1 E dua na ivakatakila nei Jisu Karisito ki vua na nona tamata ko Josefa Simici Lailai, kei iratou e lewe ono na italatala qase, ena nodratou vakaduavatataka na lomadratou ka tabalaka cake na domodratou ena masu.

2 Io, na vosa ni Turaga me baleta na nona lotu, sa tauyavutaki ena veisiga e muri oqo me baleta na nodra vakalesui mai na nona tamata, me vaka sa tukuna mai na gusudra na nona parofita, kei na nodra vakasoqoni na nona yalododonu me ra tu ena Ulunivanua ko Saioni, sai koya na Jerusalemi Vou.

3 Na koro oqo ena tara, me tekivu mai na tikina ni valetabu, me vaka a lesi ena iqaqalo ni ligana na Turaga, ena iyalayala ni Yasana ko Misuri vaka ki na ra, ka vakatabui mai na ligai Josefa Simici Lailai, vata kei ira sa dau taleitaka vakalevu na Turaga.

4 Sai koya vakaidina oqo na vosa ni Turaga, ni na tara na koro ko Jerusalemi Vou ena nodra sa vakasoqoni vata mai na yalododonu, me tekivu ena vanua oqo, na tikina ni valetabu, na valetabu ka na tara ena itabatamata oqo.

5 Ni se bera vakaidina ni takali kece yani na itabatamata oqo sa na tara e dua na vale vua na Turaga, ia ena vakaruguta e dua na o, raica na o ni nona lagilagi na Turaga, io ena vakasinaita na loma ni vale.

6 Kei ira na luvei Mosese, me vaka na Matabete Tabu ka a ciqoma mai na ligai na vugona, ko Jecoro;

7 Ia a ciqoma ko Jecoro mai na ligai Kelepi;

8 Ia a ciqoma ko Kelepi mai na ligai Ilaiu;

9 Ia ko Ilaiu mai na ligai Jeremi;

10 Ia ko Jeremi mai na ligai Kata;

11 Ia ko Kata mai na ligai Iseia;

12 Ia ko Iseia a ciqoma mai na liga ni Kalou.

13 Raica a bula ko Iseia ena gauna i Eparaama, ka a vakalougatataki mai vei koya—

14 Ko Eparaama oqo a ciqoma na matabete mai vei Melikiseteki, ko koya a ciqoma ena kena veitarataravi sobu mai vei ira na nona qase me yaco sara yani vei Noa;

15 Ia mai vei Noa ka kauta lesu vei Inoki, ena kena veitarataravi sobu mai vei ira na nodrau qase;

16 Ia mai vei Inoki ki vei Epeli, o koya a vakamatei ena inaki nei tuakana, ka a ciqoma na matabete ena ivakaro ni Kalou ena ligai tamana ko Atama, o koya na imatai ni tamata—

17 Sa mai tudei tu na matabete oqo ena nona lotu na Kalou ena veitabatamata kecega, ka sa sega na itekivu ni kena siga se na icavacava ni kena yabaki.

18 Ia sa vakadeitaka talega na Turaga vei Eroni kei ira na nona kawa e dua na matabete ena nodra veitabatamata kecega, ia ena tudei tu na matabete oqo ka na dau sala vata tiko me sega ni mudu kei na matabete ena kena ivakarau e savasava duadua vua na Kalou.

19 Ia na matabete cecere ena cakacakataka na kosipeli ka na taura tu na idola ni veika vuni ni matanitu, io na idola sara mada ga ni nona kilai na Kalou.

20 Ia, ena vakatakilai mai na kaukauwa ni bula vakalou ena kena veicakacaka vakalotu.

21 Ia kevaka e sega na kena veicakacaka vakalotu, kei na dodonu ni matabete, ena sega ni vakaraitaki vua na tamata ena bula vakayago oqo na kaukauwa ni bula vakalou;

22 Io kevaka sa sega na veika oqo ena sega ni raica rawa na tamata na matana na Kalou, io na Tamana, me qai bula tiko.

23 Ia na veika oqo a vakavulici ira kina vakamatata na luvei Isireli ko Mosese ena loma ni lekutu, ka segata kina vagumatua me vakatabui ira na nona tamata me rawa kina ni ra raica na mata ni Kalou;

24 Ia era sa vakaukauwataka ga na lomadra ka sega ni tiko rawa ena nona iserau; o koya, ni sa waqa na cudru ni Turaga ena vukudra; sa bubului kina ena nona cudru, ni ra na sega ni curu ki na nona ivakavakacegu ni ra sa tiko ga ena lekutu, io na vakacegu oqo sai koya na taucoko ni nona lagilagi.

