Noong Mayo 15, 1829, nagpunta sina Joseph Smith at Oliver Cowdery sa kakahuyan malapit sa bukirin ni Joseph sa Harmony, Pennsylvania, upang magtanong sa Panginoon matapos isalin ang isang talata sa Aklat ni Mormon na nagbigay-diin sa kahalagahan ng ordenansa ng binyag. Habang sila ay nagdarasal, nagpakita sa kanila si Juan Bautista bilang isang nilalang na nabuhay na mag-uli. Iginawad niya sa kanila ang Aaronic Priesthood, sinabihan sila na binyagan ang isa’t isa sa kalapit na Ilog ng Susquehanna, at pagkatapos ay sinabihan sila na ordenan ang isa’t isa sa Aaronic Priesthood. Ang mga sinabi ni Juan kina Joseph Smith at Oliver Cowdery ay nakatala sa Doktrina at mga Tipan 13. Kasunod ng kanilang binyag, napuspos ng Espiritu Santo sina Joseph Smith at Oliver Cowdery at nakaranas ng mga dakilang pagpapala.
Iginawad ni Juan Bautista ang Aaronic Priesthood kina Joseph Smith at Oliver Cowdery
Isulat sa pisara ang mga sumusunod na tanong bago magklase o gawin itong handout at ibigay sa mga estudyante (huwag ilagay ang mga sagot). Sa pagdating ng mga estudyante sa klase, sabihin sa kanila na sagutin ang mga tanong sa kapirasong papel o sa kanilang handout. Kung kailangan, imungkahi na gamitin nila ang index sa triple combination (tingnan sa “Priesthood, Aaronic”) o sa Gabay sa mga banal na Kasulatan (tingnan sa “Pagkasaserdoteng Aaron”) para makita ang mga tamang sagot. Maaari ding hintayin mo munang maisulat ng mga esudyante ang kanilang mga sagot bago mo simulan ang debosyonal.
Saan natin malalaman sa mga banal na kasulatan ang tungkol sa pagpapanumbalik ng Aaronic Priesthood?
Kailan ipinanumbalik ang Aaronic Priesthood?
Ano ang pangalan ng anghel na nagpanumbalik ng Aaronic Priesthood sa mundo sa pamamagitan ng paggawad nito kina Joseph Smith at Oliver Cowdery?
Paano iginawad sa kanila ang Aaronic Priesthood?
Ano pa ang ipinangako ng anghel na matatanggap nina Joseph at Oliver? Kanino nila ito matatanggap?
Pagkatapos ng debosyonal, sabihin sa mga estudyante na ibahagi ang kanilang mga sagot sa unang tanong. Matapos nilang masagot nang tama ang tanong na ito, pagpartner-partnerin ang mga estudyante at tingnan kung tama ang kanilang mga sagot sa iba pang mga tanong. Sabihin sa kanila na gamitin ang Joseph Smith—Kasaysayan 1:68–72 at ang paglalarawan ni Oliver Cowdery na kasunod ng Joseph Smith—Kasaysayan. Maaari kang lumibot sa silid para tulungan ang mga estudyante na makita ang mga tamang sagot.
Pagkatapos ng sapat na oras, rebyuhin ninyo ng mga estudyante ang mga sagot. Habang sama-sama ninyong tinatalakay ang mga sagot na ito, tulungan ang mga estudyante na matukoy at maunawaan ang mga sumusunod na doktrina: Ipinanumbalik ni Juan Bautista ang Aaronic Priesthood sa mundo (tingnan sa Joseph Smith—Kasaysayan 1:72). Ang priesthood ay iginagawad sa pamamagitan ng pagpapatong ng mga kamay (tingnan sa Joseph Smith—Kasaysayan 1:68, 71). Gayundin, sa pagrebyu mo ng mga sagot ng mga estudyante, ipaliwanag na natanggap nina Joseph Smith at Oliver Cowdery ang Melchizedek Priesthood mula kina Pedro, Santiago, at Juan kalaunan noong Mayo 1829 (tingnan sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 30–47).
Ipabasa nang malakas sa isang estudyante ang Joseph Smith—Kasaysayan 1:68. Sabihin sa klase na tahimik na sumabay sa pagbasa at alamin ang ginagawa nina Joseph Smith at Oliver Cowdery na naghikayat sa kanila na itanong sa Panginoon ang tungkol sa pagbibinyag para sa kapatawaran ng mga kasalanan.
