1 Ket dinengngeg ni ^aAdan ti timek ti Dios, ket inawaganna dagiti annakna a lallaki nga agbabawi.

2 Ket kinainnayat manen ni Adan ti asawana, ket nagpasngay iti lalaki, ket pinanagananna ti anakna iti ^aSet. Ket intan-ok ni Adan ti nagan ti Dios; ta kinunana: Inikkannak ti Dios iti sabali pay a bukel, malaksid ken ni Abel, a pinapatay ni Cain.

3 Ket nagpakita ti Dios ken ni Set, ket saan a simmupring, ngem nangidaton iti maawat a ^asakripisio, a kas iti kabsatna a ni Abel. Ket kenkuana naipasngay met ti lalaki, ket pinanagananna iti Enos.

4 Ket kalpasanna rinugian dagitoy a tao nga ^ainawagan ti nagan ti Apo, ket binendisionan ida ti Apo;

5 Ket naidulin ti ^alibro a pakalaglagipan, a nakaisuratan, iti pagsasao ni Adan, ta naited kadagiti amin a nagkiddaw iti Dios nga agsurat babaen ti espiritu ti ^bpammaregta;

6 Ket kadakuada naisuro dagiti annakda nga agbasa ken agsurat, nga addaan iti pagsasao a natarnaw ken awanan mulit.

7 Ita daytoy isu met laeng a ^aKinasaserdote, nga adda idi punganay, addanto met laeng iti panungpalan ti lubong.

8 Ita daytoy a padto ti insao ni Adan, bayat ti panangtignay kenkuana ti ^aEspiritu Santo, ket indulin dagiti ^bannak ti Dios ti ^cpakasaritaan ti kaamaan. Ket daytoy ti ^dlibro dagiti kaputotan ni Adan, a kinunana: Iti aldaw a panangparsua ti Dios iti tao, inaramidna daytoy a kalanglanga ti Dios;

9 Iti ^akalalanga ti bukodna a bagi, lalaki ken babai, pinarsuana ^bida, ken binendisionanna ida, ket ^cninagananna ida iti Adan, iti aldaw a pannakaparsuada ket nagbalinda a sibibiag a ^dkararua iti daga iti ^esakaanan ti Dios.

10 Ket nagbiag ni ^aAdan iti sangagasut ken tallopulo a tawen, ket nangputot iti maysa a lalaki, a kas kenkuana, a ^bkalanglangana, ket pinanagananna iti Set.

11 Ket kadagiti aldaw ni Adan, kalpasan ti panangputotna ken ni Set, immabot iti walo-gasut a tawen, ket nangputot iti adu a lallaki ken babbai;

12 Ket siam-a-gasut ken tallopulo a tawen ti panawen a panagbiag ni Adan, ket natay.

13 Nagbiag ni Set iti sangagasut ken lima a tawen, ket pinutotna ni Enos, ket nagipadto iti unos ti panagbiagna, ket insurona ni anakna nga Enos iti wagas ti Dios; gapuna nagipadto met ni Enos.

14 Ket nagbiag ni Set, kalpasan ti panangputotna ken ni Enos, iti walo-gasut ken pito a tawen, ket nangputot iti adu a lallaki ken babbai.

15 Ket adu ti annak dagiti tao iti intero a rabaw ti daga. Ket napigsa ti ^apanangituray ni Satanas kadagiti tao kadagidi nga aldaw, ket napno ti puspusoda iti gura; ket manipud sadiay rimsua ti gubgubat ken pannakaisayasay ti dara; ket nagbalin a kabusor ti tao ti kabsatna, iti panangipatungpal iti patay, gapu kadagiti ^bnalimed nga aramid, nga agsapsapul iti bileg.