25 O koya oqo, sa toki Mosese tani kina ena kedra maliwa, ka vakatalega kina na Matabete Tabu;

26 Ia a qai tiko ga na ilesilesi ni matabete lailai, na matabete oqo e tiko kina na idola ni nodra veiqaravi na agilosi kei na kosipeli ni vakavakarau;

27 Na kosipeli oqori e kosipeli ni veivutuni kei na papitaiso, kei na vakabokoci ni ivalavala ca, kei na lawa ni ivakaro ni bula vakayago, ka a vakavuna na Turaga ena nona cudru me tomani tikoga ena kawa i Eroni vei ira na luvei Isireli me yacovi Joni, o koya ka a vakatubura na Kalou, ka sa vakasinaiti tu ena Yalo Tabu mai na ketei tinana.

28 Ni a papitaisotaki ko koya ni sa gone lailai ga, ka tabaki koya na agilosi ni Kalou ki na kaukauwa oqo ni sa qai bogi walu, me vakamalumalumutaka na matanitu vaka-Jiu, ka me vakadodonutaka na nona sala na Turaga e matadra na nona tamata, me ra vakarautaki kina ena nona lako mai na Turaga, o koya sa soli e ligana na kaukauwa kecega.

29 Ka dua tale, sa kilikili me tu na ilesilesi vakaitalatala qase kei na bisopi, io erau sa itutu ga ena matabete levu.

30 Raica sa kilikili tale ga me tu na ilesilesi ni ivakavuvuli kei na dikoni, ia erau sa itutu ena matabete e ra; io na matabete a vakadeitaki vei Eroni kei ira na nona kawa.

31 Ia, me vaka au a tukuna me baleti ira na kawa i Mosese—ko ira na kawa i Mosese kei ira talega na kawa i Eroni era na cabora na ivakacacabo ka na isolisoli sa dodonu ena vale ni Turaga, io na vale oqori ena tara ena itabatamata oqo me nona na Turaga, ena tara ena vanua vakatabui ka’u sa dusia oti—

32 Era na vakasinaiti na kawa i Mosese kei na kawa i Eroni ena lagilagi ni Turaga, ena Ulunivanua ko Saioni ena nona vale na Turaga, dou sa nodrau kawa, koi kemudou; kei na vuqa tale au sa kaciva ka tala yani me ra tara cake na noqu lotu.

33 Ni ko koya sa yalodina ena kena rawati na matabete ruarua au sa tukuna tiko oqo, ka vakalevulevuya na itavi era kacivi kina, era na vakatabui ena Yalo ka na vakavoui na yagodra.

34 A sa yaco me ra luvei Mosese ka luvei Eroni ka ra sa kawa i Eparaama, kei na lotu kei na matanitu, ka ra sa digitaki ni Kalou.

35 Ia ko ira kece era sa ciqoma na matabete era sa ciqomi au, sa kaya na Turaga;

36 Ni ko koya sa ciqoma na noqu italai sa ciqomi au;

37 Ia ko koya sa ciqomi au sa ciqomi Tamaqu;

38 Ia ko koya sa ciqomi Tamaqu sa ciqoma na matanitu i Tamaqu; o koya ena soli kina vua na ka kecega sa tu vei Tamaqu.

39 Ka sa vakaoqori na bubului kei na veiyalayalati e nona na matabete.

40 Ia, ko ira kece era sa ciqoma na matabete, era sa ciqoma na bubului kei na veiyalayalati oqo nei Tamaqu, ka na sega vakadua ni voroka ko koya, ena sega talega ni rawa ni yavalati.

41 Ia ko koya ena voroka na veiyalayalati ni sa ciqoma oti, ka qai vuki tani vakadua mai kina, ena sega sara ni vosoti na nona ivalavala ca ena bula oqo se na bula sa bera mai.

42 Raica ena ca vei ira kece sa sega ni curu ki na matabete oqo dou sa ciqoma, ka’u sa vakadeitaka oqo vei kemudou sa tiko eke edaidai, ena domoqu sa rogo mai lomalagi; raica au sa lesi ira na kai lomalagi kei ira na noqu agilosi me ra vakatawai kemudou.

