Vahe 47
Ko e fakahā naʻe fai mai ʻia Siosefa Sāmita ko e Palōfitá, ʻi Ketilani, ʻOhaiō, ʻi he ʻaho 8 Māʻasi, 1831. Naʻe ʻuluaki momou ʻa Sione Uitemā, ʻa ia naʻe ʻosi hoko ko e kalake ki he Palōfitá, ʻi he taimi naʻe kole ange ai ke hoko ko e fai-hisitōlia mo e tauhi lekooti ʻo e Siasí ʻo fetongi ʻa ʻŌliva Kautelé. Naʻá ne tohi ʻo pehē, “ʻE sai ange ke ʻoua naʻá ku fakahoko ia ka koeʻuhí ke fakahoko e finangalo ʻo e ʻEikí, pea kapau ʻokú Ne fie maʻu ia, ʻoku ou loto ke Ne fakahā ia ʻia Siosefa ko e Tangata Kikité.” Hili hono maʻu ʻe Siosefa Sāmita e fakahā ko ʻení, ne tali leva ʻe Sione Uitemā mo ngāue ʻi hono fatongia ne fokotuʻu ki aí.
1–4, ʻOku fili ʻa Sione Uitemā ke ne tauhi ʻa e hisitōlia ʻo e Siasí mo hiki tohi maʻá e Palōfitá.
1 Vakai, ʻoku lelei kiate au ke tohi mo tauhi ʻe heʻeku tamaioʻeiki ko Sioné ha hisitōlia, pea tokoni kiate koe, ʻa ʻeku tamaioʻeiki ko Siosefá, ʻi hono hiki ʻo e ngaahi meʻa kotoa pē ʻe foaki kiate koé, kae ʻoua ke ui ia ki ha toe ngaahi fatongia kehe.
2 Ko e tahá, ko e moʻoni ʻoku ou pehē kiate koe, te ne lava foki ʻo hiki hake hono leʻó ʻi he ngaahi fakatahá, ʻi ha taimi ʻe lelei ai ke fai iá.
3 Pea ko e tahá, ʻoku ou pehē kiate koe, ʻe fili ia ke tauhi ʻa e lekooti mo e hisitōlia ʻo e siasí maʻu ai pē; he kuó u fili ʻa ʻŌliva Kautele ki ha lakanga kehe.
4 Ko ia, ʻe foaki kiate ia ʻi he Fakafiemālié, ke tohi ʻa e ngaahi meʻá ni, ʻo fakatatau ki heʻene faivelengá. ʻE pehē. ʻĒmeni.