1 E Moni ua faapea ona fetalai mai o le Alii i la’u auauna o Viliamu Mareko, ma la’u auauna foi o Newel K. Whitney, ia tuu atu ia te i laua e vave ona faamautu a laua pisinisi ma malaga atu mai le laueleele o Katelani, ae lei toe auina atu e A’u, o le Alii, le kiona i luga o le lalolagi.

2 Ia tuu atu ia i laua ia ala mai, ma tutulai, ma o mai, ma lē faatuai, aua o A’u, o le Alii, ua poloai atu ai.

3 O lea, afai la te faatuai o le a lē lelei ia i laua.

4 Ia tuu atu ia te i laua ia salamo ia laua agasala uma, ma o laua naunauga faaletu’inanau uma, i o’u luma, ua fetalai mai ai le Alii; aua o a ea meatotino ia te a’u? ua fetalai mai ai le Alii.

5 Ia tuu atu meatotino a Katelani ia faaliliu atu mo ’aitalafu, ua fetalai mai ai le Alii. Ia tuu atu ia mea, ua fetalai mai ai le Alii, ma o soo se mea e totoe, ia tuu pea i o oulua lima, ua fetalai mai ai le Alii.

6 Aua, pe ua lē a a’u ea manu felelei o le lagi, ma i’a foi o le sami, ma manu vaefa o mauga? Ou te lei faia ea le lalolagi? Ua Ou lē umia ea taunuuga o autau uma a atunuu o le lalolagi?

7 O lea, Ou te lē faia ea nofoaga tuufua ia fotu ma fuga mai, ma fua tele mai? ua fetalai mai ai le Alii.

8 Ua lē lava ea se avanoa i luga o mauga o Atamu-onai-Amani, ma i luga o fanua laugatasi o Olaha Shinehah, po o le laueleele sa nofo ai Atamu, ua tatau ai ona oulua mananao i lena mea ua na o se matāua, ma faatalalē ai i mataupu sili atu ona mamafa?

9 O lea, o mai i luga nei i le laueleele o lo’u nuu, o Siona.

10 Ia tuu atu i la’u auauna o William Marks ia faamaoni i mea iti, ma o le a avea ai o ia ma pule i mea e tele. Ia tuu atu ia te ia e pulefaamalumalu i totonu o lo’u nuu i le aai o Fa Uesi, ma ia tuu atu ia te ia ia faamanuiaina i faamanuiaga o lo’u nuu.

11 Ia tuu atu i la’u auauna o Newel K. Whitney ia maasiasi i le au Nikalaitai ma a latou mea inosia faalilolilo uma, ma lona faatauvaa atoa o le agaga i o’u luma, ua fetalai mai ai le Alii, ma sau i luga i le laueleele o Atamu-onai-Amani, ma avea o se epikopo i lo’u nuu, ua fetalai mai ai le Alii, e lē i le igoa ae i galuega, ua fetalai mai ai le Alii.

12 O lenei foi, Ou te fai atu ia te outou, Ou te manatua la’u auauna o Oliver Granger; faauta, e moni Ou te fai atu ia te ia o le a paia le manatua o lona igoa mai lea tupulaga i lea tupulaga, e faavavau faavavau lava, ua fetalai mai ai le Alii.

13 O lea, ia tuu atu ia te ia e finafinau faamaoni mo le laveaiina o le Au Peresitene Sili o la’u Ekalesia, ua fetalai mai ai le Alii; ma a pa’ū o ia o le a toe tulai mai o ia, ona o le a sili atu le paia o lana taulaga ia te a’u nai lo ana oloa e tele, ua fetalai mai ai le Alii.

14 O lea, ia tuu atu ia te ia ia sau vave iinei, i le laueleele o Siona; ma o le a faia o ia ma faatauoloa mo lo’u igoa i le taimi e tatau ai, ua fetalai mai ai le Alii, mo le manuia o lo’u nuu.

15 O lea ia leai se tagata e inoino i la’u auauna o Oliver Granger, ae ia tuu atu faamanuiaga o lo’u nuu ia i ona luga e faavavau faavavau lava.

16 O lenei foi, e moni Ou te fai atu ia te outou, ia tuu atu i a’u auauna uma i le laueleele o Katelani ia manatua le Alii lo latou Atua, ma lo’u fale foi, ia teuina ma tausia i le paia, ma faatoilalo e faatau-tupe i lo’u lava taimi e tatau ai, ua fetalai mai ai le Alii. E faapea lava. Amene.