16 Siam-a-gasut ken sangapulo-ket-dua a tawen ti dagup ti panagbiag ni Set, ket natay.

17 Ket nagbiag ni Enos iti siam-a-pulo a tawen, ket pinutotna ni ^aCainan. Ket rimmuar ni Enos ken dagiti nabati a tao ti Dios manipud iti daga, a maawagan iti Shulon, ket nagtaengda iti naikari a daga, nga inawaganna iti nagan ti anakna, a ninagananna iti Cainan.

18 Ket nagbiag ni Enos, kalpasan ti panangputotna ken ni Cainan, iti walo-gasut ken sangapulo-ket-lima a tawen, ket nangputot iti adu a lallaki ken babbai. Ket agdagup ti panagbiag ni Enos iti siam-a-gasut ken lima a tawen, ket natay.

19 Ket nagbiag ni Cainan iti pitopulo-a-tawen, ket pinutotna ni Mahalaleel; ket nagbiag ni Cainan kalpasan ti panangputotna ken ni Mahalalel iti walo-gasut-ken-uppat-a-pulo a tawen, ket nagputot iti lallaki ken babbai. Ket siam-a-gasut-ken-sangapulo a tawen a nagbiag ni Cainan, ket natay.

20 Ket nagbiag ni Mahalalel iti innem-a-pulo-ket-lima a tawen, ket pinutotna ni Jared; ket nagbiag ni Mahalalel, kalpasan ti panangputotna ken ni Jared, iti walo-gasut-ken-tallopulo a tawen, ket nagputot iti lallaki ken babbai. Ket walo-gasut-ken-siam-a-pulo-ket-lima a tawen a nagbiag ni Mahalalel, ket natay.

21 Ket nagbiag ni Jared iti sangagasut-ken-innem-a-pulo-ket-dua a tawen, ket pinutotna ni ^aEnoc; ket nagbiag ni Jared, kalpasan ti panangputotna ken ni Enoc, iti walo-gasut-a-tawen, ket nagputot iti lallaki ken babbai. Ket insuro ni Jared ken ni Enoc ti amin a wagas ti Dios.

22 Ket daytoy ti kapupuon dagiti lallaki nga annak ni Adan, nga ^aanak ti Dios, a nakasao, a mismo, ti Dios.

23 Ket ^anangaskasabada iti kinalinteg, ket nagsao ken ^bnagipadtoda, ken inawaganda amin a tao, iti amin a lugar, nga ^cagbabawi; ket naisuro ti ^dpammati kadagiti annak ti tattao.

24 Ket napasamak a siam-a-gasut-ken-innem-a-pulo-ket-dua a tawen a nagbiag ni Jared, ket natay.

25 Ket nagbiag ni Enoc iti innem-a-pulo-ket-lima a tawen, ket pinutotna ni ^aMatusalem.

26 Ket napasamak a nagdaliasat ni Enoc iti daga, kadagiti tao; ket bayat ti panagdaliasatna, bimmaba ti Espiritu ti Dios manipud iti langit ket nagtaeng kenkuana.

27 Ket nakangngeg iti timek manipud iti langit, a nagkuna: Enoc, anakko, ipadtom kadagitoy a tao, ket kunam kadakuada—Agbabawikayo, ta kastoy ti kuna ti Apo: ^aMakaungetak kadagitoy a tao, ket maiturong kadakuada ti nakaro a pungtotko; ta timmangken ti puspusoda, ken nakuneng a dumngeg dagiti ^blapayagda, ken ^csaan a makakita dagiti matada iti adayo;

28 Ket dagitoy adu a kaputotan, manipud iti daydi aldaw a panangparsuak kadakuada, ^anasayyasayyada, ket tinallikudandak, ket nagsapulda iti bukodda nga ayo iti kasipngetan; ket iti makarimon nga aramidda nagaramidda iti pammapatay, ket saanda a tinungpal dagiti bilin, nga intedko iti amada, a ni Adan.

