Vaega 25
Faaaliga na tuuina mai e ala mai ia Iosefa Samita le Perofeta, i Haramoni, Penisilevania, Iulai 1830. (tagai i le ulutala o le vaega 24). O lenei faaaliga ua faaali mai ai le finagalo o le Alii ia Emma Samita, le faletua o le Perofeta.
1–6, O Emma Samita, o se tamaitai filifilia, ua valaaulia e fesoasoani ma faamafanafana i lana tane; 7–11, Ua valaaulia foi o ia e tusi, ma faamalamalama atu tusitusiga paia, ma filifili viiga; 12–14, O le pese a le amiotonu o se tatalo i le Alii; 15–16, O mataupu autu o le usiusitai ua i ai i lenei faaaliga ua faatatau i tagata uma.
1 Faalogo mai i le siufofoga o le Alii lou Atua, a’o Ou tautala atu ia te oe, Emma Samita, lo’u afafine e; aua e moni Ou te fai atu ia te oe, o i latou uma o e e talia la’u talalelei o atalii ma afafine i lo’u malo.
2 Ou te tuu atu ia te oe se faaaliga e faatatau i lo’u manao; ma afai e te faamaoni ma savali i o’u luma i ala o le amiomama, o le a Ou faasaoina lou ola, ma o le a e maua se tofi i Siona.
3 Faauta, ua faamagaloina au agasala, ma o oe o se tamaitai filifilia, o lē ua Ou valaaulia.
4 Aua le muimui ona o mea e te le’i vaai i ai, ona ua taofia ia mea mai ia te oe ma mai le lalolagi, o le poto lea ia te a’u i se taimi o le a oo mai.
5 Ma o le tofi o lou valaauga o le avea ma se faamafanafanaga i la’u auauna, o Iosefa Samita, Le Itiiti, lau tane, i ona puapuaga, i upu faamafanafana, i le agaga o le agamalu.
6 Ma ia e alu faatasi ma ia i le taimi e alu ai o ia, ma avea ma tusiupu mo ia, a’o lē o i ai se tasi e avea ma tusiupu mo ia, ina ia mafai ona Ou auina atu la’u auauna, o Oliva Kaotui, i soo se mea Ou te loto i ai.
7 Ma o le a faauuina oe i lalo o lona lima e faamalamalama atu tusitusiga paia, ma apoapoai atu i le ekalesia, e tusa ma mea o le a tuuina atu ia te oe e lo’u Agaga.
8 Aua o le a ia faaee ona lima i ou luga, ma o le a e maua ai le Agaga Paia, ma ia tuu atu lou taimi i le tusitusi, ma le aoao tele.
9 Ma e lē tatau ona e fefe, ona o le a lagolagoina oe e lau tane i le ekalesia; ona o lona valaauga ua ia te i latou, ina ia mafai ona faaalia o mea uma ia te i latou, i soo se mea Ou te loto i ai, e tusa ai ma lo latou faatuatua.
10 Ma e moni Ou te fai atu ia te oe, ia e tuu ese mea o lenei lalolagi, ma saili mo mea o se lalolagi sili atu ona lelei.
11 Ma o le a tuu atu foi ia te oe, e faia se filifiliga o viiga paia, e pei ona o le a tuu atu ia te oe, ua Ou fiafia i ai, ia i ai i la’u ekalesia.
12 Aua e fiafia lo’u agaga i le pese o le loto; ioe, o le pese a e amiotonu o se tatalo mai ia te a’u, ma o le a talia ma se faamanuiaga i luga o o latou ulu.
13 O le mea lea, ia siitia a’e i luga lou loto ma olioli, ma pipii atu i feagaiga ua e faia.
14 Tumau pea i le agaga o le agamalu, ma faaeteete i le faamaualuga. Tuu atu lou agaga e fiafia i lau tane, ma le mamalu o le a oo mai i ona luga.
15 Tausi i a’u poloaiga e lē aunoa, ma o le a e maua ai se pale o le amiotonu. Ma vagana ai ua e faia lenei mea, o le mea ua Ou i ai, e lē mafai ona e sau i ai.
16 Ma e moni, e moni, Ou te fai atu ia te oe, o lo’u leo lenei i tagata uma. Amene.