Espiritu Santo

Ti maikatlo a kameng ti Kinadios (1 Jn. 5:7; DkK 20:28). Isu ti kinatao ti Espiritu, nga awanan iti lasag ken tulang (DkK 130:22). Masansan a maitudo ti Espiritu Santo a kas Espiritu, wenno Espiritu ti Dios.

Annongen ti Espiritu Santo ti sumagmamano a napateg a pagrebbengan iti plano ti pannakisalakan. (1) Paneknekanna ti Ama ken ti Anak (1 Cor. 12:3; 3 Ne. 28:11; Ether 12:41). (2) Ipalgakna ti kinapudno ti amin a banag (Jn. 14:26; 16:13; Moro. 10:5; DkK 39:6). (3) Pasantuenna dagiti nagbabawi ken nabuniagan (Jn. 3:5; 3 Ne. 27:20; Moises 6:64–68). (4) Isu ti Nasantuan nga Espiritu ti Kari (DkK 76:50–53; 132:7, 18–19, 26).

Mabalin a magun-od ti tao ti bileg ti Espiritu Santo sakbay a mabuniagan, ket paneknekan a pudno ti ebanghelio. Ngem ti kalintegan nga umawat iti agtultuloy a pannarabay ti Espiritu Santo, no maikari ti tao, sagut a maawat laeng babaen ti panangipatay kadagiti dakulap ti addaan iti Kinasaserdote a Melchizedek kalpasan ti pannakaipalubos a mabuniagan iti pudno a Simbaan ni Jesucristo.

Insuro ni Jesus a mapakawan amin a basol malaksid ti panagtabbaaw iti Espiritu Santo (Mat. 12:31–32; Mar. 3:28–29; Luc. 12:10; Heb. 6:4–8; DkK 76:34–35).

Ibaga kenka ti Espiritu Santo iti panunotmo ken iti pusom, DkK 8:2.
Mangidalan ti Espiritu iti panagaramid iti nasayaat, DkK 11:12.
Ammo ti Espiritu Santo amin a banag, DkK 35:19.
Isuro ti Espiritu dagiti makapatalna a banag iti pagarian, DkK 36:2 (DkK 39:6).
No diyo maawat ti Espiritu, saankayo a mangisuro, DkK 42:14.
Paneknekan ti Espiritu Santo ti Ama ken ti Anak, DkK 42:17 (1 Cor. 12:3; 3 Ne. 11:32, 35–36).
Ikkan ti Espiritu Santo dagiti dadduma iti pannakaammo a ni Jesucristo ti Anak ti Dios, DkK 46:13.
No tignayen ida ti Espiritu Santo agbalin a nasantuan a kasuratan laeng ti ibagada, DkK 68:4.
Maikagayto ti Espiritu Santo a mangpaneknek kadagiti amin a banag a sawenyo, DkK 100:8.
Ti Espiritu Santo ti kanayon a kaduam, DkK 121:45–46.