29 Gapuna, kinarianda ti bagbagida, ket, babaen ti ^asapatada, isuda ti nangikeddeng iti patayda; ket insaganak ti ^bimpierno a para kadakuada, no saanda nga agbabawi;

30 Ket daytoy ti paulog, nga impaulogko idi punganay ti lubong, manipud iti bukodko a ngiwat, manipud iti pannakabangonna, ken babaen ti ngiwat dagiti katulongak, dagiti ammayo, impaulogko, a kas iti pannakaipaulognanto iti daga, agingga kadagiti ngudona.

31 Ket idi mangngeg ni Enoc dagitoy a balikas, nagtamed iti daga, iti imatang ti Apo, ket nagsao iti imatang ti Apo, a kinunana: Apay a nasarakak ti panangipateg kadakayo, ket maysaak laeng nga agtutubo, ken kaguradak amin dagiti tao; ta ^anabuntogak nga agsasao; gapuna siak kadi ti katulongam?

32 Ket kinuna ti Apo ken ni Enoc: Mapanka ket aramidem ti kas iti imbilinko kenka, ket awan ti asino man a mangdangran kenka. Luktam dayta ^angiwatmo, ket mapnonto, ket pagbaliksenkanto, ta adda kadagiti imak amin a nabiag, ket aramidek ti namnamaek a nasayaat.

33 Kunam kadagitoy a tao: ^aPilienyo daytoy nga aldaw, nga agserbi iti Apo a Diosyo a nangaramid kadakayo.

34 Adtoy adda kadakayo ti Espirituk, gapuna aramidek a nainkalintegan amin a balikasyo, ket umadayo dagiti ^abantay kadakayo, ken agbaliw ti ayus dagiti ^bkarayan; ket agtungpalkayo kaniak, ken siak kadakayo; ngarud ^csurotendak.

35 Ket nagsao ti Apo ken ni Enoc, ket kinunana kenkuana: Sapsapuam dagiti matam iti pitak, ket bugguam ida, ket makakitaka. Ket inaramidna.

36 Ket nakitana dagiti ^aespiritu a pinarsua ti Dios; ken nakitana met dagiti banag a saan a makita ti ^bgagangay a mata; ket manipud idin nagwaras ti damag iti adayo a daga: Namataud ti Apo iti ^cmammaltiing kadagiti taona.

37 Ket napasamak a napan ni Enoc iti daga, kadagiti tao, a nagtakder iti turturod ken kadagiti nangato a lugar, ket nagpukkaw, a nangpaneknek iti maibusor kadagiti aramidda; ket ^anapasugkian amin a tao gapu kenkuana.

38 Ket immayda a dimngeg kenkuana, kadagiti nangato a lugar, a kinunada kadagiti agaywan iti tolda: Agbatikayo ditoy ket bantayanyo dagiti tolda, bayat ti papanmi sadiay ta kitaenmi ti mammaltiing, ta nagipadto, ket adda datdatlag a banag iti daga; immay ti atap a tao kadatayo.

39 Ket napasamak idi mangngegda, awan ti tao a nangsagid kenkuana; ta simmallukob ti buteng kadakuada amin a nakangngeg kenkuana; ta nagna a kaduana ti Dios.

40 Ket inasitgan ti maysa a lalaki, nga agnagan iti Mahija, ket kinunana kenkuana: Ibagam kadakami a silalawag no asinoka, ken no sadino ti naggapuam?

41 Ket kinunana kadakuada: Naggapuak iti daga ti Cainan, ti daga dagiti ammak, ti daga ti kinalinteg iti daytoy nga aldaw. Ket insuro kaniak ti amak dagiti amin a wagas ti Dios.

42 Ket napasamak, a bayat ti panagdaliasatko manipud iti daga ti Cainan, babaen ti baybay iti daya, nakakitaak iti parmata; ket addayta, nakitak dagiti langit, ket nagsao ti Apo kaniak, ket binilinnak; gapuna, para iti daytoy, tapno matungpal ti bilin, isaok dagitoy a balikas.

