Noong 1830, nagkaproblema si Propetang Joseph Smith dahil hindi maunawaan ng mga miyembro ng Simbahan ang pamamaraan ng paghahayag sa Simbahan. Ayon kay Hiram Page nakatanggap siya ng paghahayag para sa Simbahan sa pamamagitan ng isang espesyal na bato, at ilang miyembro ng Simbahan, kabilang na si Oliver Cowdery, ang naniwala sa kanya. Bago maganap ang pagpupulong noong Setyembre 26, 1830, inihayag ng Panginoon ang mga katotohanan na nakatulong para maunawaan ni Oliver Cowdery at ng iba ang pamamaraan ng paghahayag sa Simbahan.
Ipinahayag ng Panginoon na ang Pangulo ng Simbahan ang tanging tao na makatatanggap ng paghahayag para sa buong Simbahan
Isulat ang panggagaya sa pisara.
Ano ang ilang halimbawa ng mga bagay na hindi tunay o panggagaya lamang? (Bilang bahagi ng talakayang ito, maaari kang magdipsley ng aytem na ginaya lang, tulad ng kinopyang artwork, pera-perahan, o plastik na prutas.)
Bakit maaaring nakakasama na mapagkamalang tunay ang isang ginaya lang?
Ipabasa nang malakas sa isang estudyante ang sumusunod na babala ni Elder Dallin H. Oaks ng Korum ng Labindalawang Apostol:
Larawan
Elder Dallin H. Oaks
“Ang diyablo ang ama ng kasinungalingan, at laging gusto niyang biguin ang gawain ng Diyos sa pamamagitan ng kanyang mga tusong panggagaya” (“Dalawang Linya ng Pakikipag-ugnayan,” Ensign o Liahona, Nob. 2010, 84).
Ipabasa nang malakas sa isang estudyante ang pambungad ng Doktrina at mga Tipan 28. Sabihin sa klase na tahimik na sumabay sa pagbasa at alamin ang panggagaya ni Satanas para linlangin ang ilang unang miyembro ng Simbahan.
Ano ang panggagayang ginawa ni Satanas para linlangin ang mga miyembro ng Simbahan? (Kung hindi binanggit ng mga estudyante ang pagkakatulad ng bato ni Hiram at ng Urim at Tummim na ginamit ni Joseph Smith, ipaliwanag ang pagkakatulad na ito.)
Ipaliwanag na pinaniwalaan ng ilang miyembro ng Simbahan ang mga huwad na paghahayag na sinabi ni Satanas kay Hiram Page. Sa pag-aaral at pagtalakay ng mga estudyante ng paghahayag sa Doktrina at mga Tipan 28, hikayatin silang alamin ang mga katotohanang makatutulong sa kanila na makaiwas na mailigaw ng mga panlilinlang ni Satanas. Sabihin sa mga estudyante na isusulat mo ang mga katotohanang ito sa pisara kapag natuklasan nila ang mga ito sa buong lesson. Maaari mong imungkahi sa mga estudyante na isulat ang mga katotohanang ito sa margin ng kanilang banal na kasulatan.
Ipabasa nang malakas sa isang estudyante ang Doktrina at mga Tipan 28:1–4 at sabihin sa klase na alamin kung paano naiiba ang mga responsibilidad ni Oliver Cowdery sa Simbahan sa mga responsibidad ni Joseph Smith.
Paano naiiba ang mga responsibilidad ni Oliver Cowdery sa mga responsibilidad ni Joseph Smith? (Si Joseph ay may responsibilidad na tumanggap ng mga kautusan at paghahayag para sa Simbahan. Si Oliver ay may responsibilidad na magturo sa pamamagitan ng Mang-aaliw tungkol sa mga kautusan at paghahayag na tinangggap ni Joseph.)
Anong mahalagang katotohanan tungkol sa Pangulo ng Simbahan ang matututuhan natin mula sa Doktrina at mga Tipan 28:2? (Dapat matukoy ng mga estudyante ang sumusunod na doktrina: Ang Pangulo ng Simbahan ang tanging tao na makatatanggap ng paghahayag para sa buong Simbahan. Isulat ang pahayag na ito sa pisara.)
Paano makatutulong sa atin ang katotohanang ito para maiwasan ang panlilinlang?