Ayon sa talatang ito, ano ang naghikayat kina Joseph at Oliver na magtanong tungkol sa pagbibinyag para sa kapatawaran ng mga kasalanan? (Habang isinasalin nila ang Aklat ni Mormon ay nabasa nila ang mga turo tungkol sa pagbibinyag para sa kapatawaran ng mga kasalanan.)
Ipaliwanag na napakahalaga ng panunumbalik ng Aaronic Priesthood kaya isinama ang mga sinabi ni Juan Bautista sa Doktrina at mga Tipan bilang bahagi 13. Ipabasa nang malakas sa isang estudyante ang Doktrina at mga Tipan 13. Sabihin sa klase na tahimik na sumabay sa pagbasa at alamin kung paano nasagot ng panunumbalik ng Aaronic Priesthood ang panalangin nina Joseph Smith at Oliver Cowdery na malaman pa ang tungkol sa pagbibinyag para sa kapatawaran ng mga kasalanan.
Paano nasagot ng panunumbalik ng Aaronic Priesthood ang panalangin nina Joseph Smith at Oliver Cowdery na malaman pa ang tungkol sa pagbibinyag para sa kapatawaran ng mga kasalanan?
Sa pisara, magdrowing ng simpleng larawan ng pinto na may susian.
Larawan
drowing ng pinto
Larawan
drowing ng susi
Para saan ginagamit ang pinto? (Habang tinatalakay ng mga estudyante ang tanong na ito, tulungan silang makita na nakalagay ang pinto sa isang bukana papasok sa isang lugar. Bukod pa riyan, ang pinto ay maaaring pumigil sa ating sa paglabas o pagpasok sa isang lugar.)
Magpakita sa mga estudyante ng mga susi (o magdrowing ng simpleng larawan ng susi sa pisara) at itanong ang sumusunod:
Ano ang kinalaman ng susi sa gamit ng pinto? (Ang susi ang nagsasara o nagbubukas ng pinto. Kapag gumamit tayo ng susi para mabuksan ang pinto, nakakapasok tayo at nakikita natin ang nasa loob.)
Ipaliwanag na ginagamit ng Panginoon ang mga susi bilang sagisag sa awtoridad ng priesthood, na nagbubukas at nagbibigay ng daan para magkaroon tayo ng walang-hanggang pagkakataon at pagpapala. Sabihin sa mga estudyante na basahing mabuti ang Doktrina at mga Tipan 13:1 at alamin ang mga susi na kaakibat ng Aaronic Priesthood. Maaari mong imungkahi sa mga estudyante na markahan ang mga susing ito sa kanilang banal na kasulatan kapag nakita nila ang mga ito.
Anong mga susi ang hawak ng Aaronic Priesthood ayon kay Juan Bautista? (Ang Aaronic Priesthood ay may hawak ng mga susi ng paglilingkod ng mga anghel, at ng ebanghelyo ng pagsisisi, at ng pagbibinyag sa pamamagitan ng paglulubog para sa kapatawaran ng mga kasalanan. Maaari mong sabihin sa isang estudyante na isulat ang pahayag na ito sa ilalim ng larawan ng pinto sa pisara.)
Upang matulungan ang mga estudyante na mas maunawaan ang mga susing ito ng Aaronic Priesthood at ang mga pagpapalang dulot nito sa mga miyembro ng Simbahan, ipabasa nang malakas sa isang estudyante ang sumusunod na paliwanag ni Elder Dallin H. Oaks ng Korum ng Labindalawang Apostol. (Maaari kang gumawa ng maliit na kopya ng pahayag na ito para mailagay ng bawat estudyante sa kanyang banal na kasulatan.)