43 Ket intuloy ni Enoc ti panagsaona, a kinunana: Ti Apo a nagsao kaniak, isu met laeng ti Dios iti langit, ket isu ti Diosko, ken Diosyo, ket kakabsatkayo, apay a ^abagbagaanyo ti bagbagiyo, ket tallikudanyo ti Dios iti langit?

44 Inaramidna dagiti langit; ti ^adaga ti ^bpagbatbatayanna; ken kukuana ti pamuon. Adtoy, impatakderna, ket imbaonna ti pangen ti tao iti rabawna.

45 Ket dimteng ti patay kadagiti ammatayo; nupay kasta ammotayo ida, ket saantayo a matallikudan, ket ammotayo pay ti kaunaan ti amin, nga isu ni Adan.

46 Ta naisurattayon ti libro a ^apakalaglagipan, a mainugot iti pagtuladan nga inted ti ramay ti Dios; ket naited babaen ti pagsasaotayo.

47 Ket bayat ti panangisao ni Enoc kadagiti balikas ti Dios, naggarigengen dagiti tao, ket saanda a makatakder iti sangona.

48 Ket kinunana kadakuada: Gapu ta ^anatnag dayta nga Adan, kastatayo met; ket iti pannakatnagna immay ni ^bpatay; ket naikudi a makiranudtayo iti kinaay-ay-ay ken kinakakaasi.

49 Adtoy immay ni Satanas kadagiti annak ti tattao, ket ^asinulisogna ida nga agdaydayaw kenkuana; ket nagbalin dagiti tao a ^bnailubongan, ^cnainlasagan, ken simmairo, ket ^dnaisinada iti imatang ti Dios.

50 Ngem impakaammo ti Dios kadagiti ammatayo a nasken nga agbabawi amin a tao.

51 Ket inawaganna ti amatayo a ni Adan babaen ti bukodna a timek, a kinunana: Siak ti Dios, inaramidko ti lubong, ken ^atattao ^bsakbay a nagtagilasagda.

52 Ket kinunana pay kenkuana: No sumurotkayo kaniak, ken denggenyo ti timekko, ket mamatikayo, ket agbabawikayo iti amin a basolyo, ket ^amabuniagankayo, a kas iti danum, iti nagan ti Bugbugtong nga Anakko, a napno iti ^bparabur ken kinapudno, nga isu ni ^cJesucristo, ti kakaisuna a ^dnagan a maited iti baba ti langit, umay ti ^epannakaisalakan kadagiti annak ti tattao, maawatyonto ti sagut ti Espiritu Santo, iti panagdawatyo iti amin a banag iti naganna, ket ania man ti dawatenyo, maitedto kadakayo.

53 Ket nakisao ti amatayo a ni Adan iti Apo, a kinunana: Apay a nasken nga agbabawi dagiti tao ken mabuniagan iti danum? Ket kinuna ti Apo ken ni Adan: Adtoy ^apinakawankon ti basolmo iti Minuyongan ti Eden.

54 Iti kasta nakadanon kadagiti tao iti adayo, a ^asinubbot ti ^bAnak ti Dios ti sigud a basol, a saan a pangsungbatan dagiti ^cannak ti basol dagiti nagannak, ta awan pay ti basolda manipud iti punganay ti lubong.

55 Ket nagsao ti Apo ken ni Adan, a kinunana: Gapu ta nainaw dagiti annakmo iti basol, a kas iti panangrugida nga agdakkel, nainawen ti ^abasol iti puspusoda, ket ramananda ti ^bpait, tapno ammoda nga ipateg ti naimbag.

56 Ket naited kadakuada a mangammo iti naimbag manipud iti dakes; gapuna ^aisuda ti agtignay iti bagbagida, ket intedko kadakayo ti sabali a paglintegan ken bilin.

