Nadalus ken Narugit
Iti Daan a Tulag, impalgak ti Apo ken ni Moises ken dagiti nagkauna nga Israelita nga adda dagiti taraon a maibilang a nadalus wenno, iti sabali a pannao, mainugot nga ipauneg. Dakkel a banag ti panangilasin dagiti Israelita ti nadalus ken narugit a taraon para iti pammati ken kasasaadda iti gimong. Adda dagiti ayup, billit, ken ikan a maibilang a nadalus ket mabalin nga ipauneg, idinto a maibilang a narugit dagiti dadduma ket maiparitda (Lev. 11; Deut. 14:3–20). Adda met dagiti natay a tao a maibilang a narugit.
Iti naespirituan a kaipapanan, ti panagbalin a nadalus isu ti pannakawayawaya iti basol ken makapabasol a tarigagay. Iti daytoy a kaipapanan maaramat daytoy a balikas a mangiladawan iti tao a nadayaw ken addaan natarnaw a puso (Sal. 24:4). Kanayon nga adda naisangayan a pangiwardas nga agbalin a nadalus dagiti tao a tinulagan ti Dios (3Â Ne. 20:41; DkK 38:42; 133:5).