ພາກທີ 128
ສານຈາກໂຈເຊັບ ສະມິດ ຜູ້ເປັນສາດສະດາ ເຖິງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ບັນຈຸຄຳແນະນຳເພີ່ມເຕີມເລື່ອງການບັບຕິສະມາແທນຄົນຕາຍ, ລົງວັນທີທີ່ເມືອງນາວູ, ລັດອິລິນອຍ, ວັນທີ 6 ເດືອນກັນຍາ, 1842.
1–5, ຜູ້ເຮັດບັນທຶກຂອງທ້ອງຖິ່ນ ແລະ ຜູ້ບັນທຶກທົ່ວໄປຕ້ອງຮັບຮອງຂໍ້ມູນຂອງການບັບຕິສະມາແທນຄົນຕາຍ; 6–9, ບັນທຶກຂອງເຂົາເຈົ້າຖືກຜູກມັດໄວ້ ແລະ ຖືກບັນທຶກໄວ້ຢູ່ເທິງແຜ່ນດິນໂລກ ແລະ ໃນສະຫວັນ; 10–14, ອ່າງບັບຕິສະມາເປັນສັນຍາລັກເຖິງຫລຸມສົບ; 15–17, ເອລີຢາໄດ້ຟື້ນຟູອຳນາດກ່ຽວກັບການບັບຕິສະມາແທນຄົນຕາຍ; 18–21, ຂໍກະແຈ, ອຳນາດ, ແລະ ສິດອຳນາດທັງໝົດຂອງຍຸກສະໄໝທີ່ຜ່ານມາໄດ້ຖືກຟື້ນຟູຄືນມາໃໝ່; 22–25, ມີການກ່າວປະກາດຂ່າວອັນໜ້າຊື່ນຊົມ ແລະ ເລີດລ້ຳ ສຳລັບຄົນເປັນ ແລະ ຄົນຕາຍ.
1 ດັ່ງທີ່ຂ້າພະເຈົ້າໄດ້ກ່າວກັບພວກທ່ານໃນຈົດໝາຍຂອງຂ້າພະເຈົ້າກ່ອນຂ້າພະເຈົ້າໄດ້ຈາກບ່ອນຂອງຂ້າພະເຈົ້າໄປ, ວ່າຂ້າພະເຈົ້າຈະຂຽນເຖິງພວກທ່ານເປັນບາງຄັ້ງ ແລະ ຈະໃຫ້ຂໍ້ມູນແກ່ພວກທ່ານກ່ຽວກັບຫລາຍເລື່ອງ, ບັດນີ້ ຂ້າພະເຈົ້າຈະເລີ່ມເລື່ອງ ກການບັບຕິສະມາແທນຄົນຕາຍອີກ, ເພາະວ່າເລື່ອງນັ້ນວົນວຽນຢູ່ໃນຈິດໃຈຂອງຂ້າພະເຈົ້າ, ແລະ ກະທົບກະເທືອນຄວາມຮູ້ສຶກຂອງຂ້າພະເຈົ້າຫລາຍທີ່ສຸດ, ນັບຕັ້ງແຕ່ຂ້າພະເຈົ້າຖືກສັດຕູໄລ່ຕາມ.
2 ຂ້າພະເຈົ້າໄດ້ຂຽນເຖິງພວກທ່ານໜ້ອຍໜຶ່ງເລື່ອງການເປີດເຜີຍກ່ຽວກັບຜູ້ບັນທຶກ. ຂ້າພະເຈົ້າມີຄວາມຄິດເພີ່ມເຕີມກ່ຽວກັບເລື່ອງນີ້, ຊຶ່ງບັດນີ້ຂ້າພະເຈົ້າຂໍຢືນຢັນ. ນັ້ນຄື, ມີກ່າວຢູ່ໃນຈົດໝາຍສະບັບກ່ອນຂອງຂ້າພະເຈົ້າວ່າຕ້ອງມີ ກຜູ້ບັນທຶກ, ຜູ້ທີ່ຈະເປັນພະຍານດ້ວຍຕາ, ແລະ ໄດ້ຍິນດ້ວຍຫູຂອງລາວນຳອີກ, ເພື່ອວ່າລາວຈະໄດ້ເຮັດບັນທຶກຢ່າງແທ້ຈິງຢູ່ຕໍ່ພຣະພັກຂອງພຣະຜູ້ເປັນເຈົ້າ.
