1 Ket kalpasan ti ^apanagungarto ni Cristo manipud iti pannakatayna, ^bagpakitanto kadakayo, annakko, ken kadakayo patpatgek a kakabsatko; ket agbalinto a ^cpaglintegan a nasken a surotenyo dagiti balikas nga isaona kadakayo.

2 Ta kitaen, ibagak kadakayo a naawatak nga adunto ti aglabas a kaputotan, ket addanto dadakkel a gubgubat ken panagsusupanget dagiti tattaok.

3 Ket kalpasanto ti yaay ti Mesias maitedto kadagiti tattaok ^adagiti tanda ti ^bpannakayanakna, kasta met ti ipapatay ken ti panagungarna; ket naindaklan ken nakabutbutengto dayta nga aldaw kadagiti nadangkes, agsipud ta mataydanto; ket matayda gapu ta pinapanawda dagiti propeta, ken dagiti santo, ket binatoda ida, ken pinatayda ida; gapuna agpangatonto iti Dios manipud iti daga ti araraw ti ^cdara dagiti santo a maibusor kadakuada.

4 Gapuna, amin dagiti napalangguad, ken dagiti agaramid iti dinadangkes, umayto dayta nga aldaw a ^amanguram kadakuada, kinuna ti Apo ti Pangen, ta agbalindato a kas garami.

5 Ket isuda a nangpatay kadagiti propeta, ken dagiti santo, ^aalun-onento ida ti kaunggan ti daga, kinuna ti Apo ti Pangen; ket ^bdagiti bantay ti manggabur kadakuada, ken itayabto ida dagiti alipugpog, ken matupakanto ida kadagiti pasdek ken marumrumekdanto ken pulboendanto.

6 Ket sarungkaranto ida dagiti gurruod, ken kimkimat, ken ginggined, ken amin a kita ti panangdadael, agsipud ta sumgedto a maibusor kadakuada ti apuy ti pungtot ti Apo, ket kasladanto la garami, ket ibusento ida ti dumteng nga aldaw, kinuna ti Apo ti Pangen.

7 O ti saem, ken ti ladingit ti kararuak iti pannakapukaw dagiti napapatay a tattaok! Ta siak, ni Nephi, naimatangak daytoy, ta ngangngani a naan-anay a dadaelennak iti imatang ti Apo; ngem nasken nga agpakaasiak iti Diosko: Dagiti wagasmo ket ^anainkalintegan.

8 Ngem kitaenyo, dagiti nalinteg a dumngeg kadagiti balikas dagiti propeta, ken saanna a dadaelen ida, ngem mangnamnamada ken ni Cristo a sitatalingenngen kadagiti tanda a naited, nupay iti amin a ^apanangidadanes—kitaen, isuda dagiti saan a ^bmapapatay.

9 Ngem ^aagparangto kadakuada ti Anak ti Kinalinteg; ket ^bpaimbagennanto ida, ket maaddaandanto iti ^ckappia kenkuana, agingga a lumabas ti ^dtallo a kaputotan, ken adu kadagiti ^emaikapat a kaputotan ti pumusay iti kinalinteg.

10 Ket iti pannakapasamak amin dagitoy a bambanag dumteng ti nadaras a ^apannakadadael dagiti tattaok; ta, iti baet ti panagsagaba ti kaunggak, naimatangak; gapuna, ammok a mapasamakto; ket ilakoda ti bagbagida iti awan kaes-eskanna; ta, para iti gunggona ti kinapalangguad ken kinamaagda sagrapendanto ti pannakadadael; ta gapu iti isusukoda iti sairo ket pinilida dagiti aramid iti kasipngetan imbes a ti lawag, ngarud maigarangugongda iti ^bimpierno.

11 Ta saan a kanayon a ^amakitagunaynay ti Espiritu iti Apo iti tao. Ket no nagsardengen ti Espiritu a makitagunaynay iti tao nadaras metten ti yaay ti pannakadadael, ket daytoy ti mamagleddaang iti kaunggak.

