1 Ket napasamak a nagsao ti Apo ken ni Moises, a kinunana: Adtoy, ^aipalgakko kenka ti maipanggep iti daytoy a ^blangit, ken daytoy a ^clubong; isuratmo dagiti balikas nga ibagak. Siak ti Pangrugian ken Panungpalan, ti ^dMannakabalin a Dios; babaen ti ^eBugbugtongko ^fpinarsuak dagitoy a banag; wen, idi punganay pinarsuak ti langit, ken ti daga a pagtaktakderam.

2 Ket awan idi ti kita ti ^alubong, ket awan serserbina; ket imbilinko ti yaadda ti sipnget iti rabaw ti danum, ket naggunay ti Espirituk iti rabaw ti danum; ta siak ti Dios.

3 Ket siak, a Dios, kinunak: Adda koma ^alawag; ket napaadda ti lawag.

4 Ket siak, a Dios, nakitak ti lawag; ket ^anasayaat dayta a lawag. Ket siak, a Dios, inlasinko ti lawag iti sipnget.

5 Ket siak, a Dios, inawagak ti lawag iti Aldaw; ket ti sipnget, inawagak iti Rabii; ket inaramidko daytoy babaen ti ^abalikas ti bilegko, ket naaramid bayat ti ^bpanagsaok; ket ti rabii ken ti agsapa ti immuna nga ^caldaw.

6 Ket manen, siak, ti Dios, kinunak: Mapaadda koma ti ^atangatang iti ngato ti danum, ket napasamak, a kas iti sinaok; ket kinunak: Mabingay koma dagiti danum manipud kadagiti danum; ket naaramid;

7 Ket siak, a Dios, inaramidko ti tangatang ken biningayko dagiti ^adanum, wen, dagiti dadakkel a danum iti sirok ti tangatang manipud kadagiti danum nga adda iti ngato ti tangatang, ket talaga a kasta a kas iti sinaok.

8 Ket siak, ti Apo, inawagak ti tangatang iti ^aLangit; ket ti rabii ken ti agsapa ti maikadua nga aldaw.

9 Ket siak, a Dios, kinunak: Maummong koma dagiti danum iti sirok ti langit iti ^amaymaysa a disso, ket naaramid; ket siak, a Dios, kinunak: Adda koma namaga a daga; ket naaramid.

10 Ket siak, a Dios, inawagak ti namaga a daga iti ^aLubong; ken iti pannakaurnong dagiti danum a sangsangkamaysa, inawagak iti Baybay; ket siak, a Dios, a nasayaat amin a banag nga inaramidko.

11 Ket siak, a Dios, kinunak: Adda koma ^aruot a lumtuad iti daga, ket maaddaan koma iti bukel dagiti ruot, agbunga koma ti kayo nga agbunga, iti kakikitana, ket agtinnag koma ti bukelna iti daga, ket naaramid a kas iti sinaok.

12 Ket naaddaan ti daga iti ruot, a tunggal ruot namataud iti bukel a kakikitana, ken nagbunga dagiti kayo, a naaddaan iti bukel iti kakikitana; ket siak, ti Dios, nakitak a nasayaat amin a banag nga inaramidko;

13 Ket ti rabii ken ti agsapa ti maikatlo nga aldaw.

14 Ket siak, a Dios, kinunak: Adda koma lawag iti tangatang ti langit, a mangilasin iti aldaw iti rabii, ket isuda koma dagiti tanda, ken iti panawen, ken kadagiti aldaw, ken kadagiti tawen;

15 Ket dagiti koma lawag iti tangatang ti langit ti mangted lawag iti daga; ket naaramid.

16 Ket siak, a Dios, nangaramidak iti dua a naindaklan a lawag; ti napigpigsa a ^alawag ti mangituray iti aldaw, ket ti nakapkapsut a lawag ti mangituray iti rabii, ket ti init ti napigpigsa a lawag, ket ti bulan ti nakapkapsut a lawag; ket naaramid met dagiti bituen a maibatay iti balikasko.

