1 Dagiti balikas ni Jacob, ti lalaki a kabsat ni Nephi, nga imbagana kadagiti tattao ni Nephi:

2 Kitaen, patpatgek a kakabsatko, siak, ni Jacob, agsipud ta tinudingannak ti Dios, ken naordenan babaen ti wagas ti nasantuan nga orden, ken kas kinonsagraran ti kabsatko a lalaki a ni Nephi, a bigbigenyo a kas ^aari wenno manangsalaknib, ken ti pagpannurayanyo iti kinatalged, kitaen ammoyo nga adu unay ti naisaok a bambanag kadakayo.

3 Nupay kasta, agsaoak manen kadakayo; ta tarigagayak ti pagimbagan dagiti kararuayo. Wen, napalalo ti panagdanagko para kadakayo; ket ammoyo iti bagbagiyo a talaga a kasta. Ta ginutugotkayo a sireregta; ken naisurokon kadakayo dagiti balikas ti amak; ken naibagakon kadakayo ti maipanggep kadagiti amin a banag a naisurat, manipud iti pannakaparsua ti lubong.

4 Ket ita, kitaen, agsaoak kadakayo maipanggep kadagiti banag nga agdama, ken dagiti dumtengto pay; gapuna, ibasak kadakayo dagiti balikas ni ^aIsaias. Ket isuda dagiti balikas a kalikaguman ti kabsatko a nasken nga ibagak kadakayo. Ket ibagak kadakayo para iti pagimbaganyo, tapno masursuroyo ken maitan-okyo ti nagan ti Diosyo.

5 Ket ita, dagiti ibasakto kadakayo a balikas isuda dagiti imbaga ni Isaias maipanggep amin iti balay ti Israel; gapuna, mayarigda met kadakayo, gapu ta addakayo ti balay ti Israel. Ken adu pay dagiti bambanag nga imbaga ni Isaias a mayarig kadakayo, gapu ta addakayo ti balay ti Israel.

6 Ket ita, kitaen dagiti balikas: ^aKastoy ti kinuna ti Apo a Dios: Kitaen, itanggayakto dagiti imak kadagiti Gentil, ken ibangonko ti ^bpagrukodak kadagiti tattao; ket awitendanto dagiti annakda a lallaki kadagiti takiagda, ket ibaklaydanto kadagiti abagada dagiti annakda a babbai.

7 Ket dagitinto ari ti manaripato nga ammayo, ket dagiti reyna ti manaripato nga innayo; agtameddanto kenka a maikurno ti rupada iti daga, ken dilpatandanto ti tapok dagiti dapanyo; ket maammuamyonto a siak ti Apo; ta didanto mabain nga ^aaguray kaniak.

8 Ket ita siak, ni Jacob, agsaoak iti banag a maipanggep kadagitoy a balikas. Ta kitaen, impakita kaniak ti Apo a dagiti adda iti ^aJerusalem, a naggapuanmi, napapatay ken ^bnaipanda nga adipen.

9 Nupay kasta, impakita kaniak ti Apo nga ^aagsublidanto manen. Ken impakitana met kaniak a ti Apo a Dios, ti Nasantuan ti Israel, nga agpakitanto kadakuada iti nainlasagan a bagi; ket kalpasan ti panagpakitana kadakuada saplitan ken ^bilansadanto isuna iti krus, kas mayannurot kadagiti balikas ti anghel a nagkuna kaniak.

10 Ket kalpasan ti panangpatangken iti puspusoda ken panagsukirda a maibusor iti Nasantuan ti Israel, kitaen, maipaayto kadakuada dagiti ^apangngeddeng ti Nasantuan ti Israel. Ket dumtengto ti aldaw a madangran ken agrigatdanto.

11 Gapuna, kalpasan ti pannakaabugda iti aniaman a pakaituronganda, ta kasta ti kinuna ti anghel, adunto ti agrigat iti nainlasagan a bagida, ken saanto a maipalubos a matayda, gapu kadagiti kararag dagiti napudno; maiwaraswarasdanto, ken madangran, ken magurguradanto; nupay kasta, kaasianto ida ti Apo, ta ^ainton dumteng ti ^bpannakaammoda iti Mannubbotda, ^cmatipondanto manen a sangsangkamaysa kadagiti daga a tawidda.

12 Ket nagasat ^adagiti Gentil, isuda dagiti insurat ti propeta; ta kitaen, no la ket agbabawida ken saanda a labanan ti Zion, ken saanda a makipagkaykaysa iti dayta a naindaklan ken ^bmakarimon a simbaan, maisalakandanto; ta itungpalto ti Apo a Dios dagiti ^ckatulagan nga inkarina kadagiti annakna; ket daytoy ti gapu ti nangisuratan ti propeta kadagitoy a banag.

13 Gapuna, dilpatanto dagiti makilaban iti Zion ken dagiti natulagan a tao ti Apo ti tapok dagiti sakada; ken dagiti tattao ti Apo saandanto nga ^aagbain. Ta dagiti tattao ti Apo isu dagiti ^bmanguray kenkuana; ta agur-urayda pay laeng iti iyaay ti Mesias.

14 Ket kitaen, kas maibatay kadagiti balikas ti propeta, Irubuatto manen ti Mesias ti bagina iti ^amaikadua a gundaway a mangipasubli kadakuada; gapuna, ^bagpakitanto kadakuada a nabileg ken naglorian, nga agbanag iti ^cpannakadadael dagiti kabusorda, no dumteng dayta nga aldaw a mamatidan kenkuana; ket awanto ti dadaelenna kadagiti mamati kenkuana.

15 Ken dagiti saan a mamati kenkuana ket ^amadadaelto, agpada a babaen ti ^bapuy, ken ti bagyo, ken ginggined, ken naranggas a panangpapatay, ken babaen ti ^cangol, ken panagbisin. Ket maammuandanto a Dios ti Apo, ti Nasantuan ti Israel.

16 ^aTa maagaw kadi ti sinamsam manipud iti maingel, wenno ti ^bnalinteg a naadipen a balud mawayawayaan?

17 Ngem kasta ti kinuna ti Apo: Maipanawto uray dagiti ^anaadipen a balud ti maingel, ken mawayawayaanto ti sinamsam ti nakabutbuteng; ta ti ^bNaindaklan a Dios ket ^cwayawayaannanto dagiti natulagan a taona. Ta kastoy ti kinuna ti Apo: Makirupirakto kadakuada a makirupir kenka—

18 Ket pakanekto dagiti mangirurumen kenka, iti bukodda a lasag; ken mabartekdanto iti bukodda a dara a kasla nasam-it nga arak; ket maammuanto ti amin a tattao a siak nga Apo ti Mangisalakan ken ^aMannubbotda, ti ^bMaysa a Mannakabalin ni Jacob.