1 Kasta ti ^apannakaileppas ti langit ken ti daga, ken amin dagiti ^bagtaeng kadakuada.

2 Ket iti maikapito nga aldaw siak, a Dios, inleppasko ti aramidko, ken amin dagiti banag nga inaramidko; ket ^anaginanaak iti ^bmaikapito nga aldaw kadagiti amin nga aramidko, ket nalpas amin dagiti banag nga inaramidko, ket siak, a Dios, nakitak a nasayaatda.

3 Ket siak, a Dios, ^abinendisionak ti maikapito nga aldaw, ken pinasantok daytoy; gapu ta iti daytoy naginanaak kadagiti amin nga ^baramidko a siak, a Dios, pinarsua ken inaramidko.

4 Ket ita, adtoy, kunak kenka, a dagitoy ti kaputotan ti langit ken ti daga, idi naparsuada, iti aldaw a siak, ti Apo a Dios, inaramidko ti langit ken ti daga.

5 Ket tunggal mula iti talon ^asakbay a naipan iti daga, ken tunggal ruot iti talon sakbay a dimmakkel. Ta siak, ti Apo a Dios, ^bpinarsuak amin a banag, a kas iti nasaokon, a ^cnaespirituan, sakbay a nagbalinda a gagangay iti rabaw ti daga. Ta siak, ti Apo a Dios, diak impalubos nga agtudo iti rabaw ti daga. Ken siak, ti Apo a Dios, ^dpinarsuak amin nga annak ti tattao; ken awan pay ti tao a mangsukay iti ^edaga; ta ^fpinarsuak ida iti ^glangit; ket awan pay ti lasag iti daga, wenno iti danum, wenno iti tangatang;

6 Ngem siak, ti Apo a Dios, nagsaoak, ket adda danum a ^apimsuak iti daga, ket sinibuganna ti intero a rabaw ti daga.

7 Ket siak, ti Apo a Dios, binukelko ti tao manipud iti ^atapok iti daga, ket pinuyotak ti agongna iti anges ti biag; ket nagbalin a sibibiag a ^bkararua ti ^ctao, ti ^dkaunaan a lasag iti rabaw ti daga, isu met ti immuna a tao; nupay kasta, immuna a naparsua amin a banag; ngem naparsuada a naespirituan ken naaramidda a maibatay iti balikasko.

8 Ket siak, ti Apo a Dios, minulaak ti minuyongan iti dayaen ti ^aEden, ket sadiay nga impanko ti tao a binukelko.

9 Ket manipud iti daga inaramidko siak, ti Apo a Dios, a pagtubuan ti kayo, a gagangay, a makaay-ayo iti imatang ti tao; ket makita ti tao. Ket nagbalin met a nabiag a kararua. Ta naespirituan iti aldaw a panangparsuak iti daytoy; ta nagtalinaed iti lubong a siak, a Dios, nangparsuaak itoy, wen, a kas kadagiti amin a banag nga insaganak nga aramaten ti tao; ket nakita ti tao a nasayaat a taraon. Ket siak, ti Apo a Dios, immulak met ti ^akayo ti biag iti tengnga ti minuyongan, ken kasta met ti ^bkayo ti pannakaammo iti naimbag ken dakes.

10 Ket siak, ti Apo a Dios, imbilinko iti karayan nga agturong iti Eden a mangsibug iti minuyongan; ket nabingay manipud dita, ket nagbalin nga uppat ti ^aulona.

11 Ket siak, ti Apo a Dios, pinanaganak ti immuna iti Pison, ket sinaknapna ti intero a daga iti Havila, a nangparsuaak siak, ti Apo a Dios, iti adu a balitok;

12 Ket napintas ti balitok iti dayta a daga, ket adda bimmalitok a briliante ken bato a karnelia.

13 Ket Gihon ti nagan ti maikadua a karayan; nga isu met laeng ti nangsakup iti intero a daga ti Etiopia.

14 Ket Hiddekel ti nagan ti maikatlo a karayan; nga agturong iti daya ti Asiria. Ket Eufrates ti maikapat a karayan.

15 Ket siak, ti Apo a Dios, innalak ti tao, ket inkabilko iti minuyongan ti Eden, a mangtaripato, ken mangaywan iti daytoy.

16 Ket siak, ti Apo a Dios, binilinko ti tao, a kinunak: Kadagiti amin a kayo iti minuyongan siwawayaka a mangan,

17 Ngem iti kayo ti pannakaammo iti naimbag ken dakes, dikanto mangan, nupay kasta, siwawayaka a ^amangpili iti kayatmo, ta naited kenka; ngem, laglagipem nga iparitko, ta iti ^baldaw nga ikakaanmo iti dayta awan duadua a ^cmataykanto.

18 Ket siak, ti Apo a Dios, kinunak iti ^aBugbugtongko, a saan a nasayaat nga agmaymaysa ti tao; gapuna, mangaramidak iti ^bkaduana.

19 Ket manipud iti daga nangbukelak siak, ti Apo a Dios, iti tunggal ayup iti talon, ken tunggal tumatayab iti law-ang; ket binilinko ida nga umasidegda ken ni Adan, ta kitaenda no ania ti yawagna kadakuada; ken nabiagda met nga espiritu; ta siak, a Dios, impuyotko kadakuada ti anges ti biag, ken imbilinko nga ania man ti yawag ni Adan iti tunggal nabiag a parsua, daytanto ti naganda.

20 Ket inikkan ni Adan ti nagan dagiti amin a dinguen, ken kadagiti tumatayab iti tangatang, ken tunggal ayup iti talon; ngem ken ni Adan, awan ti masarakan a kaduana.

21 Ket siak, ti Apo a Dios, pinaturogko ni Adan iti narnek; ket naturog, ket nangalaak iti maysa kadagiti paragpagna ket pinaglunitko ti lasag a naggapuanna;

22 Ket ti paragpag nga innalak siak, ti Apo a Dios, iti tao, inaramidko a ^ababai, ket intedko iti lalaki.

23 Ket kinuna ni Adan: Daytoy ammok ita nga isu ti tulang dagiti tulangko, ken ^alasag ti lasagko; maawaganto iti Babai, gapu ta nagtaud iti lalaki.

24 Ngarud no panawanto ti lalaki ti ama ken ti inana, ket ^amakitipon iti asawana; ket ^bmaymaysadanto a lasag.

25 Ket agpadpadada a lamulamo, ti lalaki ken ti asawana, ket saanda a nagbain.