Ai Vakaro Raraba 1
    Footnotes

    Ai Vakaro Raraba 1

    Erau vakavuvulitaka na iVolatabu kei na iVola i Momani ni ivakatagedegede ni Kalou ena bula vakawati sai koya me dua ga na watimu vakavo kevaka e duatani tale na ka e tukuna o Koya (raica na 2 Samuela 12:7–8 kei na Jekope 2:27, 30). Ni oti e dua na ivakatakila vei Josefa Simici, sa tekivutaki na vakawati vakalevu vei ira na lewenilotu ena itekivu ni 1840 vakacaca (raica na wase 132). Mai na 1860 vakacaca ki na 1880 vakacaca, sa vakadonuya kina o Amerika me vakatabui vakalawa na ivalavala vakalotu oqo. E qai tokoni na lawa oqo mai na Mataveilewai e Cake kei Amerika. Ni oti nona ciqoma na ivakatakila, sa mani solia kina o Peresitedi Wilivote Uturavu na iBole oqo, ka a ciqomi ena Lotu ni sa dodonu ka da duavata kece kina ena 6 ni Okotova, 1890. A vu mai kina na kena muduki na vakamau vakalevu ena Lotu.

    Ki Vua e Baleti Koya:

    Me vaka ni sa vakau tiko yani mai Salt Lake City na itukutuku me baleta na ivadi vakapolitiki, ka ra sa tabaki raraba sara tu, ka tukuni kina na nodratou se qai vakauta walega oqo na Matabose ni veivaqaqai e Utah vua na Sekeriteri ni Veika ni Vanua ena dua na ripote, ni se vakayacori tikoga na vakamau vakalevu ka ni vasagavulu se sivia na mataqali vakamau vakaoqori a vakayacori e Utah me tekivu mai na June sa oti se ena loma ni yabaki sa oti, ka vakatalega kina ni ra sa dau vakatavuvulitaka, vakayaloqaqataka ka vakauqeta tiko e matanalevu na iliuliu ni Lotu na kena tomani tiko na vakatovotovotaki ni vakamau vakalevu—

    Ia koi au, ena noqu itutu vaka-Peresitedi ni Lotu i Jisu Karisito ni Yalododonu Edaidai, au sa tukuna vakaidina sara eke, ena yalo ni veidokai, ni sega ni dina na veibeitaki oqori. Keimami sega sara ni vakavuvulitaka na veikaruwani se na vakamau vakalevu, keimami sega tale ga ni vakatara e dua me kitaka na ka oqo, ka’u sa cakitaka talega ni a vakayacori ena neimami Valetabu, se ena dua tale na vanua ena Vanua oqo na vasagavulu se sivia na vakamau vakalevu.

    Sa ripotetaki e dua na kisi, ka ra tukuna kina o ira era veibeitaki tiko ni a vakayacori e dua na vakamau ena Vale ni Edaumeni mai Salt Lake City, ena vulaitubutubu ni yabaki 1889, ia au se sega ga ni kila rawa se o cei a qarava na kena cakacaka; se cava ga a vakayacori ena vuku ni ka oqo au sega ni kila. Ena vuku ni veibeitaki oqo, au a vakarota kina me basu kusarawa na Vale ni Edaumeni ka talaraki sobu sara.

    Me vaka ni sa vakacurumi ena Boselawa ni matanitu na lawa e vakatabui kina na vakawati vakalevu, ka sa kacivaki kina ena mataveilewai e cake ni sa buli me lawa ni matanitu, au sa tukuna kina oqo na noqu inaki me’u muria na lawa oqori, ka’u na vakauqeti ira kina na lewe ni Lotu au liutaki ira me ra vakayacora vakakina.

    E sega sara ni dua na ka ena noqu ivakavuvuli ki na Lotu se ena nodra ko ira na noqu itokani, ena gauna ka tukuni oqori, e rawa me tukuni se nanumi ni vakauqeta se vakayaloqaqataka na vakamau vakalevu; ia ni dua na iTalatala Qase ni Lotu e vakayagataka e dua na vosa ka kena irairai ni vakauqeta e dua na ivakavuvuli vakaoqori na kena irogorogo, sa na vakadodonutaki sara ena gauna vata ga. Ka’u sa kacivaka raraba kina oqo ni sa noqu ivakasala vei ira na Yalododonu Edaidai me ra kakua sara ni vakayacora e dua na vakamau e vakatabui ena lawa ni vanua.

