Biblia

Ti nakaurnongan dagiti kasuratan dagiti Hebreo ken Kristiano a naglaon kadagiti nailangitan a paltiing. “Dagiti libro” ti kayat a sawen ti balikas a biblia. Ti Biblia ti aramid dagiti adu a propeta ken naregta a mannurat a nagtignay babaen ti pammaregta ti Espiritu Santo (2 Ped. 1:21).

Dua ti benneg ti Kristiano a Biblia, nga ad-adda nga ammo a kas Daan ken Baro a Tulag. Linaon ti Daan a Tulag dagiti libro ti nasantuan a kasuratan nga inaramat dagiti Hudio iti Palestina bayat ti naespirituan a panagserbi ti Apo. Linaon ti Baro a Tulag dagiti kasuratan iti panawen nga Apostoliko ken maibilang a kas iti kinasagrado ken kinaturay ti nasantuan a kasuratan dagiti Hudio. Naisakab dagiti libro iti Daan a Tulag iti sapasap a literatura a nangrugi iti adun a siglo ken naisurat iti Hebreo ti dandani amin a linaonna, idinto nga aramid ti maymaysa a kaputotan dagiti libro iti Baro a Tulag ken naisuratda iti Griego.

Iti Daan a Tulag ibagian ti balikas a tulag ti balikas a Hebreo a kayatna a sawen “katulagan.” Paglintegan ti Daan a Katulagan a naited ken ni Moises idi saan nga inawat ti Israel ti pakabuklan ti ebanghelio nga inawat dagiti tao ti Dios manipud pay idi punganay ti biag. Ti Baro a Katulagan ti ebanghelio nga insuro ni Jesucristo.

Iti Biblia a Hebreo (ti Daan a Tulag) nabingay dagiti libro iti tallo a grupo: ti Paglintegan, dagiti Propeta, ken dagiti Kasuratan. Nabennebenneg dagiti libro iti Biblia a naaramat iti lubong dagiti Kristiano babaen ti topiko, kas iti pakasaritaan, naindaniwan, ken pammadto.

Kastoy ti pannakaurnos dagiti libro iti Baro a Tulag: dagiti uppat nga Ebanghelio ken dagiti Aramid; dagiti surat ni Pablo; dagiti kangrunaan a surat da Santiago, Pedro, Juan, ken Hudas; ken ti Paltiing ni Juan.

Pagtamdan ken dayawen ti Ti Simbaan ni Jesucristo Dagiti Santo iti Ud-udina nga Aldaw ti Biblia ken paneknekanna met nga ituloy ti Apo ti agited iti nayon a paltiing babaen dagiti propetana iti ud-udina nga aldaw a mangtulong ken manglawlawag kadagiti pasamak ti Dios iti Biblia a maipanggep iti sangkataw-an.