Habang tinatalakay ng mga estudyante ang mga tanong na ito, maaari mong tiyakin sa kanila na lagi nating mapagkakatiwalaan ang mga turo at payo ng Pangulo ng Simbahan dahil hindi hahayaan ng Panginoon na iligaw tayo ng Pangulo [ng Simbahan]. (Pansinin na ang pangakong ito ay makikita sa pahayag ni Pangulong Wilford Woodruff. Ang pahayag na iyan ay kasama sa Doktrina at mga Tipan, sa suplementong materyal kasunod ng Opisyal na Pahayag 1.)
Ipaliwanag na bago ihayag ng Panginoon ang mga katotohanang nakatala ngayon sa Doktrina at mga Tipan 28, may ginawa si Oliver Cowdery na nagpapakita na hindi pa niya ganap na nauunawaan ang mga pagkakaiba ng kanyang mga responsibilidad sa Simbahan at ng mga responsibilidad ni Joseph Smith bilang Pangulo ng Simbahan. Ipabasa sa isang estudyante ang sumusunod na tala:
Kasalukuyang nakatira noon sa Harmony, Pennsylvania si Joseph Smith nang makatanggap siya ng liham mula kay Oliver Cowdery, na nasa Fayette, New York, mga 100 milya (160 kilometro) ang layo. Sinabi ni Oliver na may natuklasan siyang pagkakamali sa paghahayag na tinatawag na natin ngayon na Doktrina at mga Tipan 20. Isinulat ni Oliver: “Iniuutos ko sa iyo sa pangalan ng Diyos na burahin mo ang mga salitang iyon.” Nagpunta si Joseph sa Fayette at nalaman niya na sumang-ayon ang pamilya Whitmer kay Oliver tungkol sa ipinapalagay na pagkakamali sa paghahayag. Isinulat ni Joseph, “Hindi naging madali para sa akin na sikaping mahinahon na mapaliwanagan ang sinuman sa kanila tungkol sa bagay na iyon.” Sa huli, “nagawa [ng Propeta] na maipaunawa hindi lamang sa pamilya Whitmer, kundi … pati na rin kay Oliver Cowdery na nagkamali sila” (Histories, Volume 1: 1832–1844, vol. 1 of the Histories series of The Joseph Smith Papers [2012], 426; tingnan din sa mga pahina 424–25).
Sabihin sa mga estudyante na basahin nang tahimik ang Doktrina at mga Tipan 28:6–7 at alamin ang tagubilin ng Panginoon kay Oliver Cowdery.
Ano ang itinuro ng Panginoon kay Oliver Cowdery? (Matapos sumagot ang mga estudyante, isulat sa pisara ang sumusunod na doktrina: Sa Simbahan ni Jesucristo, ang mga indibidwal ay hindi tatanggap ng paghahayag para sa taong namumuno sa kanila.)
Paano nauugnay ang katotohanang ito sa talang kababasa lamang natin?
Tinawag ng Panginoon si Oliver Cowdery upang ipangaral ang ebanghelyo sa mga Lamanita
Ipabasa nang malakas sa isang estudyante ang Doktrina at mga Tipan 28:8–10 at sabihin sa klase na alamin ang ipinagawa ng Panginoon kay Oliver Cowdery.
Ano ang ipinagawa ng Panginoon kay Oliver? (Ipangaral ang ebanghelyo sa mga Lamanita.)
Ano ang matututuhan natin tungkol sa personal na paghahayag mula sa Doktrina at mga Tipan 28:8? (Matapos sumagot ang mga estudyante, isulat sa pisara ang sumusunod na alituntunin: Maaari tayong makatanggap ng paghahayag para sa ating kapakinabangan at upang matulungan tayo sa mga tungkulin at gawaing ibinigay sa atin.)
Upang matulungan ang mga estudyante na maunawaan ang alituntuning ito, ipabasa nang malakas sa isang estudyante ang sumusunod na pahayag ni Pangulong Boyd K. Packer ng Korum ng Labindalawang Apostol:
Larawan
Pangulong Boyd K. Packer
“Tayo ay may karapatan sa personal na paghahayag. Gayunman, kung hindi tayo itatalaga sa ilang katungkulan sa pamumuno, hindi tayo tatanggap ng mga paghahayag tungkol sa dapat gawin ng iba. …
“Ang di-pangkaraniwang espirituwal na karanasan ay hindi dapat ituring na personal na tawag na pamahalaan ang iba. Naniniwala ako na ang mga espesyal at sagradong karanasan ay pribado at dapat sarilinin” (“Revelation in a Changing World,” Ensign, Nob. 1989, 14–15).
