1 Ket ita siak, ni Nephi, gibusakon ti ^apanagipadtok kadakayo, ay-ayatek a kakabsatko. Ket saanak a makasurat no di laeng ti sumagmamano a banag, nga ammok a sigurado a mapasamak; wenno makasuratak ngem sumagmamano laeng kadagiti sao ni Jacob a kabsatko.

2 Gapuna, umdasen dagiti bambanag a naisuratko, malaksid ti sumagmamano a balikas a nasken a sawek a maipapan iti ^adoktrina ni Cristo; gapuna, agsaoakto a silalawag kadakayo, a mayannurot ti kinalawag ti pammadtok.

3 Agsipud ta maragsakan ti kaunggak iti kinalawag; ta kastoy a wagas ti panagtrabaho ti Apo a Dios kadagiti annak ti tattao. Ta mangted ti Apo a Dios iti ^alawag ti pannakaawat; ta agsao kadagiti tattao a mayannurot iti ^bpagsasaoda, tapno maawatanda.

4 Gapuna, kayatko a laglagipenyo dagiti imbagak kadakayo maipapan iti ^apropeta nga impakita ti Apo kaniak, a masapul a mangbuniagto iti ^bKordero ti Dios, a mangikkatto kadagiti basbasol ti lubong.

5 Ket ita, no ti Kordero ti Dios, a nasantuan, masapul a ^amabuniagan babaen ti danum, tapno matungpal ti amin a kinalinteg, Wen ngarud, ad-adda pay a kasapulantayo, a saan a nasantuan, a mabuniagan, wen, babaen ti danum!

6 Ket ita, kayatko a saludsoden kadakayo, ay-ayatek a kakabsatko, kasano a natungpal ti Kordero ti Dios ti amin a kinalinteg babaen ti panagpabuniagna iti danum?

7 Saanyo kadi ammo nga isu ket nasantuan? Ngem nupay nasantaun isuna, impakitana kadagiti annak ti tattao, kas mayannurot iti lasag nagpakumbaba iti imatang ti Ama, ket impaneknekna iti Ama a ^anatulnogto iti panangtungpalna kadagiti bilinna.

8 Gapuna, kalpasan ti pannakabuniagna iti danum bimmaba kenkuana ti Espiritu Santo iti ^alanga ti maysa a ^bkalapati.

9 Ket manen, impakitana kadagiti annak ti tattao ti kinaakikid ti dalan, ken ti kinailet ti ^aruangan, a nasken a serkanda, ket isu ti nangipakita iti pagulidananda.

10 Ket kinunana kadagiti annak ti tattao: ^aSumurotkayo kaniak. Gapuna, ay-ayatek a kakabsatko, ^bmasurotantayo aya ni Jesus no saantayo a siaayat nga agtungpal kadagiti bilin ti Ama?

11 Ket kinuna ti Ama: Agbabawikayo, agbabawikayo, ket agpabuniagkayo iti nagan ti Ay-ayatek nga Anak.

12 Ket kasta met, immay kaniak ti timek ti Anak, a kinunana: Ti siasino man a mabuniagan iti naganko, ^aitedto ti Amak kenkuana ti Espiritu Santo, a kas kaniak; gapuna, ^bsumurotkayo kaniak, ket aramidenyo dagiti bambanag a nakitayo nga inaramidko.

13 Gapuna, ay-ayatek a kakabsatko, ammok a no surotenyo ti Anak, nga addaan puso a napnuan tarigagay, nga awanan panaginkukuna ken awanan panangallilaw iti imatang ti Dios, ngem ketdi addaan iti pudno a panggep, nga agbabawi kadagiti basolyo, nga ipaneknek iti Ama a siaayatkayo nga umawat iti nagan ni Cristo, babaen ti ^apannakabuniag—wen, babaen ti panangsurotyo iti Apo ken Mangisalakan kadakayo a bumaba iti danum, a mayannurot kadagiti balikasna, kitaenyo, inkayto awaten ti Espiritu Santo; wen, ket umayto ti ^bpannakabuniag iti apuy ken iti Espiritu Santo; ket makapagsaokayonto iti ^cpagsasao dagiti anghel, ken ipukkawyonto ti panagdaydayaw iti Nasantuan ti Israel.

