Lucas
Ti nangsurat iti Ebanghelio ni Lucas ken ti libro dagiti Aramid iti Baro a Tulag ken ti misionario a kadua ni Pablo. Griego dagiti dadakkelna ken doktor idi (Col. 4:14). Nangato ti adal ni Lucas. Inyam-ammona ti bagina a kas kadkadua ni Apostol Pablo idi kimmuyog ken ni Pablo idiay Troas (Ara. 16:10–11). Simmurot pay ni Lucas ken Pablo idiay Filipos iti naudi a panagdaliasat ni Pablo a napan idiay Jerusalem (Ara. 20:6), ket nagkadkaduada agingga a nakadanonda idiay Roma. Kadua pay ni Lucas ni Pablo bayat ti maikadua a pannakaibaludna idiay Roma (2 Tim. 4:11). Kuna ti kannawidan a natay a martir.
Ti Ebanghelio ni Lucas
Ti insurat ni Lucas a pasamak ni Jesucristo ken ti panangisurona. Ti libro dagiti Aramid ken dagiti Apostol ti silpo ti Ebanghelio ni Lucas. Nangibati ni Lucas iti nasayaat ti pannakaisuratna a pakaammo iti panangisuro ni Jesus, a nangipakita a ni Jesus ti Mangisalakan dagiti Hudio ken Gentil. Adu ti insuratna a maipanggep iti panangisuro ken inar-aramid ni Jesus. Iti laeng Lucas ti pakaammuantayo iti isasarungkar ni Gabriel kada Zacarias ken Maria (Luc. 1); ti isasarungkar dagiti agpaspastor ken ni maladaga a Jesus (Luc. 2:8–18); ti kaadda ni Jesus iti templo idi agtawen iti 12 (Luc. 2:41–52); ti pannakatuding ken pannakaibaon dagiti pitopulo (Luc. 10:1–24); ti panagling-et ni Jesus iti dara (Luc. 22:44); ti pannakisarita ni Jesus iti mannanakaw iti krus (Luc. 23:39–43); ken ti pannangan ni Jesus iti ikan ken tagapulot ti uyokan kalpasan ti panagungarna (Luc. 24:42–43).
Para iti nakayababaan ti kapitulo, Kitaen ti Ebanghelio, Dagiti.