3 ບັດນີ້, ກ່ຽວກັບເລື່ອງນີ້, ອາດຫຍຸ້ງຍາກຫລາຍສຳລັບຜູ້ບັນທຶກຄົນດຽວທີ່ຈະຢູ່ຕະຫລອດເວລາ, ແລະ ເຮັດພາລະກິດທັງໝົດ. ເພື່ອຫລີກເວັ້ນຈາກຄວາມຫຍຸ້ງຍາກນີ້, ຈຶ່ງສາມາດກຳນົດຜູ້ບັນທຶກໃນແຕ່ລະທ້ອງຖິ່ນຂອງເມືອງ, ຜູ້ມີຄວາມສາມາດທີ່ຈະເຮັດການລາຍງານໃຫ້ຖືກຕ້ອງ; ແລະ ໃຫ້ລາຍລະອຽດ ແລະ ຊັດແຈ້ງໃນການຈົດການດຳເນີນງານທັງໝົດໄວ້, ໂດຍການຢືນຢັນໃນບັນທຶກຂອງລາວວ່າລາວໄດ້ເຫັນກັບຕາ, ແລະ ໄດ້ຍິນກັບຫູຂອງລາວ, ໂດຍລົງວັນທີ, ແລະ ຊື່, ແລະ ອື່ນໆ, ແລະ ປະຫວັດຂອງການດຳເນີນງານທຸກຢ່າງ; ໂດຍລົງຊື່ຄົນທີ່ຢູ່ດ້ວຍຈັກສາມຄົນ, ຖ້າຫາກມີໃຜຢູ່ທີ່ນັ້ນ, ຜູ້ຊຶ່ງໃນເວລາໃດກໍຕາມເມື່ອຖືກຂໍຮ້ອງຈະຢືນຢັນການດຳເນີນງານດຽວກັນນັ້ນໄດ້, ເພື່ອວ່າດ້ວຍປາກຂອງ ກພະຍານສອງ ຫລື ສາມຄົນ ທຸກໆຄຳຈະຖືກສະຖາປະນາໄວ້.
4 ຈາກນັ້ນ, ໃຫ້ມີຜູ້ບັນທຶກທົ່ວໄປຄົນໜຶ່ງ, ຜູ້ທີ່ຈະຮັບເອົາບັນທຶກອື່ນໆ, ໂດຍການມີໃບຮັບຮອງພ້ອມດ້ວຍລາຍເຊັນຂອງພວກເຂົາເອງ, ຊຶ່ງຢືນຢັນວ່າບັນທຶກທີ່ພວກເຂົາໄດ້ເຮັດເປັນຄວາມຈິງ. ຈາກນັ້ນ ຜູ້ບັນທຶກທົ່ວໄປຂອງສາດສະໜາຈັກຈຶ່ງຈະລົງບັນທຶກໃນປຶ້ມບັນທຶກທົ່ວໄປຂອງສາດສະໜາຈັກ, ພ້ອມດ້ວຍໃບຮັບຮອງ ແລະ ພະຍານທັງໝົດທີ່ຢູ່ດ້ວຍ, ພ້ອມດ້ວຍຂໍ້ຄວາມຂອງລາວເອງວ່າຕາມຄວາມຈິງແລ້ວ ລາວເຊື່ອເອກະສານດັ່ງກ່າວ ແລະ ບັນທຶກວ່າເປັນຄວາມຈິງ, ຈາກຄວາມຮູ້ຂອງລາວເຖິງລັກສະນະທົ່ວໄປ ແລະ ໜ້າທີ່ຂອງຄົນເຫລົ່ານັ້ນໂດຍສາດສະໜາຈັກ. ແລະ ເມື່ອສິ່ງນີ້ໄດ້ຖືກບັນທຶກໄວ້ຢູ່ໃນປຶ້ມບັນທຶກທົ່ວໄປຂອງສາດສະໜາຈັກແລ້ວ, ບັນທຶກຈະສັກສິດເຊັ່ນດຽວກັນ, ແລະ ຈະຢືນຢັນພິທີການເຊັ່ນດຽວກັນ ຄືກັບວ່າລາວໄດ້ເຫັນກັບຕາ, ແລະ ໄດ້ຍິນກັບຫູຂອງລາວ, ແລະ ໄດ້ເຮັດບັນທຶກຢ່າງດຽວກັນໃນປຶ້ມບັນທຶກທົ່ວໄປຂອງສາດສະໜາຈັກ.
5 ພວກທ່ານອາດຄິດວ່າ ລະບຽບຂອງເລື່ອງເຫລົ່ານີ້ລະອຽດຫລາຍ; ແຕ່ຂ້າພະເຈົ້າຂໍບອກພວກທ່ານວ່າ ມັນເປັນພຽງເພື່ອຕອບສະໜອງພຣະປະສົງຂອງພຣະເຈົ້າ, ໂດຍການເຮັດໃຫ້ສອດຄ່ອງກັບພິທີການ ແລະ ການຕຽມທີ່ພຣະຜູ້ເປັນເຈົ້າໄດ້ແຕ່ງຕັ້ງ ແລະ ໄດ້ຕຽມໄວ້ກ່ອນການວາງຮາກຖານຂອງໂລກ, ເພື່ອ ກຄວາມລອດຂອງຄົນຕາຍ ຜູ້ໄດ້ຕາຍປາດສະຈາກ ຂຄວາມຮູ້ເລື່ອງພຣະກິດຕິຄຸນ.