12 Ket bayat iti panagsaok maipanggep iti ^apannakaallukoy ^bdagiti Hudio, a ni Jesus ti ^cagpayso a Cristo, nasken met a maallukoy dagiti Gentil a ni Jesus ti Cristo, ti Agnanayon a Dios;

13 Ken nagpakita kadagiti amin a mamati kenkuana, babaen ti bileg ti ^aEspiritu Santo; wen, iti tunggal pagilian, puli, pagsasao, ken tattao, nga agaramid kadagiti naindaklan a milagro, tanda, ken pagsidsiddaawan, kadagiti annak ti tattao a mayannurot iti pammatida.

14 Ngem kitaen, ipadtok kadakayo ti maipanggep ^akadagiti maudi nga aldaw; maipanggep kadagiti aldaw a ^byegto ti Apo a Dios dagitoy a bambanag kadagiti annak ti tattao.

15 Kalpasan nga in-inut a napukaw ti pammati dagiti kaputotak ken ti kaputotan dagiti lallaki a kakabsatko, ken masaplitanto dagiti Gentil; wen, kalpasan ti panagkamponto ti Apo a Dios iti aglawlawda, ken naalikubkobdan iti bangen, ken nabangonen ti sarikedked a maibusor kadakuada; ken kalpasan ti pannakaipadagada iti katapukan, uray no saan a kadakuada, ngem maisuratto latta dagiti balikas dagiti nalinteg, ket mangngegto ti kararag dagiti napudno, ket saanto a malipatan dagiti amin a in-inut a napukaw ti pammatida.

16 Ta ^aagtimekto kadakuada dagiti nadadael manipud iti katapukan, ket agtaudto ti timekda iti katapukan, ket kaslanto iti maysa nga addaan iti am-ammo nga espiritu ti timekda; ta ikkanto ti Apo a Dios iti bileg, tapno makapagarasaas iti maipanggep kadakuada, a kasla agtaud iti daga; ket ti saoda agarasaasto manipud iti katapukan.

17 Ta kinuna ti Apo a Dios: ^aIsuratdanto dagiti pasamak a maaramidto kadakuada, ket maisurat ken maserraandanto iti libro, ket saandanto a maited kadagiti napukawan iti pammati, ta ^bikagkagumaanda a dadaelen dagiti bambanag ti Dios.

18 Gapuna, kas kadagiti nadadael a nadaras ti pannakadadaelda; ket kaslanto ^ataep nga aglabas ti ummong dagiti pagam-amkanda—wen, ta kinuna ti Apo a Dios: Mapasamakto iti apagdarikmat, saan a mapakpakadaan—

19 Ket mapasamakto, a ^amasaplitanto dagiti in-inut a napukawan iti pammati babaen kadagiti ima dagiti Gentil.

20 Ket napangato dagiti Gentil iti ^akinapalangguad ti panangkita ti bagbagida, ket ^bnaitublakda, gapu iti kinabileg ti ^clappedda, ta nangbangonda iti adu a ^dsimbaan; nupay kasta, imbabada ti bileg ken milagro ti Dios, ket inkasabada iti bagbagida ti bukodda a pagsiriban ken bukodda nga ^eadal, tapno makaawat iti gunggona ken ^fgilingenda ti rupa dagiti nakurapay.

21 Ket adu a simbaan ti nabangon a nangparnuay ^akadagiti kinaapal, ken panagririri, ken pammadpadakes.

22 Ken adda met ^analimed a kinnunsabo, uray pay kadagidi nagkauna a panawen, kas mayannurot iti kinnunsabo ti sairo, ta isu ti nangisungsong amin kadagitoy a bambanag; wen, insungsongna ti panagpatay, ken dagiti aramid iti kasipngetan; wen, indauluanna ida babaen iti lino a lubid iti tengngedda, agingga a pinungona ida iti nalagda a lubid iti agnanayon.