Bago magklase, isulat ang mga sumusunod na responsibilidad at mga tungkulin sa magkakahiwalay na piraso ng papel: magulang, General Authority, bishop, missionary, Sunday School teacher, Mia Maid president, home teacher, visiting teacher. Ilagay ang mga piraso ng papel sa isang sisidlan.
Sabihin sa mga estudyante na pumili ng mga papel mula sa lalagyan at basahin ang mga ito sa klase, nang isa-isa. Habang binabasa ang bawat nakasulat sa papel, sabihin sa mga estudyante na magmungkahi ng uri ng mga paghahayag na matatanggap ng mga indibiduwal para matulungan sila na magawa ang responsibilidad o tungkuling iyon.
Maaari mong anyayahan ang mga estudyante na magbahagi ng mga karanasan kung saan nakatanggap sila ng paghahayag tungkol sa isang gawain o responsibilidad. Maaari ka ring magbahagi ng karanasan tungkol sa paghahayag na ibinigay sa iyo para matulungan ka sa iyong tungkulin o gawain. Paalalahanan ang mga estudyante na may mga karanasan na napakasagrado o napakapersonal para ibahagi.
Hikayatin ang mga estudyante na manalangin na makatanggap ng paghahayag na tutulong sa kanilang personal na buhay at sa mga tungkulin at gawain sa Simbahan. Hikayatin din sila na manalangin na mabigyan ang mga lider ng Simbahan ng magandang kalusugan at kaligtasan at ng inspirasyon na kailangan nila para magawa ang kanilang mga responsibilidad.
Tinagubilinan ng Panginoon si Oliver Cowdery na itama si Hiram Page at tumulong na maisaayos ang Simbahan
Ipaalala sa mga estudyante ang mga huwad na paghahayag na sinabi ni Hiram Page sa ilang miyembro ng Simbahan. Ipabasa nang tahimik sa mga estudyante ang Doktrina at mga Tipan 28:11–14 para malaman ang ipinagawa ng Panginoon kay Oliver Cowdery para malutas ang problemang ito.
Ano ang ipinagawa ng Panginoon kay Oliver para makatulong sa paglutas ng problema kay Hiram Page?
Ano ang matututuhan natin mula sa mga talatang ito tungkol sa mga responsibilidad ng mga lider ng Simbahan? (Maaaring iba-ibang alituntunin ang matukoy ng mga estudyante, ngunit tiyaking bigyang-diin ang sumusunod na alituntunin: Responsibilidad ng mga lider ng Simbahan na ituwid ang mga taong inililigaw ang iba. Isulat sa pisara ang alituntuning ito.)
Ano ang matututuhan natin mula sa Doktrina at mga Tipan 28:13 tungkol sa paraan ng pamamahala ng Panginoon sa Kanyang Simbahan? (Maaaring iba-iba ang gamiting salita ng mga estudyante, ngunit tiyaking matutukoy nila ang sumusunod na alituntunin: Sa Simbahan ni Jesucristo, ang lahat ng bagay ay dapat isagawa nang may kaayusan. Isulat sa pisara ang alituntuning ito.)
Ipaliwanag na isang paraan ng pagsasagawa natin ng mga bagay “nang may kaayusan, at sa pamamagitan ng pangkalahatang pagsang-ayon” ay ang hayagang pagsuporta sa mga tao sa kanilang mga tungkulin sa Simbahan.
Sa inyong palagay, bakit mahalagang hayagang sinasang-ayunan o sinusuportahan ang mga indibidwal sa kanilang mga tungkulin?
Upang matulungan ang klase na maunawaan kung paano nagbibigay ng kaayusan at proteksyon ang pagkalahatang pagsang-ayon, ipabasa sa isang estudyante ang sumusunod na pahayag ni Pangulong Packer:
Larawan
Pangulong Boyd K. Packer
“Dumarating ang paghahayag sa Simbahan sa mga taong tinawag nang wasto, sinang-ayunan, inordenan, o itinalaga. Ang bishop, halimbawa, ay hindi tatanggap ng anumang paghahayag hinggil sa isang kalapit na ward, dahil hindi iyon saklaw ng kanyang nasasakupan.