43 Kau sa solia vei kemudou e dua na ivakaro mo dou qarauni kemudou kina, mo dou gumatua ni muria na veivosa ni bula tawamudu.

44 Ni dou na bula ena vosa kecega e tau mai na gusuna na Kalou.

45 Ni dina na vosa ni Turaga, ia ni ka kecega e dina e vu ni rarama, ia na ka kecega e vu ni rarama e Yalo Tabu, io na Yaloi Jisu Karisito.

46 Ia na Yalo sa vakararamataki ira na tamata kecega era sa lako mai ki vuravura; ka vakakina ni Yalo sa vakararamataki ira na tamata kecega e vuravura, era vakatudaliga ki na domo ni Yalo.

47 Ia ko ira kecega sa vakatudaliga ki na domo ni Yalo era na lako yani vua na Kalou, io na Tamada.

48 Ka na vakavulici koya ko Tamada ena veiyalayalati sa vakavouya ka vakadeitaka vei kemudou, sa vakadeitaki vei kemudou me yaga vei kemudou, e sega ni yaga walega vei kemudou, ia me yaga ki vuravura kecega.

49 Ka ra sa bula ivalavala ca na tamata kecega e vuravura, ia era sa vutugu ena butobuto kei na veivakabobulataki ni ivalavala ca.

50 Ia ena vuku ni ka oqo dou na kila kina ni ra sa vakabobulataki tu ena ivalavala ca, ni ra sa sega ni lako mai vei au.

51 Ni ko ira kecega sa sega ni lako mai vei au era sa vakabobulataki tu ena ivalavala ca.

52 Ia ko koya sa sega ni ciqoma na domoqu, sa sega ni kila na domoqu, io sa sega ni noqu.

53 Ia ena ka oqo dou na kilai ira kina na dodonu mai na ivalavala ca, ka vakakina ni sa vutugu tu ko vuravura taucoko ena ivalavala ca kei na butobuto io ena gauna sara ga oqo.

54 Ka sa dau vakabutobutotaki na nomudou vakanananu ena veigauna sa oti ena vuku ni tawavakabauta, ka vakakina ena nomudou dau vakawalena na veika dou sa ciqoma—

55 Na dokadoka kei na tawavakabauta oqori sa vakavuna na kena cudruvi na lotu raraba.

56 Io na cudruvi oqori sa tau vei ira na lewei Saioni, ia vei ira taucoko.

57 Ia era na cudruvi tu ga me yacova na gauna era sa veivutuni ka nanuma kina na veiyalayalati vou, io na iVola i Momani kei na ivakaro au sa solia taumada vei ira, sega walega me ra tukuna, ia me ra cakava me vaka na veika au sa vola—

58 Io me ra vuataka na vua e kilikili kei na matanitu i Tamadra; kevaka e sega ena wawa tiko ga na veivakanakuitataki kei na veilewai me na tau vei ira na luvei Saioni.

59 Era na vakadukadukalitaka li na noqu vanua tabu ko ira na lewe ni matanitu? Au sa kaya vakaidina vei kemudou, E segai sara.

60 E dina, e dina au sa kaya vei kemudou dou sa rogoca na noqu vosa, sai koya na domoqu, dou na kalougata ena gauna kece dou ciqoma kina na veika oqo;

61 Niu na vosoti kemudou ena nomudou ivalavala ca ena ivakaro oqo—mo dou tudei tikoga ena nomudou vakanananu ena gauna kecega, kei na yalo ni masumasu, ena wasei ni ivakadinadina ki vuravura taucoko me baleta na veika sa vakatakilai vei kemudou.

62 O koya, mo dou lako yani kina ki vuravura kecega; kei na veivanua kecega dou sega ni rawa ni lako kina mo dou talatala yani kina, me na tete yani kina na ivakadinadina mai vei kemudou ki vuravura kecega ki vei ira na tamata kecega.

63 Ia me vaka au a tukuna vei iratou na noqu iapositolo, au na tukuna tale ga vei kemudou, ni dou sa noqu iapositolo, raica dou sa bete levu ni Kalou; io sai kemudou sa solia vei au ko Tamaqu; raica dou sa wekaqu;

64 Ia, me vaka au a tukuna vei iratou na noqu iapositolo, au na tukuna tale ga vei kemudou, raica ko ira yadua sa vakabauta na nomudou veivosa ka papitaiso e wai me bokoci kina na ivalavala ca, era na ciqoma na Yalo Tabu.

