Jeremias
Ti propeta iti Daan a Tulag a nayanak iti nasaserdotean a kaamaan ken namadto idiay Juda iti nagbaetan ti 626–586 S.C. Nagbiag iti asideg ti panawen dagiti naindaklan a propeta: Lehi, Ezekiel, Oseas, ken Daniel.
Naordenan a propeta ni Jeremias idi sakbay daytoy a biag (Jer. 1:4–5). Bayat ti pattapatta nga uppat-a-pulo a tawen a panagpropetana insurona ti maibusor iti panagrukbab kadagiti didiosen ken kinarugit nga aramid kadagiti Hudio (Jer. 3:1–5; 7:8–10). Naipasungalngal iti agtultuloy nga isusuppiat ken pananginsulto (Jer. 20:2; 36:18–19; 38:4). Kalpasan ti pannakatnag ti Jerusalem, intugot dagiti naglibas a Hudio ni Jeremias iti Egipto (Jer. 43:5–6), a kas maibatay iti tradision, a nangbatuanda kenkuana agingga a natay.
Ti libro ni Jeremias
Naglaon iti padpadto dagiti kapitulo 1–6 a naited bayat ti panagturay ni Joseas. Padpadto dagiti kapitulo 7–20 bayat ti panawen ni Jehoyakin. Maipanggep iti panagturay ni Sedekias dagiti kapitulo 21–38. Linaon dagiti kapitulo 39–44 dagiti padto ket iladawanda dagiti pasamak iti pakasaritaan kalpasan ti pannakatnag ti Jerusalem. Linaon ti kapitulo 45 ti kari ken ni Baruc, ti para suratna, a mataginayon ti biag ni Baruc. Kamaudiananna, padpadto dagiti kapitulo 46–51 a maibusor kadagiti pagilian iti ganggannaet. Pangigibus iti pakasaritaan ti kapitulo 52. Sumagmamano kadagiti padto ni Jeremias ti nailanad kadagiti gambang a pinanid ni Laban nga indulin ni Nephi (1 Ne. 5:10–13). Naagapad met ni Jeremias iti dua a panawen iti Libro ni Mormon (1 Ne. 7:14; Hel. 8:20).
Inraman pay ti libro ni Jeremias ti panangawat iti kaadda ti tao sakbay daytoy a biag ken ti nakaisangratan ni Jeremias (Jer. 1:4–5); ti padto iti panagsubli ti Israel manipud iti nakawarawaraanda, a naguummong iti maysa iti siudad ken dua a kaamaan iti Zion, ti napintas a daga a mabalin a pagyanan ti Israel ken Juda a natalged ken natalinaay (Jer. 3:12–19); ken ti padto ti Apo a maummong ti Israel manipud kadagiti pagilian iti amianan babaen ti pannakaipatulod ti adu a “mangngalap” ken “mangnganup” a mangsapul kadakuada (Jer. 16:14–21). Dakdakkel daytoy a pasamak iti ud-udina nga aldaw ngem ti panangwayawaya ni Moises iti Israel manipud iti Egipto (Jer. 16:13–15; 23:8).