“Paminsan-minsan may isang magsasabi na tumanggap siya ng awtoridad na magturo at magbasbas nang hindi natatawag at naitatalaga. …
“Kaya nga ang proseso ng pagsang-ayon sa mga yaong natawag sa katungkulan ay pinoprotektahan nang husto sa Simbahan—nang malaman ng lahat kung sino ang may awtoridad na magturo at magbasbas” (“Revelation in a Changing World,” 15).
Ayon kay Pangulong Packer, bakit hayagan nating sinasang-ayunan ang mga tumatanggap ng mga tungkulin sa Simbahan?
Matapos nating itaas ang ating mga kamay para maipakita na sasang-ayunan natin ang mga tao sa kanilang mga tungkulin, ano ang dapat nating gawin para talagang masang-ayunan o masuportahan natin sila?
Upang matulungan ang mga estudyante na maipamuhay ang mga alituntunin na natutuhan nila sa lesson ngayon, ipabasa nang malakas ang sumusunod na mga sitwasyon at sabihin sa kanila kung paano nila tutugunin ang bawat isa:
Tumanggap kayo ng mensahe mula sa internet na nagsasabing ito raw ay bagong paghahayag. Naglalaman ito ng mga turo na hindi nakaayon sa mga banal na kasulatan at sa mga salita ng mga buhay na propeta.
Napansin ninyo na isang miyembro ng inyong ward ang nagbigay ng mensahe na salungat sa doktrina habang nagpapatotoo siya sa sacrament meeting. Nag-aalala kayo na kung aakalain ng iba na totoo ang mensahe, malamang na magkaroon ito ng masamang epekto sa kanila. Sino ang dapat magtuwid sa miyembro na mali ang mga sinabi?
Ipabasa nang malakas sa isang estudyante ang Doktrina at mga Tipan 28:15–16 at sabihin sa klase na alamin ang huling ipinayo ng Panginoon kay Oliver Cowdery sa paghahayag na ito.
Ipaliwanag na matapos matanggap ni Joseph Smith ang paghahayag na ito, nagdaos siya ng kumperensya at inilagay sa kaayusan ang Simbahan. Sa kumperensya, “Si Brother Page, gayundin ang mga miyembro ng Simbahan na naroon, ay iwinaksi na ang nasabing bato at lahat ng bagay na may kaugnayan dito” (Histories, Volume 1: 1832–1844, 452). Maaari mong tapusin ang lesson na ito sa pagpapatotoo tungkol sa mga katotohanang tinalakay ninyo at ang mahalagang maitutulong nito upang hindi tayo mailigaw.
Binigyan ng Panginoon si Oliver Cowdery ng mga responsibilidad bukod pa sa mga nakalista sa Doktrina at mga Tipan 28:1–4. Hawak nina Oliver Cowdery at Joseph Smith ang mga susi ng kaloob na maisalin ang Aklat ni Mormon (tingnan sa D at T 6:25–28). Si Oliver ay naglingkod din “bilang apostol ni Jesucristo” at “pangalawang elder ng simbahan” (D at T 20:3).