65 Ia na veivakatakilakila oqo, era na cakava ko ira sa vakabauta—

66 Era na kitaka na cakacaka e veivakurabuitaki e vuqa ena yacaqu;

67 Era na vakaseva tani na tevoro ena yacaqu;

68 Era na vakabulai ira sa tauvimate ena yacaqu;

69 Era na rawata me ra rai na mataboko ka rogo na didivara, ena yacaqu;

70 Ka na vosa rawa na yamedra na galu;

71 Ia kevaka e dua sa via vagagai ira, era na sega ni ca kina;

72 Ka na sega talega na kaukauwa ni gata weli gaga me vakaleqai ira.

73 Ia au sa solia vei ira e dua na ivakaro, me ra kakua ni dokadokataka na veika oqo, io me ra kakua tale ga ni ra tukutukuni ira kina ki vuravura; raica sa soli vei kemudou na veika oqo, me yaga vei kemudou ka mo dou vakabulai kina.

74 E dina, e dina au sa kaya vei kemudou, ko ira sa sega ni vakabauta na nomudou vosa, ka sega ni papitaiso e wai ena yacaqu me bokoci kina na nodra ivalavala ca, ka ra ciqoma na Yalo Tabu, era na cudruvi, io era na sega ni rawata na matanitu i Tamaqu, na vanua keirau sa tiko kina kei Tamaqu.

75 Ia na ivakatakila oqo vei kemudou, kei na ivakaro, me sa tekivu vakayacori sara ga ena auwa oqo e vuravura taucoko, io me vunautaki yani na kosipeli vei ira kecega era sa bera ni rogoca.

76 Ia, au sa kaya vakaidina vei ira kecega sa soli vei ira na matanitu—me na vunautaki yani vei ira mai vei kemudou, me ra veivutunitaka na caka cala kecega era dau cakava tu e liu; raica era na cudruvi ena nodra loma ca ka tawavakabauta, ka vakakina ko ira na wekamudou mai Saioni ni ra a saqati kemudou, ni’u sa talai kemudou yani.

77 Raica au sa kaya tale ga vei kemudou na wekaqu, au sa vakatokai kemudou me tekivu oqo ka lako yani mo dou wekaqu, raica sa kilikili me’u tukuna vei kemudou na ivakaro oqo, io mo dou sa wekaqu me vakataki ira na wekaqu ena gauna au a tiko voli kina ena kedra maliwa, raica era a lako yani ka vunautaka na kosipeli ena noqu kaukauwa;

78 Ia au a vakatara vei ira me ra kakua ni kau ilavo se na taga ivaqa, io me kakua tale ga ni rua na nodra kote.

79 Raica au sa talai kemudou yani mo dou vunauci ira na kai vuravura, ka na kilikili kaya na kena isau na tamata daucakacaka.

80 Raica ko koya sa lako yani ka vunautaka na kosipeli oqo ni matanitu ka sega ni guce me yalodina tiko ena ka kecega, ena sega ni lomaocaocataka e dua na ka, io ena sega ni butobuto na yalona, se na yagona, na sui, se na isema, ena kilai ni sa lutu ki na qele e dua na drau ni uluna. Raica era na sega tale ga ni viakana se viagunu.

81 O koya, mo dou kakua ni lomaocaoca ena vuku ni mataka; me baleta na ka mo dou kania se na ka mo dou gunuva, se na ka mo dou vakaisulu kina.

82 Dou nanuma na viavia ni veikau, era sa tubu vakaevei, era sa sega ni daucakacaka se dautali; raica na matanitu kecega e vuravura ena kedra lagilagi kecega, sa sega ni ukutaki me vaka e dua vei ira oqo.

83 Raica sa kila tiko na Tamamudou, o koya sa tiko mai lomalagi, ni dou gadreva na veika kece oqo.

84 O koya mo dou laiva kina na siga ni mataka me lomaocaocataka na kena veika.

85 Dou kakua ni lomaocaocataka na ka mo dou kaya; ia mo dou kumuna cake ena nomudou vakasama e veigauna na vosa ni bula, ka na qai soli vei kemudou ena kena auwa na veika me tukuni me ganita na tamata yadua.

86 O koya me kakua kina ni dua na tamata vei kemudou ena lako yani me vunautaka na kosipeli ni matanitu, mai na gauna oqo ka lako yani me kauta na taga ni ilavo se na taga ivaqa, ni ivakaro oqo sa baleti ira na yalodina sa kacivi ira na Kalou ena lotu me baleta na matanitu.