    Ko Wilivote Uturavu

    Peresitedi ni Lotu i Jisu Karisito
    ni Yalododonu Edaidai.

    A qai kaya vakaoqo ko Peresitedi Loreniso Sinou:

    “Au sa vakatura, me vaka ni da raici Wilivote Uturavu ni Peresitedi ni Lotu i Jisu Karisito ni Yalododonu Edaidai, ka sai koya duadua ga e vuravura sa tu vua ena gauna oqo na lewa ni cakacaka vakalotu ni veivauci, ka da raica ni sa tu vua na dodonu kece ena vuku ni itutu e tu kina me cauraka na iBole ka sa wiliki vei keda, ka a volai ena ika 24 ni Sepiteba 1890, ia me vaka ni da soqoni vata tiko vaka dua na isoqosoqo Lotu ena Koniferedi Raraba, eda sa ciqoma na nona ivakaro ena vuku ni vakamau vakalevu me sa dodonu ka da duavata kece kina.”

    Salt Lake City, Utah, 6 ni Okotova 1890.

    Veitikina Digitaki mai na Tolu na Vosa nei
    Peresitedi Wilivote Uturavu
    me baleta na iBole

    Ena sega sara ni vakatara na Turaga vei au se vua e dua tale na tamata ena tu me Peresitedi ni Lotu oqo me liutaki kemuni ena sala tani. E sega ni vakakina na ituvatuva ni nona cakacaka. E sega ni vakaoqori na nona vakasama na Kalou. Kevaka au na via tovolea me’u kitaka vakakina, ena kauti au tani na Turaga mai na noqu itutu, ka na kitaka talega vakakina ko Koya vua e dua tale na tamata ena via kauti ira vakatani na luve ni tamata mai na ivakatakila ni Kalou kei na nodra itavi. (Ai ka 61 ni Koniferedi Raraba Vakayabaki ni Lotu, Moniti na ika 6 ni Okotova, 1890, Salt Lake City, Utah. A tabaki na kena itukutuku ena Deseret Evening News, Okotova 11, 1890, t. 2.)

    Veitalia se ko cei e bula tiko se ko cei sa mate, se ko cei ga e kacivi me liutaka na Lotu oqo, me ra na liutaka ga ena nona veivakauqeti na Kalou Kaukauwa. Kevaka era na sega ni rawa ni kitaka vakakina, era na sega ga ni rawa ni kitaka. …

    A qai vakaraitaki wale ga oqo vei au eso na ivakatakila, ka ra sa bibi sara vei au, ka’u sa na tukuna vei kemuni na ka sa tukuna vei au na Turaga. Me’u vakalesuya tale na nomuni vakasama ki na ka e vakatokai me ibole. …

    Sa tukuna vei au na Turaga me’u taroga e dua na taro vei ira na Yalododonu Edaidai, sa tukuna talega vei au ko Koya ni kevaka era na vakarorogo ki na veika au tukuna vei ira ka sauma na taro e tarogi vei ira, mai na Yalo kei na kaukauwa ni Kalou, ena tautauvata na nodra isau ni taro, ka na tautauvata na ka era vakabauta ena vuku ni tikina oqo.

    E vakaoqo na taro: Na sala cava e sala vinaka duadua me ra muria na Yalododonu Edaidai—me ra segata me ra vakatovotovotaka tikoga na vakamau vakalevu, ni sa saqata tu na lawa ni matanitu kei na nodra ile na onosagavulu vakacaca na milioni na tamata, ka na kovei na Valetabu kece sara, ka tarovi na veicakacaka vakalotu e dau caka kina, me baleti ira na bula kei ira na mate, ka vakakina na nodra tauri vakavesu na Mataveiliutaki Taumada kei na Le Tinikarua kei ira na iliuliu ni veimatavuvale ena Lotu, ka kovei na nodra iyau na tamata yadua, (e caka na veika oqori me muduki kina na ivakarau ko ya); se, ni da sa cakava oti ka sota kaya na veika eda sa sotava ena noda sa muria na ivakavuvuli me da sa muduka na ivalavala oqo ka talairawarawa ki na lawa, ia ena noda sa vakayacora vakakina eda sa vagalalataki ira kina na Parofita, iApositolo kei ira na tama me ra tiko ga e vale, me ra dusimaki ira tikoga kina na tamata ka qarava na itavi ni Lotu, ka ra laiva tikoga kina na Valetabu e ligadra na Yalododonu, me rawa ni ra qarava kina na veicakacaka vakalotu ni Kosipeli, me baleti ira na bula kei ira na mate?

