Moises

Ti propeta iti Daan a Tulag a nangidaulo kadagiti Israelita a rimmuar iti panangadipen dagiti Egipto ket inikkanna ida iti paglintegan iti relihion, gimong, ken panagtimbeng kas impalgak ti Dios.

Immabot ti naespirituan a panagserbi ni Moises iti labes ti biagna ditoy daga. Insuro ni Joseph Smith a, kaduana ni propeta Elias, nakadanon iti Bantay a Pagbalbaliwan ket intedna dagiti tulbek ti kinasaserdote kada Pedro, Santiago, ken Juan (Mat. 17:3–4; Mar. 9:4–9; Luc. 9:30; DkK 63:21).

Nagparang ni Moises kada Joseph Smith ken Oliver Cowdery idi 3 Abril 1836, idiay templo ti Kirtland, Ohio, ket intedna kadakuada dagiti tulbek ti pannakaummong ti Israel (DkK 110:11).

Adu ti ibaga ti ud-udina a paltiing maipanggep ken ni Moises. Masansan a maagapad iti Libro ni Mormon, ken manipud iti Doktrina ken Katulagan maadaltayo ti maipanggep iti naespirituan a panagserbina (DkK 84:20–26) ken inawatna ti kinasaserdotena iti katuganganna, ni Jetro (DkK 84:6).

Paneknekan pay ti paltiing iti ud-udina nga aldaw ti pasamak iti Biblia maipanggep iti naespirituan a panagserbina kadagiti annak ti Israel ken ipatalgedna pay nga isu ti nangsurat kadagiti lima a libro a nangrugi iti Daan a Tulag (1 Ne. 5:11; Moises 1:40–41).

Insalakan ti anak a babai ni Faraon, Ex. 2:1–10.
Nagkamang iti Midian, Ex. 2:11–22.
Nagparang kenkuana ti anghel ti Apo a kas maysa a gil-ayab nga apuy, Ex. 3:1–15.
Impakdaarna ti angol a dumtengto kadagiti Egipsio, Ex. 7–11.
Inrugi ti Apo ti Paskua, Ex. 12:1–30.
Indauluanna dagiti annak ti Israel a bumallasiw iti Nalabaga a Baybay, Ex. 14:5–31.
Nangipatulod ti Apo iti mana iti disierto, Ex. 16.
Binaotna ti bato iti Horeb ket pimsuak ti danum, Ex. 17:1–7.
Intag-ay da Aaron ken Hur ti imana tapno abaken ni Josue ni Amulek, Ex. 17:8–16.
Binagbagaan ni Jetro, Ex. 18:13–26.
Insaganana dagiti tao para iti panagparang ti Apo iti bantay Sinai, Ex. 19.
Impalgak kenkuana ti Apo dagiti Sangapulo a Bilin, Ex. 20:1–17.
Nakitada kadagiti pitopulo nga elder ti Dios, Ex. 24:9–11.
Dinadaelna ti lamisaan ti pammaneknek ken binurakna ti balitok a baka, Ex. 32:19–20.
Nakisao iti Dios iti rupanrupa, Ex. 33:9–11.

Ti libro ni Moises

Ti libro iti Perlas a Kapatgan a naglaon iti makaparegta a patarus ni Joseph Smith kadagiti umuna a pito a kapitulo ti Genesis.

Naisurat iti kapitulo 1 ti parmata a nakakitaan ni Moises iti Dios, a nangipalgak kenkuana ti sibubukel a plano ti pannakaisalakan. Pakaammo dagiti kapitulo 2–5 iti Pannakaparsua ken pannakatnag ti tao. Linaon dagiti kapitulo 6–7 ti parmata maipanggep ken ni Enoc ken ti naespirituan a panagserbina iti daga. Linaon ti kapitulo 8 ti parmata maipanggep ken ni Noe ken ti dakkel a layus.

Dagiti lima a libro ni Moises

Am-ammo a kas libro ni Moises dagiti umuna a lima a libro iti Daan a Tulag. Linaon dagiti pinanid a gambang nga innala ni Nephi ken ni Laban dagiti libro ni Moises (1 Ne. 5:11).