Pannakisarita ti Dios kadagiti annakna iti daga. Mabalin a mapasamak ti paltiing babaen ti Silaw ni Cristo ken iti Espiritu Santo babaen ti pammaregta, parmata, tagtagainep, wenno isasarungkar dagiti anghel. Mangted ti paltiing iti panangiwanwan a mangitunda iti napudno iti agnanayon a pannakaisalakan iti celestial a pagarian.
Ipalgak ti Apo ti aramidna kadagiti propetana ken paneknekanna kadagiti mamati a pudno dagiti paltiing kadagiti propeta (Amos 3:7). Babaen ti paltiing, ikkan ti Apo ti tunggal maysa iti panangiwanwan a mangsapul iti daytoy ken addaan iti pammati, agbabawi, ken natallugod iti ebanghelio ni Jesucristo. “Mammaltiing ti Espiritu Santo,” kinuna ni Joseph Smith, ket “awan ti asino man a makaawat iti Espiritu Santo a di umawat kadagiti paltiing.”
Iti Simbaan ti Apo, propeta, mammadto, ken mammaltiing iti Simbaan ken iti lubong ti Umuna a Panguluen ken ti Korum dagiti Sangapulo-ket-dua nga Apostol. Ti la Presidente ti Simbaan ti tinudingan ti Apo nga umawat iti paltiing para iti Simbaan (DkK 28:2–7). Mabalin ti tunggal tao ti umawat iti bukod a paltiing para iti pagimbaganna.