Larawan
Elder Dallin H. Oaks
“Ano ang ibig sabihin na hawak ng Aaronic Priesthood [ang susi] ng ‘ebanghelyo ng pagsisisi at ng pagbibinyag, at ng kapatawaran ng mga kasalanan’? Ang kahulugan ay matatagpuan sa ordenansa ng binyag at sa sakramento. Ang binyag ay para sa kapatawaran ng kasalanan, at ang sakramento ay pagpapanibago ng mga tipan at mga pagpapala ng binyag. Dapat na pareho itong gawin matapos ang pagsisisi. …
“Wala ni isa sa [atin] ang nabuhay nang walang kasalanan simula nang [tayo] ay mabinyagan. Kung wala ang ilang probisyon para sa karagdagang paglilinis matapos ang ating binyag, bawat isa sa atin ay hindi magiging karapat-dapat sa mga bagay na espirituwal. …
“Tayo ay inuutusang magsisi sa ating mga kasalanan at lumapit sa Panginoon nang may bagbag na puso at nagsisising espiritu at tumanggap ng sakramento bilang pagtupad sa mga tipan nito. Kapag pinapanibago natin ang ating mga tipan sa binyag sa ganitong paraan, pinapanibago ng Panginoon ang nakalilinis na epekto ng ating binyag. …
“Hindi tayo lumalabis sa pagsasabi ng kahalagahan ng Aaronic Priesthood dito. Lahat ng mahahalagang hakbang na ito na nauukol para sa kapatawaran ng kasalanan ay isinasagawa sa pamamagitan ng nakapagliligtas na ordenansa ng binyag at ng nagpapanibagong ordenansa ng sakramento. Ang mga ordenansang ito ay isinasagawa ng mga maytaglay ng Aaronic Priesthood sa ilalim ng pamamahala ng bishopric, na gumagamit ng mga susi ng ebanghelyo ng pagsisisi at ng pagbibinyag at ng kapatawaran ng mga kasalanan” (“The Aaronic Priesthood and the Sacrament,” Ensign, Nob. 1998, 37–38).
Paano nakatutulong sa atin ang mga susi ng Aaronic Priesthood na matanggap ang mga pagpapala ng Pagbabayad-sala ni Jesucristo?
Ayon kay Elder Oaks, sino ang namamahala sa mga susi ng ebanghelyo ng pagsisisi at binyag sa bawat ward?
Upang matulungan ang mga estudyante na mas maunawaan ang susi ng paglilingkod ng mga anghel, ipabasa sa isang estudyante ang sumusunod na paliwanag ni Elder Oaks:
Larawan
Elder Dallin H. Oaks
“Noong ako ay bata pa na maytaglay ng Aaronic Priesthood, hindi ko inisip na makakakita ako ng anghel, at inisip ko kung ano kaya ang kaugnayan ng gayong pagpapakita sa Aaronic Priesthood.
“Ngunit ang paglilingkod ng mga anghel ay maaari ding hindi nakikita. Ang mga mensahe mula sa mga anghel ay maaaring ibigay sa pamamagitan ng tinig o ng kaisipan o damdamin lamang na ipinarating sa isipan” (“The Aaronic Priesthood and the Sacrament,” 39).
Sabihin sa isang estudyante na pumunta sa harapan ng klase at ipakita ang mga larawang Binatang Binibinyagan (Aklat ng Sining ng Ebanghelyo [2009], blg. 103; tingnan din sa LDS.org) at ang Pagbabasbas ng Sacrament (blg. 107), kung mayroon.
Larawan
Binatang Binibinyagan
Larawan
Pagbabasbas ng Sacrament
Paano nakaaapekto ang pag-unawa sa mga susi ng Aaronic Priesthood sa inyong iniisip o ginagawa habang naghahanda, nangangasiwa, o tumatanggap kayo ng sakramento bawat linggo?
Sabihin sa mga kabataang babae sa klase na ibahagi ang nadarama nila tungkol sa Aaronic Priesthood at ang mga pagpapalang dulot nito sa kanilang buhay. Maaari mo ring ibahagi kung bakit mahalaga sa iyo na naipanumbalik ang Aaronic Priesthood.
Sina Joseph Smith at Oliver Cowdery ay nakaranas ng mga dakilang pagpapala matapos silang mabinyagan
Ipabasa nang malakas sa isang estudyante ang Joseph Smith—Kasaysayan 1:73. Sabihin sa klase na tahimik na sumabay sa pagbasa at hanapin ang mga salita at parirala na naglalarawan sa naranasan nina Joseph at Oliver matapos silang mabinyagan. Maaari mong imungkahi sa mga estudyante na markahan ang mga salita at pariralang ito sa kanilang banal na kasulatan.
Ano ang nadama nina Joseph at Oliver matapos silang mabinyagan?
Dahil hindi pa natatanggap nina Joseph at Oliver ang kaloob na Espiritu Santo, ang nadama nila sa pagkakataong ito ay ang kapangyarihan ng Espiritu Santo. Matatanggap nina Joseph at Oliver ang Melchizedek Priesthood upang maigawad ang kaloob na Espiritu Santo kalaunan (tingnan sa Joseph Smith—Kasaysayan 1:70; tingnan din sa Bible Dictionary o Gabay sa mga Banal na Kasulatan, “Espiritu Santo,” scriptures.lds.org).