Sa isang paghahayag kay Propetang Joseph Smith, sinabi ng Panginoon kay Oliver Cowdery na tanging ang Pangulo ng Simbahan ang “tumatanggap ng mga kautusan at paghahayag” para sa buong Simbahan (tingnan sa D at T 28:1–2). Sinabi rin ng Panginoon na si Oliver Cowdery ay “makatatanggap ng mga paghahayag” sa kanyang partikular na mga responsibilidad (tingnan sa D at T 28:8). Itinuro ni Elder Dallin H. Oaks ng Korum ng Labindalawang Apostol ang pagkakaugnay ng personal na paghahayag at ang mga paghahayag na ibinibigay sa pamamagitan ng mga priesthood leader:
Larawan
Elder Dallin H. Oaks
“Nagbigay ang ating Ama sa Langit sa Kanyang mga anak ng dalawang linya ng pakikipag-ugnayan sa Kanya—na matatawag nating personal na linya at ang linya ng priesthood. Lahat ay dapat makaunawa at magabayan nitong dalawang mahahalagang linya ng pakikipag-ugnayan. …
“Sa kabuuan ang personal na linya ay hindi gumagana kung walang linya ng priesthood. Ang kaloob na Espiritu Santo—ang paraan ng pakikipag-ugnayan ng Diyos sa tao—ay ipinagkakaloob ng awtoridad ng priesthood, ayon sa pahintulot ng mga mayhawak ng mga susi ng priesthood. …
“… Sa kasamaang-palad, karaniwan na sa mga taong lumalabag sa mga utos ng Diyos o hindi sumusunod sa payo ng kanilang mga priesthood leader na sabihing inihayag ng Diyos sa kanila na may katwiran silang huwag sundin ang ilang utos o payo. Ang mga taong iyon ay maaaring tumatanggap ng paghahayag o inspirasyon, ngunit hindi nanggaling sa inaakala nilang pinagmulan nito. Ang diyablo ang ama ng kasinungalingan, at laging gusto niyang biguin ang gawain ng Diyos sa pamamagitan ng kanyang mga tusong panggagaya” (“Dalawang Linya ng Pakikipag-ugnayan,” Ensign o Liahona, Nob. 2010, 83–84).
Pinatotohanan ni Pangulong James E. Faust ng Unang Panguluhan na ang Pangulo ng Simbahan ang tanging tao na makatatanggap ng paghahayag para sa buong Simbahan. Ipinaliwanag niya kung paano ito nagbibigay ng kaayusan at proteksyon para sa mga Banal sa mga Huling Araw:
Larawan
Pangulong James E. Faust
“Sinasabi ng ilan na nag-aangkin sila ng mas mataas na espirituwal na kaloob o awtoridad na hindi nagmumula sa itinatag na awtoridad ng priesthood ng Simbahan. Sinasabi nila na sila ay naniniwala sa mga alituntunin at ordenansa ng ebanghelyo at tinatanggap ang Pangulo ng Simbahan bilang legal na tagapangasiwa niyon, subalit sinasabi nila na may mas mataas na antas sila ng awtoridad na hindi taglay ng Pangulo [ng Simbahan]. Ito ay madalas ginagawa upang pangatwiranan ang isang aktibidad na hindi ayon sa mga doktrina ng Simbahan. Gayunpaman, walang nakatataas na antas dahil ang Pangulo ng Simbahan ang humahawak at gumagamit ng lahat ng mga susi ng kaharian ng Diyos sa lupa. Sinabi ng Panginoon hinggil sa Pangulo ng Simbahan na ‘walang ibang itinalaga [na tumanggap ng mga kautusan at paghahayag] maliban sa ito ay sa pamamagitan niya.’ (D at T 43:4). …
“… Ang patuloy na paghahayag at pamumuno sa Simbahan ay dumarating sa pamamagitan ng Pangulo ng Simbahan, at hindi niya ililigaw kailanman ang mga Banal” (“The Prophetic Voice,” Ensign, Mayo 1996, 6–7).
Itinuro ni Propetang Joseph Smith na ang mga indibidwal ay hindi tatanggap ng paghahayag para tagubilinan ang isang taong namumuno sa kanila:
Larawan
Propetang Joseph Smith
“Salungat sa pamahalaan ng Diyos na ang sinumang miyembro ng Simbahan, o sinuman na makatanggap ng tagubilin para sa mga taong may awtoridad na mas mataas kaysa sa kanila” (Mga Turo ng mga Pangulo ng Simbahan: Joseph Smith [2007], 229).
Ang mga katagang mga Lamanita ay tumutukoy sa isang grupo ng mga tao sa Aklat ni Mormon, na karamihan ay mga inapo ni Laman, na panganay na anak ni Lehi. Ang paggamit ng Panginoon ng mga katagang mga Lamanita sa Doktrina at mga Tipan 28:9 ay nagsasaad na ilan sa mga inapo ni Lehi ay ang mga American Indian, na noong panahong iyon, ay nakatira sa dating itinuturing na kanluraning hangganan ng Estados Unidos. Noong Mayo 1830, ipinasa ng United States Congress ang Indian Removal Bill, na nag-utos sa mga American Indian na lumipat sa federal Indian Territory sa kanluran ng estado ng Missouri. Dahil dito, si Oliver Cowdery at ang kanyang mga kasama ay naglakbay sa kanlurang Missouri, “sa mga hangganan ng mga Lamanita” (D at T 28:9), upang ituro ang ebanghelyo sa mga American Indian.