14 Ngem, kitaen, ay-ayatek a kakabsatko, immay kaniak ti timek ti Anak, a kinunana: Kalpasan ti panagbabawiyo iti basbasolyo, ket paneknekanyo iti Ama a siaayatkayo nga agtungpal kadagiti bilinko, babaen ti panagbuniag iti danum, ken pannakabuniag iti apuy ken iti Espiritu Santo, ken makapagsaokayo iti baro a pagsasao, wen, a kas iti pagsasao dagiti anghel, ket ^ailibakdak kalpasan daytoy, ^bnasaysayaat koma pay no saandak a naam-ammoan.

15 Ket nakangngegak iti timek manipud iti Ama, a kinunana: Wen, agpayso ken pudno dagiti balikas ti Ay-ayatek. Asino man a makapagibtur agingga iti panungpalan, isunto met laeng ti maisalakan.

16 Ket ita, ay-ayatek a kakabsatko, ammok kas maibatay itoy a malaksid no ^aagibtur ti tao agingga iti panungpalan, a mangsurot iti ^bpagulidanan ti Anak ti sibibiag a Dios, saanto a maisalakan.

17 Gapuna, aramidenyo dagiti bambanag nga imbagak a nakitakon ti nasken nga aramidento ti Apo ken Mannubbotyo; agsipud ta, gapu iti daytoy a naipakitada kaniak, tapno maammuanyo ti ruangan a serkanyo. Agsipud ta ti ruangan a rumbeng a serkenyo ket isu ti panagbabawi ken ^apannakabuniag babaen ti danum; ket kalpasanna, umayto ti ^bpannakapakawan dagiti basolyo babaen ti apuy ken ti Espiritu Santo.

18 Ket addakayon iti daytoy ^anailet ken akikid a ^bdalan nga agturong iti agnanayon a biag; wen, nakastrekkayon iti ruangan; naaramidyon dagiti bilin ti Ama ken ti Anak; ket inawatyon ti Espiritu Santo, a ^cmangpaneknek iti Ama ken iti Anak, iti pannakatungpal ti kari nga inaramidna, a rumbeng nga awatenyo no sumrekkayo iti dayta a dalan.

19 Ket ita, ay-ayatek a kakabsatko, kalpasan ti pannakastrekyo ditoy nailet ken akikid a dalan, saludsodek no amin kadi ket ^analpasen? Kitaen, kunak kadakayo, Saan; gapu ta saankayo pay a nakaadayo malaksid no babaen ti balikas ni Cristo, nga addaan iti natibker a ^bpammati kenkuana, ken naan-anay a ^cpanagtalek kenkuana a kas mannakabalin a mangisalakan.

20 Gapuna, nasken nga ^aagtultuloykayo a sitatalingenngen ken ni Cristo, nga addaan iti naan-anay a kinalawag ti ^bnamnama, ken ^cayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken ^dagibtur agingga iti panungpalan, kitaen, kuna ti Ama: Maaddaankayto iti agnanayon a biag.

21 Ket ita, kitaen, ay-ayatek a kakabsatko, daytoy ti ^adalan; ket ^bawan ti sabali a dalan wenno ^cnagan a naited iti baba ti langit a pakaisalakanan ti tao iti pagarian ti Dios. Ket ita, kitaen, daytoy ti ^ddoktrina ni Cristo, ken ti kakaisuna ken pudno a doktrina ti ^eAma, ken ti Anak, ken ti Espiritu Santo, a ^fmaymaysa a Dios, nga awan patinggana. Amen.