Pakauna


Pakauna

Ti Perlas a Kapatgan ti nakaurnongan dagiti napili a sinurat a mangagapad kadagiti adu a napapateg a kita ti pammati ken doktrina ti Ti Simbaan ni Jesucristo dagiti Santo iti Ud-udina nga Aldaw. Insurat ni Propeta Joseph Smith dagitoy a banag ket naipablaakda kadagiti pagiwarnak ti Simbaan idi panawenna.

Ni Elder Franklin D. Richards, kameng idi ti Konseho ti Sangapulo-ket-dua ken presidente ti British Mission, ti nangurnong idi 1851 ti immuna a nakaurnongan dagiti sinurat a napauluan iti Perlas a Kapatgan. Panggep daytoy ti nalaklaka a pannakaidanon dagiti napateg nga artikulo a limitado ti sirkulasionna idi panawen ni Joseph Smith. Iti yaadu ti kameng ti Simbaan iti intero a Europa ken America nasken unay ti pannakaiwaras dagitoy a sinurat. Sapasap ti pannakaawat ti Perlas a Kapatgan a nagbalin idi agangay a maysa a libro ti nasantuan a kasuratan iti Simbaan babaen ti panangipaulog ti Umuna a Panguluen ken iti sapasap a taripnong iti Salt Lake City idi Oktubre 10, 1880.

Sumagmamano a panangbalbaliw ti naaramid iti linaonna a kas iti kasapulan ti Simbaan. Nainayon idi 1878 dagiti paset ti Libro ni Moises a saan a nainayon iti immuna nga edision. Naikkat idi 1902 ti sumagmamano a paset ti Perlas a Kapatgan a nakakopiaan dagiti sinurat a naipablaak met iti Doktrina ken Katulagan. Naaramid idi 1902 ti pannakaurnos dagiti kapitulo ken bersikulo, nga adda dagiti pangilawlawag a sinurat iti baba. Idi 1921 ti immuna a pannakaipablaak ti dua-kadasig a pinanid, nga addaan iti pagsurotan. Awanen ti naaramid a panangbalbaliw agingga idi Abril 1976, nga adda dua a banag a paltiing a nainayon. Idi 1979 naikkat dagitoy dua a banag iti Perlas a Kapatgan ket naikabil iti Doktrina ken Katulagan, a pagparanganda ita a kas benneg 137 ken 138. Sumagmamano a panangbalbaliw ti naaramid iti agdama nga edision tapno mayalubog kadagiti immun-una a dokumento.

Ti sumaganad ti ababa a pakauna ti agdama a linaonna:

  • Dagiti Napili manipud iti Libro ni Moises. Naadaw manipud iti libro ti Genesis iti Patarus ni Joseph Smith iti Biblia, nga inrugina idi Hunio 1830. (History of the Church, 1:98–101, 131–139.)

  • Ti Libro ni Abraham. Ti patarus manipud iti sumagmamano a papirus ti Egipto a nakadanon kadagiti ima ni Joseph Smith iti 1835, a naglaon kadagiti sinurat ti patriarka a ni Abraham. Nasagsaginnit a naipablaak ti patarus iti Times and Seasons manipud iti Marso 1, 1842, iti Nauvoo, Illinois. (History of the Church, 4:519–534.)

  • Joseph Smith—Mateo. Naadaw manipud iti pammaneknek ni Mateo iti Patarus ni Joseph Smith iti Biblia (kitaen ti Doktrina ken Katulagan 45:60–61 para iti nailangitan a bilin a pannakairugi iti pannakaipatarus ti Baro a Tulag).

  • Joseph Smith—Pakasaritaan. Naadaw manipud iti opisial a pammaneknek ken pakasaritaan ni Joseph Smith, nga insaganana idi 1838, ken nasagsaginnit a naipablaak iti Times and Seasons iti Nauvoo, Illinois, manipud iti Marso 15, 1842. (History of the Church, 1:1–44.)

  • Ti Pagannurotan ti Pammati ti Ti Simbaan ni Jesucristo dagiti Santo iti Ud-udina nga Aldaw. Ti pammalawag ni Joseph Smith a naipablaak iti Times and Seasons, Marso 1, 1842, a naikuyog iti ababa a pakasaritaan ti Simbaan nga ammo unay a kas Surat ni Wentworth (History of the Church, 4:535–541).