1 Ngem kitaen, adunto—iti dayta aldaw inton isayangkatkonto iti maysa a ^adatdatlag nga aramid kadakuada, tapno malagipkonto ^bdagiti katulagan nga inaramidko kadagiti annak ti tattao, tapno maisaadko manen dagiti imak iti ^cmaikadua a gundaway a mangpasubli kadagiti tattaok, a kameng ti balay ti Israel;

2 Ket kasta met, a tapno malagipko dagiti karik kenka, Nephi, ken kasta met iti amam, a lagipekto dagiti kaputotam; ket iti kasta agtaudto manipud iti ngiwatko ^adagiti balikas ti kaputotam a maipaay kadagiti kaputotam; ken ^bsumayetset dagiti balikasko kadagiti ungto ti daga, kas ^cpagrukodan dagiti tattaok, a kameng ti balay ti Israel.

3 Ket gapu ta sumayetset ti balikasko—adunto a Gentil ti agkuna: Ti ^aBiblia! Ti Biblia! Addaankamin iti Biblia, ket awanen ti sabali pay a Biblia.

4 Ngem kuna ti Apo a Dios: O dakayo a maag, maaddaandanto iti Biblia; ket aggapunto ^akadagiti Hudio, dagiti nagkauna a natulagan a tattaok. Ket ania a panagyaman dagiti Hudio iti inawatda a ^bBiblia manipud kadakuada? Wen, ania ti kayat a sawen dagiti Gentil? Malagipda ngata dagiti panagrigrigat, ken bambannog, ken panagtutuok dagiti Hudio, paspasanaang ken ti kinaregtada kaniak, iti pannakaiyeg ti pannakaisalakan dagiti Gentil?

5 O dakayo a Gentil, malagipyo kadi dagiti Hudio, dagiti nagkauna a natulagan a tattaok? Saan; ngem inlunodyo ida, ken ^akinagurayo ida, ken saanyo a pinanggep nga isublida. Ngem kitaen, isublik amin dagitoy a bambanag kadagiti uloyo; ta siak nga Apo saanko a malipatan dagiti tattaok.

6 Dakayo a maag, nga agkunanto: Ti ^aBiblia, addaankamin iti Biblia, ket saanmin a kasapulan pay ti Biblia. Nagun-odyo kadi ti Biblia no saan a babaen kadagiti Hudio?

7 Saanyo kadi ammo nga ad-adu ngem maysa dagiti pagilian? Saanyo kadi ammo a Siak, ti Apo a Diosyo, ^apinarsuak iti amin a tao, ket malaglagipko ^bdagiti adda iti babassit nga isla iti taaw; ken agturayak iti ngatuen ti langit ken iti baba ti daga; ket yegko dagiti saok kadagiti annak ti tattao, wen, uray iti amin a pagilian ditoy daga?

8 Gapuna agdayamudomkayo kadi, gapu ta adu pay ti awatenyo a saok? Saanyo kadi ammo a ti pammaneknek ti ^adua a pagilian ket maysa a ^bsaksi kadakayo a siak ti Dios, a lagipek ti maysa a pagilian a kas met iti sabali? Gapuna, sawek dagiti sigud a saok iti maysa a pagilian kas met iti sabali. Ket inton agkaykaysa ti dua a ^cpagilian agkaykaysanto met ti pammaneknek dagitoy a pagilian.

9 Ket aramidek daytoy tapno paneknekak kadagiti adu a siak ^amet laeng idi kalman, ita, ken iti agnanayon; ket agsaoak kadagiti balikasko a mayannurot iti pagayatak. Ken gapu ta naisaok ti maysa a ^bsao saanyo ipagarup a saannak a makasao iti sabali pay; gapu ta saan pay a nalpas ti aramidko; wenno malpasto agingga iti panaggibus ti tao, uray manipud iti dayta a kanito ken iti agnanayon.

10 Gapuna, agsipud ta addaankayo iti Biblia saanyo a pagarupen a linaonna amin ^adagiti saok; wenno pagarupenyo a saanko a panggepen nga adu pay ti maisurat.

11 Ta bilinek ti ^aamin a tao, iti daya ken iti laud, ken iti amianan, ken iti abagatan, ken kadagiti isla iti taaw, nga ^bisuratdanto dagiti isaok kadakuada; gapu ta manipud ^ckadagiti libro a maisuratto ^dukomekto ti lubong, ti tunggal tao a mayannurot kadagiti aramidna, a mayannurot iti dayta a naisurat.

12 Ta kitaen, agsaoakto ^akadagiti Hudio ket isuratdanto; ket agsaoakto met kadagiti Nephita ket ^bisuratdanto daytoy; ket agsaoakto met kadagiti sabali a tribu iti balay ti Israel, nga inturongko iti sabali a lugar, ket isuratdanto; ket agsaoakto met kadagiti ^camin a pagilian iti daga ket isuratdanto.

13 Ket mapasamakto a maaddaanto ^adagiti Hudio kadagiti balikas dagiti Nephita, ket maaddaanto dagiti Nephita kadagiti balikas dagiti Hudio; ket maaddaanto dagiti Nephita ken dagiti Hudio kadagiti balikas ^bdagiti napukaw a tribu ti Israel; ket maaddaanto ti napukaw a tribu ti Israel kadagiti balikas dagiti Nephita ken dagiti Hudio.

14 Ket mapasamakto a dagiti tattaok, a kameng ti ^abalay ni Israel, makaawiddanto kadagiti daga a kukuada; ket maummongto ti balikas iti ^bmaymaysa. Ket iparangarangkonto kadagiti sumuppiat iti saok ken bumusor kadagiti tattaok, a kameng ti ^cbalay ti Israel, a siak ti Dios, ket ^dnakitulagak ken ni Abraham a laglagipekto ti ^ekaputotanna iti ^fagnanayon.