87 Raica, au sa talai kemudou yani mo dou vunauci ira na kai vuravura ena nodra cakacaka tawadodonu kecega, io mo dou tukuna vei ira na veilewai ena qai yaco mai.

88 Ia ko koya sa ciqomi kemudou, au sa tiko talega kina koi au, ni’u na liu e matamudou. Au na tiko e yasamudou imatau ka tiko tale ga e yasamudou imawi, ia na Yaloqu ena tiko e lomamudou, era na vakavolivoliti kemudou na noqu agilosi me ra laveti kemudou cake.

89 Ia ko koya sa ciqomi kemudou sa ciqomi au tale ga; raica sai koya ena vakani kemudou, vakasulumi kemudou, ka soli ilavo vei kemudou.

90 Ia ko koya sa vakani kemudou, se vakasulumi kemudou, se soli ilavo vei kemudou, ena sega sara ni calata na kena isau.

91 Ia ko koya sa sega ni kitaka na veika oqo, sa sega ni noqu tisaipeli; raica a ka oqo dou sa kilai ira kina na noqu tisaipeli.

92 Ia ko koya sa sega ni ciqomi kemudou, mo dou lako tani duadua mai vua ka savata na yavamudou ena wai, me wai savasava, na wai katakata se na wai batabata, ka vakadinadinataka vua na Tamamudou o koya sa tiko mai lomalagi, ka kakua tale ni lesu vua na tamata ko ya.

93 Ia mo dou kitaka tale ga vakakina ena veikoro kei na koro lelevu kecega dou sa lako kina.

94 Ia, dou vakasaqaqara vagumatua ka kakua ni soreva; ena ca ki na vale koya, se na koro ko ya se na koro levu koya ka na sega ni ciqomi kemudou, se na nomudou vosa, se na nomudou ivakadinadina me baleti au.

95 Ena ca, au sa kaya tale, ki na vale, se na koro se koro levu koya ka na sega ni ciqomi iko, se na nomu vosa, se na nomu ivakadinadina me baleti au;

96 Koi Au, ko Koya sa Kaukauwa Sara, au sa dodoka yani na ligaqu ki na veivanua ka vakanakuitataki ira ena vuku ni nodra caka ca.

97 Ena lako yani na mate dauveitauvi, ka ra na sega ni kau tani mai vuravura me yacova ni’u sa vakacavara na noqu cakacaka; io ena vakayacori kusarawa ena buladodonu—

98 Me yacova ni ra sa kilai au na tamata kecega sa bula tiko, ko ira na tawavanua kei ira na turaga; io era na veikilai vakaidina kei na Turaga, ka ra veirai ena matana votu, ia era na tabalaka cake na domodra, ka ia vata ena nodra lagata vata na sere vou oqo:

99 Sa vakalesui Saioni tale mai na Turaga;Io na Turaga sa sereki ira na nona tamata, na Isireli,Me vaka na digitaki ena loloma soli wale,Ka sa vakayacori ena vakabautaKei na nodra veiyalayalati na nodra qase.

100 Sa sereki ira na nona tamata na Turaga;Sa vesu ko Setani ka sa oti na nona gauna.Sa soqona vata na ka kecega na Turaga me dua.Io na Turaga tale ga sa kauti Saioni sobu mai cake.Sa laveti Saioni cake tale ga e vuravura na Turaga.

101 Sa taratara ko vuravura ka vakasucuma mai na nona kaukauwa;Ia na dina sa vakadeitaki e lomana;A sa rekitaki koya ko lomalagi;Ia sa vakaisulu ena lagilagi ni nona Kalou;Ni sa tucake ko koya ena kedra maliwa na nona tamata.

102 Ia na lagilagi kei na vakarokoroko, na kaukauwa kei na lewa,Me nona tiko ga na noda Kalou; ni sa sinai ena loloma cecere,Na lewa dodonu, na loloma soli wale, kei na vakacegu,Me sega ni mudu ka sega ni mudu. Emeni.

103 Kei na dua tale, e dina, e dina au sa kaya vei kemudou, ni sa kilikili, ko ira yadua sa lako yani me vunautaka na noqu kosipeli tawavakaiyalayala, kevaka e tiko na nodra dui matavuvale, me ra qai vakauta lesu kina na ilavo e lolomataki vei ira, io me ra vakauta lesu se volia kina na ka era gadreva, me vaka sa vakatakila vei ira na Turaga, raica oqo sa dodonu vei au.