17 Ket siak, a Dios, impuestok ida iti tangatang ti langit a mangted lawag iti daga.

18 Ket ti init ti mangituray iti aldaw, ken ti bulan ti mangituray iti rabii, ken mangilasin iti lawag iti sipnget; ket siak, a Dios, nakitak a nasayaat amin a banag nga inaramidko;

19 Ket ti rabii ken ti agsapa ti maikapat nga aldaw.

20 Ket siak, a Dios, kinunak: Maikkan koma iti umdas a danum dagiti aggunggunay a parsua nga addaan biag, ken tumatayab a makatayab iti ngato ti daga iti nawaya a tangatang ti langit.

21 Ket siak, a Dios, pinarsuak dagiti dadakkel a ^abaliena, ken tunggal nabiag a parsua nga aggunggunay, nga adu nga agtaud iti dandanum, iti kakikitada, ken tunggal nagpayak a tumatayab iti kakikitana; ket siak, a Dios, nakitak a nasayaat amin a banag a pinarsuak.

22 Ket siak, a Dios, binendisionak ida, a kinunak: agbungakayo, ket ^aagpaadukayo, ket punnuenyo ti dandanum iti baybay; ket umadu koma dagiti tumatayab iti daga;

23 Ket ti rabii ken ti agsapa ti maikalima nga aldaw.

24 Ket siak, a Dios, kinunak: Adda koma tumaud iti daga a nabiag a parsua iti kakikitana, baka, ken agkarayam a bambanag, ken ayup iti daga iti kakikitada, ket naaramid;

25 Ket siak, a Dios, inaramidko dagiti ayup iti daga iti kakikitada, ken baka iti kakikitada, ken amin nga agkarayam iti daga iti kakikitada; ket siak, a Dios, nakitak a nasayaat amin dagitoy a banag.

26 Ket siak, a Dios, kinunak iti ^aBugbugtongko, a kaduak manipud pay idi punganay: ^bMangaramidta iti tao a ^ckaing-ingasta, a kas iti kalalangata; ket naaramid. Ket siak, a Dios, kinunak: Isuda koma ti ^dmangituray kadagiti lames iti baybay, ken kadagiti tumatayab iti law-ang, ken kadagiti baka, ken kadagiti amin iti daga, ken kadagiti tunggal agkarayam a banag nga agkarayam iti rabaw ti daga.

27 Ket siak, a ^aDios, pinarsuak ti tao a kaing-ingasko, iti kaing-ingas ti Bugbugtongko pinarsuak isuna; pinarsuak ti lalaki ken babai.

28 Ket siak, a Dios, binendisionak ida, ket kinunak kadakuada: Agbungakayo, ket ^aagpaadukayo, ken punnuenyo ti daga, ket parmekenyo, ket iturayanyo dagiti ikan iti baybay, ken tumatayab iti tangatang, ken tunggal banag a nabiag nga aggaraw iti rabaw ti daga.

29 Ket siak, a Dios, kinunak iti tao: Adtoy, intedko kenka ti tunggal ruot a mangted iti bukel, nga adda iti amin a rabaw ti daga, ken tunggal kayo a mangted iti bunga a kayo a pagtaudan iti bukel; kadakayo agbalinto a ^ataraonyo.

30 Ken iti tunggal ayup iti lubong, ken tunggal tumatayab iti tangatang, ken iti amin a banag nga agkarayam iti daga, a nangtedak iti biag, addanto maited a nadalus a ruot a taraon; ket naaramid, a kas iti sinaok.

31 Ket siak, a Dios, nakitak amin a banag nga inaramidko, ket, adtoy, ^anasayaat unay dagiti amin a banag nga inaramidko; ket ti rabii ken ti agsapa ti ^bmaikanem nga aldaw.