23 Ta kitaenyo, patpatgek a kakabsatko, kunak kadakayo a saan nga agtrabaho ti Apo a Dios iti kasipngetan.

24 Saan nga agaramid iti ania man malaksid ti pagimbagan ti lubong; agsipud ta ^apatpatgenna ti lubong, uray pay no ipustana ti biagna no mayasidegna la ketdi ^bamin dagiti tattao kenkuana. Gapuna, awan ti binilinna a saan a makiranud iti panangisalakanna.

25 Kitaenyo, ipukkawna kadi iti asinoman, a kunana: Umadayoka kaniak? kitaenyo, kunak kadakayo, Saan; ngem kinunana: ^aUmaykayo amin kaniak dakayo a tattao iti entero a daga, ^bgumatangkayo iti gatas ken diro, saan a babaen iti kuarta ken gatad.

26 Kitaenyo, binilinna kadi ti asinoman a nasken a pumanawda kadagiti sinagoga, wenno kadagiti balay a pagdaydayawan? Kitaen, kunak kadakayo, Saan.

27 Binilinna kadi ti asinoman a saanda a makiranud iti ^apanangisalakanna? Kitaenyo kunak kadakayo, Saan; ngem ^bintedna a libre iti amin a tao; ket imbilinna kadagiti taona nga allukoyenda ti amin a tao nga ^cagbabawi.

28 Kitaenyo, binilin kadi ti Apo ti asino man a saanda a makiranud iti kinaimbagna? Kitaenyo kunak kadakayo, Saan; ngem naikkan ti ^aamin a tao iti gundaway a kas iti tunggal maysa, ket awan ti maparitan.

29 Imbilinna nga awan koma ti ^apanaginsasaserdote; ta, kitaen, ipakat ti panaginsasaserdote nga ikasaba dagiti tattao ken itag-ayda ti bagbagida a lawag iti lubong, tapno makaawat iti gunggona ken makagun-odda iti ^bpammadayaw iti lubong; ngem saanda nga ikagumaan ti pagimbagan ti Sion.

30 Kitaenyo, iparit ti Apo daytoy a banag; gapuna, nangted ti Apo a Dios iti bilin a nasken a maaddaan dagiti tattao iti ^apanangaasi, ta ti panangaasi ket ^bpanagayat. Ket malaksid nga addaanda iti panangaasi awan ti kaes-eskanda. Gapuna, no adda panangngaasida saanda ipalubos a matay dagiti mangmangged iti Sion.

31 Ngem nasken a manggedto iti ^aSion dagiti mangmanggedto para iti Sion; agsipud ta no agtrabahoda para iti ^bkuarta mataydanto.

32 Ket manen, ^aimbilin ti Apo a Dios a nasken a saan a mamapatay ti tao; a nasken a saanda nga agulbod; a nasken a saanda nga agtakaw; a nasken a saanda nga aramaten ti nagan ti Diosda a ^bbarengbareng; a nasken a saanda nga agiinnapal; a nasken nga awan kadakuada ti gandat a mangdangran; a nasken a saanda nga agsisinnupanget; a nasken a saanda nga agaramid iti inaabig; ken nasken a saanda nga agaramid iti ania man kadagitoy a bambanag; ta maungaw ti asino man a mangaramid kadagitoy.

33 Ta awan kadagitoy a kinamanagbasol ti agtaud iti Apo; agsipud ta aramidenna iti nasayaat kadagiti annak ti tattao; ket awan ti aramidenna malaksid no nalawag kadagiti annak ti tattao; ket awisenna amin ida nga umay kenkuana ket makiranudda iti kinasayaatna; ket saan nga ^aagkedked kadagiti umay kenkuana, nangisit ken napudaw, adipen ken nawaya; lalaki ken babai; ken malagipna dagiti ^bpagano; ket agpapada ^camin iti Dios, Hudio man ken Gentil.