Lehi, Ama ni Nephi
Iti Libro ni Mormon, ti propeta a Hebreo a nangidaulo iti kaamaan ken dagiti pasurotna manipud iti Jerusalem iti papanda iti naikari a daga iti deppaarna ti laud idi agarup 600Â S.C. Ni Lehi ti immuna a propeta kadagiti taona iti Libro ni Mormon.
Impanaw ni Lehi ti kaamaanna iti Jerusalem babaen ti bilin ti Apo (1 Ne. 2:1–4). An-annabo ni Jose, a nailako iti Egipto (1 Ne. 5:14). Inted kenkuana ti Apo ti parmata iti kayo ti biag (1 Ne. 8:2–35). Nagaramid ni Lehi ken dagiti annakna iti bilog ket naglayagda a nagturong iti deppaarna ti laud (1 Ne. 17–18). Kaduana dagiti an-annabona a nagindeg iti baro a daga (1 Ne. 18:23–25). Sakbay a natay, binendisionan ni Lehi dagiti annakna ken insurona ida ni Cristo ken ti idadateng ti Libro ni Mormon iti ud-udina nga aldaw (2 Ne. 1–4:12).
Ti libro ni Lehi
Rinugian ni Joseph Smith ti libro ni Lehi idi ipatpatarusna ti Libro ni Mormon. Daytoy ti sinuratan nga inyababa ni Mormon manipud kadagiti pinanid ni Lehi. Kalpasan ti pannakaipatarusna iti 116 a panid ti manuskrito manipud iti daytoy a libro, inted ni Joseph ti manuskrito ken ni Martin Harris, a nagserbi iti ababa a panawen a para surat ni Joseph iti panangipatarusna iti Libro ni Mormon. Napukaw dagidi a panid. Saanen a binaliwan nga impatarus ni Joseph ti Libro ni Lehi a pangsukat iti napukaw a manuskrito ngem dagiti ketdi mainugot a pasamak ti impatarusna manipud kadagiti pinanid a balitok (Kitaen ti pakauna ti DkK 3, 10). Dagitoy sabali a pakaammo ita ti umuna nga innem a libro iti Libro ni Mormon.