Ipabasa nang malakas sa isang estudyante ang Joseph Smith—Kasaysayan 1:74. Sabihin sa klase na tahimik na sumabay sa pagbasa at alamin ang partikular na pagpapalang tinanggap nina Joseph at Oliver sa pamamagitan ng kapangyarihan ng Espiritu Santo. Matapos maibahagi ng mga estudyante ang kanilang nalaman, isulat sa pisara ang sumusunod na doktrina: Ang Espiritu Santo ay tumutulong sa atin na maunawaan ang kahulugan at layunin ng mga banal na kasulatan.
Sa palagay ninyo, bakit kailangan natin ang Espiritu Santo para matulungan tayo na maunawaan ang mga banal na kasulatan?
Kailan kayo natulungan ng Espiritu Santo na maunawaan ang “tunay na kahulugan at layunin” ng mga banal na kasulatan?
Sabihin sa ilang estudyante na mag-ukol ng ilang minuto sa pagsusulat sa kanilang notebook o scripture study journal ng kanilang gagawin upang madama nila ang paggabay ng Espiritu Santo habang pinag-aaralan nila ang mga banal na kasulatan.
Sinabi ni Elder Dallin H. Oaks ng Korum ng Labindalawang Apostol na mahalagang nasa atin ang Espiritu kapag nag-aaral tayo ng mga banal na kasulatan:
Larawan
Elder Dallin H. Oaks
“Kung hinahangad at tinatanggap natin ang paghahayag at inspirasyon para palawakin ang ating pang-unawa sa mga banal na kasulatan, makikita natin ang katuparan ng ipinangako ni Nephi na para sa yaong mga naghahanap nang masigasig, ‘ang mga hiwaga ng Diyos ay ilalahad sa kanila, sa pamamagitan ng kapangyarihan ng Espiritu Santo’ (1 Ne. 10:19).
“… Maraming iba pang bagay na binanggit sa mga banal na kasulatan ang mauunawaan lamang sa pamamagitan ng inspirasyon ng Espiritu Santo. Tulad ng sinabi ni Apostol Pablo, ‘Ang mga bagay ng Dios ay hindi nakikilala ng sinoman, maliban lamang kung nasa kanya ang Espiritu ng Dios’ (JST, 1 Cor. 2:11). …
“Si Joseph Smith at si Oliver Cowdery ay nagpakita ng halimbawa para sa dispensasyong ito. Matapos ang kanilang binyag, sila ay napuspos ng Espiritu Santo. Pagkatapos, tulad ng ipinaliwanag ni Joseph sa kanyang personal na kasaysayan, ‘Ngayong naliwanagan na ang aming mga isipan, nagsimulang mabuksan sa aming mga pang-unawa ang mga banal na kasulatan, at ang tunay na kahulugan at layunin ng higit na mahiwaga nilang mga sipi [scripture passage] ay inihayag sa amin sa isang pamamaraan na hindi namin kailanman naabot noong una, ni hindi namin naisip ito noon’ (JS—K 1:74). …
“Tulad ng sinabi ni Pablo kay Timoteo, ‘lahat ng mga kasulatan [ay] kinasihan ng Diyos’ (II Tim. 3:16; tingnan din sa II Ped. 1:21). Ibig sabihin nito, para maunawaan ang banal na kasulatan, kailangang maliwanagan ang ating isipan ng Espiritu ng Panginoon” (“Scripture Reading and Revelation,” Ensign, Ene. 1995, 7, 9).
Doktrina at mga Tipan 13:1. Ano ang ibig sabihin ng ang mga anak na lalaki ni Levi ay nag-alay ng handog sa Panginoon?
Ibinigay ni Propetang Joseph Smith ang sumusunod na paliwanag tungkol sa sakripisyong ihahandog ng mga anak na lalaki ni Levi:
Larawan
Propetang Joseph Smith
“Inaakala ng karamihan na tuluyan nang lumipas ang pagsasakripisyo nang ang Dakilang Sakripisyo [ibig sabihin ang sakripisyo ng Panginoong Jesucristo] ay inialay na, at hindi na kailangan pang magkaroon ng ordenansa ng sakripisyo sa hinaharap: ngunit tiyak na hindi nababatid ng mga naniniwala rito ang mga tungkulin, karapatan at awtoridad ng priesthood, o ng mga Propeta.