57 Gapuna isuroyo kadagiti annakyo, tapno amin a tao, iti sadino man, nasken nga ^aagbabawi, wenno pulos a dida matawid ti pagarian ti Dios, ta awan ti ^bnarugit a banag a makapagtaeng sadiay, wenno ^cmakapagtaeng iti sidongna; ta, iti pagsasao ni Adan, ^dTao ti Kinasanto ti naganna, ket ^eAnak ti Tao ti nagan ti Bugbugtongna, nga isu ni Jesucristo, ti nalinteg nga ^fUkom, nga umayto iti kangitingitan ti panawen.

58 Ngarud bilinenkayo, nga isuroyo a siwawayawaya dagitoy a banag kadagiti ^aannakyo, a kunayo:

59 Gapu iti basol umay ti pannakatnag, pannakatnag a mangyeg iti patay, ket gapu ta naipasngaykayo iti lubong babaen ti danum, ken dara, ken ti ^aespiritu, nga inaramidko, ket isu a nagbalin ti ^btapok a nabiag a kararua, a kas iti pannakasapul ti ^cpannakaipasngayyo manen iti pagarian ti langit, ti ^ddanum, ken iti Espiritu, ket maugasankayo babaen iti dara, nga isu ti dara ti Bugbugtongko; tapno mapasantokayo manipud iti amin a basol, ket ^enanamenyo dagiti ^fbalikas ti agnanayon a biag iti daytoy a lubong, ken ti agnanayon a biag iti umay a lubong, nga isu ti ^ggloria nga awan ti patay;

60 Ta babaen ti ^adanum tungpalenyo ti bilin; babaen ti Espiritu ^bmaikalintegankayo, ken babaen ti ^cdara ^dmapasantokayo;

61 Ngarud naited daytoy a surotenyo; ti kasuratan ti langit; ti ^aMangliwliwa; dagiti makapatalinaay a banag ti gloria nga awan ti patay; ti kinapudno dagiti amin a banag; a mamagungar kadagiti amin a banag, a mangbibiag kadagiti amin a banag; a makaammo kadagiti amin a banag, ken addaan iti amin a bileg a maibatay iti pagsiriban, kaasi, kinapudno, linteg, ken pangngeddeng.

62 Ket ita, adtoy, kunak kadakayo: Daytoy ti ^aplano ti pannakaisalakan dagiti amin a tao, babaen ti dara ti ^bBugbugtongko, nga umayto iti kangitingitan ti panawen.

63 Ket adtoy, adda pagkakaarngian amin a banag, ket naparsua amin a banag ken naaramid a ^amangpaneknek kaniak, agpadpada dagiti banag a naindagaan, ken dagiti banag a naespirituan; dagiti banag nga adda iti nangato a langit, ken bambanag nga adda iti daga, ken bambanag nga adda iti uneg ti daga, agpadpada iti ngato ken iti uneg: amin a banag paneknekandak.

64 Ket napasamak, kalpasan ti pannakisao ti Apo ken ni Adan, ti amatayo, nga immararaw ni Adan iti Apo, ket intayab ti ^aEspiritu ti Apo, ket naipan iti ^bdanum, ket naipabatok iti danum, ken nailung-aw iti danum.

65 Ket kastoy ti pannakabuniagna, ket bimmaba kenkuana ti Espiritu ti Dios, ket kastoy ti ^apannakaipasngayna iti Espiritu, ket nagungar iti ^bakin-uneg a kinataona.

66 Ket nangngegna ti timek a nagtaud iti langit, a nagkuna: ^aMabuniaganka iti apuy, ken iti Espiritu Santo. Daytoy ti ^bkasuratan ti Ama, ken ti Anak, manipud ita ken iti agnanayon;

67 Ket adda kenka ti ^aalagadenna nga awan ti aldaw a namunganayanna wenno tawen a paggibusanna, manipud iti kinaagnanayon agingga iti kinaagnanayon.

68 Adtoy, ^amaysaka kaniak, ti anak ti Dios; ket kastoy nga agbalin koma ti amin nga ^bannakko. Amen.