Efraim
Iti Daan a Tulag, ti maikadua nga anak a lalaki da Jose ken Asenath (Gen. 41:50–52; 46:20). Maisuppiat iti nakairuaman nga ugali, ni Efraim ti immawat iti bendision ti saguday ti pannakayanak a saan ketdi a ni Manases, nga in-inauna nga anak (Gen. 48:17–20). Nagbalin ni Efraim nga ama ti tribu ni Efraim.
Ti tribu ni Efraim
Naikkan ni Efraim iti kinainauna iti Israel (1 Cron. 5:1–2; Jer. 31:9). Kadagiti maudi nga aldaw gundaway ken pagrebbenganda ti maaddaan iti kinasaserdote, mangiwaras iti lubong ti mensahe ti naisubli nga ebanghelio, ken mangitag-ay iti wagayway tapno maurnos ti nasayyasayya nga Israel (Isa. 11:12–13; 2 Ne. 21:12–13). Koronaan dagiti annak ni Efraim iti gloria dagiti aggapu kadagiti pagilian iti amianan nga agsubli kadagiti maudi nga aldaw (DkK 133:26–34).
Ti kasuratan ni Efraim wenno Jose
Ti kasuratan ti maysa a grupo manipud iti tribu ni Efraim a napan iti America manipud iti Jerusalem idi agarup nga 600Â S.C. Maawagan daytoy a kasuratan ti grupo iti kasuratan ni Efraim wenno Jose, wenno ti Libro ni Mormon. Daytoy ken ti kasuratan ti Juda (ti Biblia) buklenna ti napagkaykaysa a pammaneknek ni Apo Jesucristo, ti panagungarna, ken ti nailangitan nga aramidna kadagitoy dua a bingay ti balay ti Israel.