Vunau kei na Veiyalayalati 69
    Footnotes

    Wase 69

    Na veika sa vakatakilai vei Josefa Simici na Parofita mai Airame, Oaio, ena 11 ni Noveba, 1831. Na kena biu vata na ivakatakila ka nakiti me tabaki taumada, sa mai vakadonui ena koniferedi ni 1–2 ni Noveba. Ena 3 ni Noveba, sa mai vakuri ka vakatokai me Ai Kuri na ivakatakila sa koto eke ena wase 133. A sa lesi oti tu o Oliva Kaudari me kauta na veika sa volai rawa tu oqo ena kena sa biu vata na ivakatakila kei na ivakaro ki Inidipenideni e Misuri, me la’ki tabaki kina. Me kauta tale ga na ilavo sa kumuni tu me vukea na kena tarai cake na Lotu mai Misuri. Na ivakatakila oqo e vakaroti kina o Joni Witima me salavata kei Oliva Kaudari ka dusimaki talega kina o Witima me lako voli ka sokumuna tiko na veika eso ena nona ilesilesi vakadaunitukutuku makawa ni Lotu ka vunivola.

    1–2, Me tomani Oliva Kaudari yani ki Misuri ko Joni Witima; 3–8, Me na vunau talega ko koya ka kumuna vata na itukutuku, ka vola na itukutuku makawa eso.

    1 Dou vakatudaliga vei au, sa kaya na Turaga na nomudou Kalou, ena vukuna na noqu tamata ko aOliva Kaudari. Sa sega ni noqu lewa yalomatua me vakatautaki taudua vua me kauta na ivola ni ivakaro kei na ilavo ki na vanua ko Saioni, ia me dua na tamata dina ka yalododonu me rau lako vata kaya.

    2 Ia, koi Au na Turaga, au sa lewa me lako ko aJoni Witima, na noqu tamata, vata kei Oliva Kaudari na noqu tamata;

    3 Ka vakakina me na tomana tikoga na nona volavola ka bulia tiko e dua na aitukutuku ni veika bibi kece e raica ka kila me baleta na noqu lotu;

    4 Ka me ciqoma talega na aivakasala kei na veivuke mai vua na noqu tamata ko Oliva Kaudari, kei na so tale.

    5 Ka vakatalega kina, o ira na noqu tamata era tu ena veivanua tani e vuravura me ra vakauta mai na itukutuku ni nodra aveiqaravi ki na vanua ko Saioni;

    6 Na vanua ko Saioni ena itikotiko ka idabedabe me na ciqomi ka caka kina na veika kece oqo.

    7 Ia, me na dauveilakoyaki vakawasoma mai na dua na vanua ki na dua tale na vanua ko Joni Witima na noqu tamata, ka vakakina mai na dua na isoqosoqo lewenilotu ki na dua tale na isoqosoqo lewenilotu, ka me rawata kina vakarawarawa na kila ka—

    8 Me dauvunau ka veivakaroti, me dauvolavola, lavelavetaki, digidigi ka rawata na veika kece me na vinaka kina na lotu, kei na itabatamata ka na qai tubu cake mai ena vanua ko aSaioni, me ra na taukena tu mai na itabatamata ki na itabatamata, me sega ni mudu ka sega ni mudu. Emeni.