka a vakadinadinataka na lako mai nei Ilaija—o koya talega a vosa kina ko Moronai ki vei Josefa Simici na Parofita, ka tukuna kina ni na lako mai ni se bera na siga levu ka rerevaki ni Turaga—a tiko talega e kea.

47 Ko Ilaija na parofita ena mai tea e yalodra na gone na yalayala a caka vei ira na nodra qase,

48 Sa tukuna rawa tiko kina na cakacaka cecere me na vakayacori ena veivaletabu ni Turaga ena itabagauna ni taucoko ni gauna, me baleta na nodra vueti na mate, kei na nodra vauci na gone vei ira na nodra itubutubu, ia, kevaka e sega ena cudruvi na vuravura taucoko ka vakarusai ni sa lako mai ko koya.

49 Era a tiko kina ko ira kece oqo kei na lewe vuqa tale, io ko ira tale ga na nodra parofita na Nifai ka ra a dau vakadinadinataka na nona lako mai na Luve ni Kalou, raica era a soqoni vata kece yani ka waraka na nodra sereki,

50 Raica era okata ko ira era sa mate me gauna ni nodra tiko vakabobula na yali tu vakadede ni yalodra mai na yagodra.

51 Raica a vakavulici ira oqo na Turaga, ka solia vei ira na kaukauwa me ra tucake tale ga ni sa tucake oti mai na mate ko koya, me ra curu ki na matanitu nei Tamana, ka ra vakaisalataki ena tawa mate rawa kei na bula tawamudu.

52 Ka ra qai tomana mai na gauna ko ya ka lako yani na nodra cakacaka me vaka sa yalataka tu na Turaga, ka vakaivotavota ena veivakalougatataki kece sara sa maroroi tu me baleti ira era lomani koya.

53 Na Parofita ko Josefa Simici, kei na tamaqu, ko Airame Simici, ko Biriqemu Yaga, Joni Teila, Wilivote Uturavu kei na vuqa tale na tamata digitaki ka ra a maroroi tu me ra qai lako mai ena taucoko ni gauna, ka mai tura na yavu ni dua na cakacaka levu ni gauna oqo.

54 E okati kina na tara ni veivaletabu kei na qaravi ni veicakacaka vakalotu e loma me baleta na nodra vueti na mate, era a tu talega ena vuravura ni yalo.

55 Au raica ni ra maliwai ira tale ga, na turaga kei ira na tamata yalodina era a digitaki tu mai na ivakatekivu me ra na iliuliu ni Lotu ni Kalou.

56 Ni ra se bera mada ga ni sucu, o ira, vata kei ira e vuqa tale, era sa ciqoma na imatai ni nodra lesoni ena nodra vuravura na yalo ka ra vakarautaki me ra lako mai ena nona gauna na Turaga me ra mai cakacaka ena nona were ni vaini me baleta na nodra vakabulai na yalo ni tamata.

57 Au raici ira na italatala qase ni itabagauna oqo, ni ra sa biuta na bula oqo, era a tomana tiko na nodra cakacaka ni kena vunautaki na kosipeli ni veivutuni kei na veivueti, ena vuku ni nona Veisorovaki na Luvena e Duabau ga na Kalou, io vei ira sa tu ena butobuto, kei ira sa bobula ki na ivalavala ca ena vuravura ni yalo.

58 Raica era na vueti ko ira na mate era sa veivutuni, kevaka era sa talairawarawa ki na cakacaka vakalotu sa vakayacori ena vale ni Kalou.

59 Ia ni ra sa sauma oti na isau ni nodra talaidredre, ka ra sa vakasavasavataki, era na qai tauca na kedra isau me vaka na nodra ivalavala, ni ra sa itaukei ni veivakabulai.

60 A sa vakaoqo na raivotu sa vakaraitaki vei au me baleta na nodra vueti na sa mate, raica au sa vola na kena itukutuku, ka’u sa kila ni sa dina, io ena nona veivakalougatataki na noda Turaga ka noda iVakabula ko Jisu Karisito. Emeni.