Hindi ipinapahayag ng Aklat ni Mormon na nagmula lamang sa pamilya ni Lehi ang mga American Indian. Sinabi ni Pangulong Anthony W. Ivins ng Unang Panguluhan:
Larawan
Pangulong Anthony W. Ivins
“Dapat maging maingat tayo sa paggawa ng mga konklusyon. Itinuturo sa Aklat ni Mormon ang kasaysayan ng tatlong magkakaibang grupo ng mga tao … na nagmula sa lumang daigdig [old world] at nagpunta sa kontinenteng ito. Hindi nito sinasabi na walang taong nauna sa kanila [sa kontinenteng ito]. Hindi nito sinasabi sa atin na walang mga taong nagsipunta rito matapos manirahan dito [ang mga tao sa Aklat ni Mormon]. At kaya kung mayroon mang mga natuklasan na nagsasabi ng pagkakaiba-iba sa lahing pinagmulan, maituturing ngang gayon ito, at makatwiran, dahil naniniwala tayo na may iba pang mga tao na nagsipunta sa kontinenteng ito” (sa Conference Report, Abr. 1929, 15).
Sa kanlurang New York noong mga unang taon ng 1800s, maraming tao ang naniwala na maaaring tumanggap ang mga tao ng kahima-himalang kaalaman sa pamamagitan ng kagamitang tulad ng isang bato o divining rod (bakal na hugis titik Y). Sinabi ni Hiram Page na may lalabas na mga salita sa batong angkin niya. Sinabi niya na matapos niyang idikta ang mga salita at ipakopya ito sa papel, ang mga salita sa bato ay mawawala at ibang mga salita ang lilitaw (tingnan sa Documents: Volume 1: July 1828-June 1831, vol. 1 of the Documents series of The Joseph Smith Papers [2013], 184). Kinundena ng Panginoon ang huwad na paghahayag ni Hiram Page. Bukod sa Urim at Tummim, maaaring gumamit din si Joseph ng bato ng tagakita na natagpuan niya noong kanyang kabataan para isalin ang bahagi ng Aklat ni Mormon. May ilang haka-haka tungkol sa kung paano ginamit ng Propeta ang Urim at Tummim upang isalin ang Aklat ni Mormon at tungkol sa iba pang detalye sa proseso ng pagsasalin, ngunit sinabi ni Elder Neal A. Maxwell ng Korum ng Labindalawang Apostol, “Hindi natin alam ang mga detalye” (“By the Gift and Power of God,” Ensign, Ene. 1997, 39). Ang isang napakahalagang pagkakaiba kina Joseph Smith at Hiram Page ay ang pagtawag ng Diyos kay Joseph Smith upang isagawa ang pagsasalin at tumanggap ng paghahayag para sa Simbahan (tingnan sa D at T 21:1–6). Sa kabilang banda, malinaw na inihayag ng Panginoon na nilinlang ni Satanas si Hiram Page at ang mga naniwala sa mga salitang idinikta niya (tingnan sa D at T 28:11).
Binalaan tayo ni Pangulong James E. Faust ng Unang Panguluhan na iwasan natin ang mga aktibidad na magiging dahilan para maimpluwensyahan ni Satanas ang ating buhay:
Larawan
Pangulong James E. Faust
“Hindi magandang pag-usapan si Satanas. Tingin ko’y mahusay siyang magpanggap. …
“Hindi magandang ugali ang maging interesado kay Satanas at sa kanyang mga kababalaghan. Walang mabuting ibubunga ang paglapit sa kasamaan. Kagaya ng paglalaro ng apoy, napakadaling madarang. … Ang tanging ligtas na gawin ay lumayo nang husto sa kanya at sa anuman sa kanyang kasamaan o kriminalidad. Ang kasalanang pagsamba sa diyablo, pangkukulam, panggagaway, voodoo, engkanto, mahika negra, at lahat ng iba pang anyo ng kademonyohan ay dapat iwasang lagi” (“Ang mga Puwersang Magliligtas sa Atin,” Liahona, Ene. 2007, 3).