iVolanikalou
    Ai Vakaro Raraba 2
    iVakamacala e botona e ra
    Theme

    Ai Vakaro Raraba 2

    E vakavuvulitaka na iVola i Momani ni “da sa tautauvata kece ena mata ni Kalou,” oka kina “na tamata loaloa kei na tamata vulavula, na bobula kei na galala, na tagane kei na yalewa” (2 Nifai 26:33). Ena itukutuku makawa kece ni Lotu, era sa papitaiso ka ra sa lewe ni Lotu yalodina tiko na tamata duikaikai kei na matatamata duidui ena vuqa na veimatanitu. Ena gauna ni bula nei Josefa Simici, eratou a tabaki kina ki na matabete e vica na tagane loaloa lewe ni Lotu. Ena veigauna taumada ni kena itukutuku, era sega ni dau solia o ira na iliuliu ni Lotu na matabete vei ira na tagane loaloa era vu mai Aferika. E sega ni matata na ibalebale ni ivalavala oqori. Era vakabauta na iliuliu ni Lotu ni gadrevi e dua na ivakatakila mai vua na Kalou me veisautaki na ivalavala oqori ka ra masuta na veituberi. A yaco mai kina na ivakatakila vua na Peresitedi ni Lotu o Sivenisa W. Kimiboli ka vakadeitaki vei ira eso tale na iliuliu ni Lotu ena Valetabu mai Salt Lake ena 1 ni June, 1978. Na ivakatakila oqo e kau tani kece kina na vakatatabu me baleta na matatamata e dau vakayacori tu ena matabete.

    Ki Vua e Baleti Koya:

    Ena 30 ni Sepiteba 1978, ena ika 148 ni Koniferedi Raraba ni Lotu i Jisu Karisito ni Yalododonu Edaidai, a vakaraitaka kina ko Peresitedi N. Eletoni Tena na iMatai ni Daunivakasala ena Mataveiliutaki Taumada ni Lotu na veika oqo:

    Ena itekivu ni June ni yabaki oqo, eratou sa vakaraitaka kina na Mataveiliutaki Taumada ni a ciqoma ko Peresitedi Sivenisa W. Kimiboli e dua na ivakatakila sa vakadonui kina me soli na veivakalougatataki ni matabete kei na valetabu vei ira kece sara na tagane bula kilikili ena Lotu. Sa kerea kina ko Peresitedi Kimiboli me’u mai tukuna ena koniferedi oqo ni ena gauna e ciqoma oti kina na ivakatakila oqo, ka a yaco mai vua ena nona vakanananu vakatitobu kei na masu ena veirumu tabu ena valetabu, a vakaraitaka vei rau na nona daunivakasala, e rau a ciqoma ka vakadonuya. Sa qai vakaraitaki vei iratou na lewe ni Kuoramu ni iApositolo Le Tinikarua, eratou a vakadonuya kece sara, sa qai vakaraitaki vei ira na vo ni Vakaitutu Raraba ka ra a vakadonuya talega.

    Sa kerea talega ko Peresitedi Kimiboli me’u wilika na ivola oqo:

    8 ni June, 1978

    Vei Kemuni kece sara na vakaitutu raraba kei na vakaitutu e veivanua ni matabete ni Lotu i Jisu Karisito ni Yalododonu Edaidai e vuravura taucoko:

    Oi Kemuni na Wekaqu:

    Me vaka ni da sa vakadinadinataka tiko na kena sa rabailevu tikoga na cakacaka ni Turaga e vuravura, eda sa vakavinavinaka ni ra sa ciqoma tiko na itukutuku ni kosipeli vakalesui mai na lewe ni veimatanitu e vuqa, ka ra sa lewena tiko na Lotu ena iwiliwili ka sa tubu cake tikoga. Oqori, sa vakavuna na kena vakauqeti na lomai keitou ena gagadre me soli vei ira na lewenilotu bula kilikili kecega ena Lotu na galala kei na veivakalougatataki e vakarautaka tu vei keda na kosipeli.

    Me da nanuma tiko na yalayala era sa cakava na parofita kei na peresitedi ni Lotu era sa liu vei keitou ni ena dua na gauna, ena nona ituvatuva tawamudu na Kalou, me ra na ciqoma kina na matabete ko ira kece na turaga era bula kilikili, ia ni da vakadinadinataka na nodra yalodina ko ira e sega tu ni vakadonui me soli vei ira na matabete, keimami sa vakatakekere tiko kina vakabalavu ena cikecike ena vukudra ko ira oqo, na wekada lomani, ka keimami dau tiko kina ena vuqa na auwa ena Rumu e Cake ni Valetabu ka kerea tiko vua na Turaga na veidusimaki vakalou.

    Sa rogoca na neimami masumasu ko Koya, ka sa vakadeitaka mai ena ivakatakila ni sa yaco mai na siga ka a yalataki balavu tu me ra na ciqoma kina na matabete tabu ko ira kece na turaga yalodina ena Lotu, vata kei na kaukauwa me ra vakayagataka kina na kena dodonu vakalou, ka marautaka vata kei ira na nodra daulomani na veivakalougatataki kece sara ena drodro mai kina, e okati kina na veivakalougatataki ni valetabu. A ka oqo, me ra na tabaki kina ki na matabete ko ira kece na tagane lewenilotu bula kilikili, veitalia na matatamata cava era lako mai kina se na roka ni kuli ni yagodra. Era sa vakaroti kina na veiliutaki vakabete me ra muria na lawatu ena nodra vakatarogi ira vakavinaka sara o ira era vakarau tabaki ki na Matabete i Eroni se Melikiseteki me vakadeitaki ni ra sa sotava na ivakatagedegede ni bula kilikili sa kilai tu.

    Keitou sa vakaraitaka raraba yani oqo ena yalobibi me kilai ni sa vakatakila mai na lomana na Turaga me baleta na nodra vakalougatataki na luvena e vuravura raraba era na rogoca na domodra na nona italai sa tu vei ira na dodonu, ka vakarautaki ira me ra ciqoma na veivakalougatataki kecega ni kosipeli.

    Ko i keitou na wekamuni dina:

    Sivenisa W. Kimiboli

    N. Eletoni Tena

    Mariana G. Romuni

    Na Mataveiliutaki Taumada

    Me vaka ni da kila ni sa parofita, daurairai, daunivakatakila, ka peresitedi ni Lotu i Jisu Karisito ni Yalododonu Edaidai ko Sivenisa W. Kimiboli, sa vakaturi kina vei keda, me vaka ni da soqoni tiko ena dua na soqoni kilai me da ciqoma na ivakatakila oqo me vosa ka nona inaki na Turaga. Oi kemuni kece ko ni tokona mo ni vakaraitaka ena nomuni laveta na ligamuni imatau. Ke dua e saqata me vakaraitaka vakakina.

    Era sa vakadonuya kece ka sega sara e saqata.

    Salt Lake City, Utah, 30 ni Sepiteba, 1978.