“Ang pag-aalay ng sakripisyo noon pa man ay kaugnay at bahagi ng mga tungkulin ng Priesthood. Nagsimula ito sa Priesthood, at magpapatuloy hanggang sa matapos ang pagparito ni Cristo, sa paglipas ng mga henerasyon. …
“Kapag ang Templo ng Panginoon ay naitayo na at ang mga anak na lalaki ni Levi ay nadalisay, ang mga sakripisyong ito, gayundin ang lahat ng ordenansa ng Priesthood, ay ganap na ipapanumbalik at gagamitin kalakip ang lahat ng kapangyarihan, bahagi, at mga pagpapala nito. Ito ay umiral noon at walang katapusang iiral kapag ang mga kapangyarihan ng Melchizedek Priesthood ay naipahayag na; kung hindi magkagayon paano maisasagawa ang panunumbalik ng lahat ng bagay na binanggit ng mga banal na Propeta? Hindi dapat ipalagay na ang batas ni Moises ay itatatag muli kalakip ang lahat ng ritwal at iba-ibang seremonya nito; hindi ito kailanman binanggit ng mga Propeta, ngunit ang mga bagay na umiral na bago pa man dumating ang panahon ni Moises, tulad ng pagsasakripisyo, ay ipagpapatuloy pa rin” (History of the Church, 4:211–12).
Ipinaliwanag pa ni Pangulong Joseph Fielding Smith:
Larawan
Pangulong Joseph Fielding Smith
“Nabubuhay tayo sa dispensasyon ng kaganapan ng panahon kung kailan ang lahat ng bagay ay titipunin, at lahat ng bagay ay ipanunumbalik mula sa simula. Maging ang mundong ito ay manunumbalik sa dating kalagayan bago ang paglabag ni Adan. Ngayon sa likas na katangian ng mga bagay, ang batas ng sakripisyo ay kailangang ipanumbalik, dahil kung hindi magkagayon, ang lahat ng bagay na iniutos ng Panginoon ay hindi maipanunumbalik. Kinakailangan, kung gayon, na ang mga anak ni Levi, na nag-alay ng dugo [ng hayop] noong unang panahon sa Israel, ay mag-alay muli ng gayong paghahandog para maging lubos at ganap ang ordenansang ito sa dispensasyong ito. Ang pagsakripisyo sa pamamagitan ng pagpapadanak ng dugo ay pinasimulan sa mga araw ni Adan at kinailangang ibalik na muli.
“Ang pagsasakripisyo ng mga hayop ay gagawin upang kumpletuhin ang panunumbalik sa sandaling maitayo na ang nabanggit na templo; sa simula ng milenyo, o sa panunumbalik, ang pag-aalay ng dugo [ng hayop] ay isasagawa bago lubusang maganap ang kabuuan ng panunumbalik sa dispensasyong ito. Pagkatapos niyan ang pagsasakripisyo ay may iba nang kahulugan” (Doctrines of Salvation, ed. Bruce R. McConkie [1956], 3:94).
Ipinaliwanag ni Elder Bruce R. McConkie na ang mga paghahayag ng Diyos ay tumutukoy sa mga susi sa dalawang paraan:
Larawan
Elder Bruce R. McConkie
“Ang dalawang magkaibang paggamit sa mga katagang mga susi ay matatagpuan sa mga paghahayag. Ang isa ay tumutukoy sa kapangyarihan sa pamamahala na ginagamit upang ang Simbahan o kaharian at lahat ng organisasyon nito ay mapamahalaan, ang mga susi ng kaharian na mga kapangyarihan ng panguluhan. Ang iba pang paggamit nito ay tumutukoy sa mga paraan na ibinigay kung saan ang isang bagay ay inihayag, natuklasan, o ipinaalam” (Mormon Doctrine, Ika-2 ed. [1966], 409–10).
Ipinahayag ni Elder Dallin H. Oaks ng Korum ng Labindalawang Apostol ang sumusunod na kaalaman tungkol sa susi ng paglilingkod ng mga anghel:
Larawan
Elder Dallin H. Oaks
“Sa magkakaugnay na paraan, ang mga ordenansa ng Aaronic Priesthood ay mahalaga rin sa paglilingkod ng mga anghel.