104 Ia ko ira e sega na nodra matavuvale, me ra vakauta na ilavo e soli vakailoloma vei ira vua na bisopi mai Saioni, se vua na bisopi mai Oaio, io me vakatabui ena vakarautaki kei na kena tabaki na ivakatakila, kei na kena tauyavutaki ko Saioni.

105 Ia kevaka e dua na tamata sa solia vua e dua vei kemudou e dua na kote, se dua na kote kei na kena isulu, dou solia sara na nomudou ka makawa vei ira na dravudravua ka lako ena marau.

106 Ia kevaka e dua vei kemudou sa vakasinaiti ena Yalo, me rau sala vata kei na dua sa malumalumu, me vakatataki cake kina ena yalomalua; io ena rawa ni kaukauwa sara kina ko koya.

107 Ia, dou kauti ira era sa tabaki ki na matabete lailai, dou talai ira yani me ra liu ka lokuca rawa na sota, ka vakarautaka na ilakolako, ka matataki kemudou ena veivanua sa lokuci oti tu ka dou na sega ni tiko rawa kina.

108 Raica, sa vakaoqo na ivakarau eratou a tara cake kina na noqu lotu na noqu iapositolo ena gauna e liu.

109 Ia, me vakayacora ga na tamata yadua na nona itavi, ka cakacakataka na nona ilesilesi; ia me kakua ni kaya na ulu ki na yava ni sa sega ni yaga vua na yava; raica kevaka sa sega na yava ena qai tucake ena cava na yago?

110 Ka vakakina ni gadreva na yago na veitikina kece sara, me ra na veivakatataki cake vakataki ira, me na taucoko tiko kina na nona cakacaka.

111 Ia raica, e dodonu me ra lako yani na bete levu, ka vakakina o ira na italatala qase, ka vakakina vei ira na bete lalai; ia me ra lesi na dikoni kei na ivakavuvuli me ra yadrava tiko na lotu, me ra italatala tudei ena lotu.

112 Ia me veilakoyaki tale ga ko Niueli K. Witini na bisopi, ka sikova na veivavakoso ni lotu, ia me vakasaqarai ira na dravudravua ka vukea na nodra leqa ena nodra vakayalomalumalumutaki na vutuniyau kei na tamata rogo.

113 Ia me lesia tale ga e dua na nona itini me vakatulewa ena nona itavi vakayago me vaka na nona veidusimaki.

114 Ia, me lako na bisopi ki na koro levu ko Niu Ioka, kei na koro levu ko Alipani, ka vakakina na koro levu ko Bositoni, ka vunauci ira na tamata ena veikoro lelevu oqori ena rorogo ni kosipeli, ena domo levu, me baleta na veivakarusai kei na veivakararawataki sa waraki ira tu kevaka era sega ni ciqoma na veika oqo.

115 Ni kevaka era sega ni ciqoma na veika oqo, sa voleka na auwa ni nodra veilewai, ka na lala didi na nodra veivale.

116 Ia me vakararavi vei au ko koya me kakua kina ni vakamaduataki; ka me kakua ni sega ni kilai ni lutu e dua na drau ni uluna ki na qele.

117 Kau sa kaya vei kemudou, na vo ni noqu italai, dou lako yani ena ilesilesi dou sa dui kacivi kina, me vaka sa kilikili kei kemudou, ki na veikoro lelevu kei na veikoro lalai, ka vunauci ira vakadodonu na tamata ena nodra caka cala kecega kei na nodra itovo sega ni vakalou, dou tukuna vakamatata sara vei ira me ra kila na veika vakasisila ka dauveivakarusai ena yaco ena veisiga mai muri.

118 Ni sa kaya na Turaga Kaukauwa, au na yanaraka vata kei iko na nodra veimatanitu; au na sega walega ni kuretaka na vuravura, ia ena sakure talega na lomalagi.

119 Ia koi au na Turaga au sa dodoka yani na ligaqu me’u vakatakila na kaukauwa mai lomalagi; dou sa sega ni raica rawa edaidai, ia me tei vakalailai mada dou na qai raica, ka kila ni sai Au, au na lako mai ka lewai ira na noqu tamata.

120 Koi Au na Alifa kei na Omeka, na ivakatekivu kei na ivakataotioti. Emeni.