Kas naaramat kadagiti nasantuan a kasuratan, ti subbot ti panangaklon iti dusa ti basol, a pakaugasan ti basol ti nagbabawi a managbasol ket palubosan a makitunos iti Dios. Ni la Jesucristo ti makabael a mangaramid iti naan-anay a pannubbot iti sangkataw-an. Naaramidna gapu iti pannakapilina ken naitani iti Nangayed a Konseho sakbay a nabukel ti lubong (Ether 3:14; Moises 4:1–2; Abr. 3:27), ti nadiosan a Kinaanakna, ken ti awan mulit a biagna. Mairaman iti pannubbotna ti panangsagabana kadagiti basol ti sangkataw-an iti Minuyongan ti Getsemane, ti pannakaibuyat ti darana, ken ti ipapatayna ken ti simmaruno a panagungarna manipud iti tanem (Isa. 53:3–12; Mosiah 3:5–11; Alma 7:10–13). Gapu iti Pannubbot, bumangonto amin a tao manipud iti tanem nga addaan iti saan a matay a bagi (1 Cor. 15:22). Mangipaay pay ti Pannubbot iti pamuspusan kadatayo a mapakawan kadagiti basoltayo ket agbiagtayo iti agnanayon iti sidong ti Dios. Ngem sa la maawat ti tao nga addaan iti tawen a sungsungbatan ken immawat iti paglintegan dagitoy a bendision no adda pammatina ken ni Jesucristo, agbabawi kadagiti basolna, awatenna dagiti ordinansa ti pannakaisalakan, ken tungpalenna dagiti bilin ti Dios. Dagiti saan a nakagteng iti tawen nga adda sungsungbatanna ken awanan iti paglintegan maispalda babaen ti Pannubbot (Mosiah 15:24–25; Moro. 8:22). Nalawag nga isuro dagiti nasantuan a kasuratan a no saan a sinubbot ni Cristo dagiti basoltayo, awan ti paglintegan, ordinansa, wenno sakripisio a makasulnit iti kasapulan ti linteg, ket saanton a makasubli pay ti tao iti Dios (2 Ne. 2; 9).