    Sa vakaraitaka vei au na Turaga ena raivotu kei na ivakatakila, na veika sara ga ena yaco kevaka eda sega ni muduka na ivalavala oqo. Kevaka eda a sega ni muduka, ke na sega na betena vei kemuni … na tamata kecega na valetabu oqo e Logan; ni sa na muduki na veicakacaka vakalotu kece ena vanua ko Saioni. Ena roboti Isireli taucoko na veilecayaki, ka ra na tauri vakavesu e vuqa na tamata. Sa na tara taucoko sara na Lotu na leqa oqo, eda na qai vakasaurarataki me da muduka. Ia oqo na taro, se me na muduki ena kena ivalavala oqo, se ena ivalavala sa vakatakila vei keda na Turaga, ka me da vagalalataki ira kina na noda Parofita kei na iApositolo kei ira na tama, kei na valetabu e ligadra na tamata, me rawa ni ra sereki kina na mate. E dua na iwiliwili levu era sa sereki mai na valeniveivesu ena vuravura ni yalo mai vei ira na tamata oqo, ka na toso tiko beka ga na cakacaka se sa na mudu? Oqori na taro au taroga vei kemuni na Yalododonu Edaidai. Sa vakatau ga vei kemuni. Au vinakata mo ni dui sauma ga na taro oqori. Au na sega ni sauma; ia au via vakabibitaka ga ni na vakadina oqori na ka eda sota kaya, kevaka eda sega ni muria na sala eda sa muria.

    … Au a raica vakaidina na veika ena yaco, kevaka e sega ni vakayacori e dua na ka. Au a sa vakila makawa tiko mai na yalo ni ka oqo. Ia oqo ga na ka au via tukuna: Ke’u a sa laiva me kovei tani kece mai ligada na valetabu; Ke’u a sa lako ki valeniveivesu, ka ra lako talega kina na tagane kecega, kevaka a sega ni vakaroti au na Kalou ni lomalagi meu vakayacora na veika au a qai vakayacora; ia ni yaco mai na auwa me’u vakaroti kina me’u kitaka, sa matata vinaka tu vei au. Au a lako vua na Turaga, ka’u vola na veika e tukuna vei au na Turaga me’u vola …

    Au sa laiva oqo vei kemuni mo ni qai vakasamataka ka lewa. Sa cakacaka vata tiko kei keda na Turaga. (Koniferedi ni iTeki na Kesi, Logan, Utah, Siga Tabu, Noveba 1, 1891. Tabaki na kena itukutuku ena Deseret Weekly, Noveba 14, 1891.)

    Au sa na tukuna oqo vei kemuni na veika a vakatakilai vei au kei na ka a vakayacora na Luve ni Kalou ena ka oqo. … Ia me vaka sa bula na Kalou Kaukauwa, ke a yaco vakaidina na veika kece oqo, kevaka a sega ni tau yani na iBole. A ka oqo sa nanuma kina na Luve ni Kalou ni sa kilikili me tukuni vakamatata ki na Lotu, kei ira kecega na kai vuravura ena inaki e kila ga ko koya. A lewa na Turaga me tauyavutaki ko Saioni. Sa lewa ko koya me vakacavari na cakacaka ni valetabu oqo. Sa lewa tale ga me vakayacori tiko mada ena qakilo ni veiulunivanua oqo na cakacaka ni nodra vakabulai ko ira na bula tiko kei ira na sa mate. A sa lewa na Kalou Kaukauwa me kakua sara ni rawa na Tevoro na inaki oqo. Kevaka e rawa mo ni kila oqori, sai koya ga ko ya na kena idola. (Mai na dua na itukutuku ena ikaono ni soqoni ni kena vakatabui na Valetabu e Salt Lake, ena Epereli, 1893. Itukutuku Tabaki ni Lotu ni Vakatatabu, Vale ni Maroroi iTukutuku, Tabacakacaka ni iTukutuku ni Lotu, Salt Lake City, Utah.)