“‘Ang salitang “anghel” ay ginagamit sa mga banal na kasulatan para sa sinumang nilalang sa langit na naghahatid ng mensahe ng Diyos’ (George Q. Cannon, Gospel Truth, sel. Jerreld L. Newquist [1987], 54). Nakatala sa mga banal na kasulatan ang napakaraming pagkakataon na personal na nagpakita ang isang anghel. …
“Ngunit ang paglilingkod ng mga anghel ay maaari ding hindi nakikita. Ang mga mensahe ng anghel ay ibinibigay sa pamamagitan ng tinig o ng kaisipan o damdamin lamang na ipinarating sa isipan. …
“… Karamihan sa pakikipag-ugnayan ng anghel ay nadarama o naririnig sa halip na nakikita.
“Paano nahahawakan ng Aaronic Priesthood ang susi sa paglilingkod ng mga anghel? Ang sagot ay tulad din ng ginagawa para madama ang Espiritu ng Panginoon.
“Sa pangkalahatan, ang mga pagpapala ng espirituwal na patnubay at komunikasyon ay matatamo lamang ng mga taong nalinis mula sa kasalanan. Tulad ng ipinaliwanag kanina, sa pamamagitan ng mga ordenansa ng Aaronic Priesthood na binyag at sakramento, tayo ay nalinis sa ating mga kasalanan at pinangakuan na kung tutuparin natin ang ating mga tipan, mapapasaatin palagi ang Kanyang Espiritu. Naniniwala ako na ang pangakong iyan ay hindi lamang tumutukoy sa Espiritu Santo kundi sa paglilingkod ng mga anghel, sapagkat ‘ang mga anghel ay nagsasalita sa pamamagitan ng kapangyarihan ng Espiritu Santo; anupa’t, nangungusap sila ng mga salita ni Cristo’ (2 Nephi 32:3). Kaya nga ang mga maytaglay ng Aaronic Priesthood ay nagbubukas ng pinto para sa lahat ng miyembro ng Simbahan na karapat-dapat na tumanggap ng sakramento upang matamasa ang paggabay ng Espiritu ng Panginoon at ang paglilingkod ng mga anghel. …
“Ang Aaronic Priesthood ang may hawak ng mga susi ng ‘ebanghelyo ng pagsisisi at ng pagbibinyag, at ang kapatawaran ng mga kasalanan’ (D at T 84:27). Ang nakalilinis na kapangyarihan ng Pagbabayad-sala ng ating Tagapagligtas ay pinapanibago para sa atin kapag tumatanggap tayo ng sakramento. Ang pangako na ‘nang sa tuwina ay mapasa[atin] ang kanyang Espiritu upang makasama [natin]’ (D at T 20:77) ay mahalaga sa ating espirituwalidad. Ang mga ordenansa ng Aaronic Priesthood ay mahalaga sa lahat ng ito” (“The Aaronic Priesthood and the Sacrament,” Ensign, Nob. 1998, 38–40).
Ipinaliwanag ni Pangulong Gordon B. Hinckley ang paglilingkod ng mga anghel sa ganitong paraan:
Larawan
Pangulong Gordon B. Hinckley
“Noong si Wilford Woodruff, isang lalaking may edad na at marami nang naranasan sa buhay, ay Pangulo ng Simbahan, sinabi niya sa mga batang lalaki ng Aaronic Priesthood: ‘Nais kong ikintal sa inyong isipan ang katotohanan na walang pagkakaiba kung ang isang lalaki man ay isang Priest o isang Apostol, kung ginagampanan niya ang kanyang tungkulin. Hawak ng katungkulan ng Priest ang mga susi ng paglilingkod ng mga anghel,’ sabi niya. ‘Hindi ko pa kailanman nadama sa buhay ko, bilang Apostol, bilang Pitumpu, o bilang isang Elder, ang higit na proteksyon ng Panginoon kaysa noong hawak ko pa ang katungkulan ng isang Priest.’ Millennial Star, 53:629.)
Isipin ninyo ito, mahal kong mga batang kapatid. Ang priesthood na ito na hawak ninyo ay nagtataglay ng mga susi ng paglilingkod ng mga anghel. Ibig sabihin, tulad ng pagkaunawa ko rito, na kung kayo ay namumuhay nang karapat-dapat sa priesthood, may karapatan kayong matanggap at matamasa ang mismong kapangyarihan ng mga nilalang sa langit upang gabayan, protektahan, at pagpalain kayo. Sinong batang lalaki, kung siya ay mapag-isip, ang hindi matutuwang tanggapin ang pambihirang pagpapalang ito?” (“The Priesthood of Aaron,” Ensign, Nob. 1982, 45).