6 ແລະ ຍິ່ງໄປກວ່ານັ້ນ, ຂ້າພະເຈົ້າຢາກໃຫ້ພວກທ່ານຈຳໄວ້ວ່າ ໂຢຮັນຜູ້ເປີດເຜີຍ ໄດ້ໄຕ່ຕອງເລື່ອງນີ້ ກ່ຽວກັບຄົນຕາຍ, ເມື່ອເພິ່ນໄດ້ປະກາດ, ດັ່ງທີ່ພວກທ່ານຈະພົບເຫັນວ່າມີບັນທຶກຢູ່ໃນພຣະນິມິດ 20:12—ແລະ ຂ້າພະເຈົ້າໄດ້ເຫັນບັນດາຄົນທີ່ຕາຍແລ້ວທັງຜູ້ນ້ອຍ ແລະ ຜູ້ໃຫຍ່ພາກັນຢືນຢູ່ຕໍ່ພຣະພັກຂອງພຣະເຈົ້າ; ແລະ ໜັງສືຕ່າງໆກໍເປີດອອກ; ແລະ ມີໜັງສືອີກເຫລັ້ມໜຶ່ງກໍເປີດອອກ, ຄືທະບຽນແຫ່ງຊີວິດ; ແລະ ຄົນທັງຫລາຍທີ່ຕາຍແລ້ວກໍຖືກຕັດສິນຕາມວຽກງານຂອງພວກເຂົາ ດັ່ງທີ່ມີບັນທຶກໄວ້ໃນໜັງສືເຫລົ່ານັ້ນ.
7 ພວກທ່ານຈະພົບໃນຄຳກ່າວອ້າງນີ້ວ່າໜັງສືຕ່າງໆກໍເປີດອອກ; ແລະ ມີໜັງສືອີກເຫລັ້ມໜຶ່ງກໍຖືກເປີດອອກ, ຊຶ່ງເປັນ ກທະບຽນແຫ່ງຊີວິດ; ແຕ່ຄົນທັງຫລາຍທີ່ຕາຍແລ້ວກໍຖືກຕັດສິນຕາມວຽກງານຂອງພວກເຂົາດັ່ງທີ່ມີບັນທຶກໄວ້ໃນໜັງສືເຫລົ່ານັ້ນ; ດ້ວຍເຫດນັ້ນ, ໜັງສືທີ່ກ່າວເຖິງນັ້ນ ຈະຕ້ອງເປັນໜັງສືທີ່ມີບັນທຶກວຽກງານຂອງພວກເຂົາ, ແລະ ກ່າວເຖິງ ຂບັນທຶກທີ່ຂຽນຢູ່ເທິງແຜ່ນດິນໂລກ. ແລະ ໜັງສືຊຶ່ງເປັນທະບຽນແຫ່ງຊີວິດຄົງເປັນໜັງສືທີ່ຂຽນຢູ່ໃນສະຫວັນ; ຫລັກທຳແມ່ນສອດຄ່ອງຢ່າງທ່ຽງຕົງກັບຄຳສອນ ຊຶ່ງໄດ້ບັນຊາພວກທ່ານໃນການເປີດເຜີຍທີ່ມີຢູ່ໃນຈົດໝາຍທີ່ຂ້າພະເຈົ້າໄດ້ຂຽນເຖິງພວກທ່ານກ່ອນຂ້າພະເຈົ້າຈະໄປຈາກບ່ອນຂອງຂ້າພະເຈົ້າ—ເພື່ອວ່າໃນການບັນທຶກທັງໝົດຂອງພວກທ່ານ ມັນຈະຖືກບັນທຶກໄວ້ຢູ່ໃນສະຫວັນ.
8 ບັດນີ້, ລັກສະນະຂອງພິທີການນີ້ແມ່ນປະກອບຢູ່ໃນ ກອຳນາດຂອງຖານະປະໂລຫິດ, ໂດຍການເປີດເຜີຍຂອງພຣະເຢຊູຄຣິດ, ຊຶ່ງໃນນັ້ນ ມັນໄດ້ຖືກປະທານໃຫ້ວ່າ ສິ່ງໃດກໍຕາມທີ່ພວກທ່ານຈະ ຂຜູກມັດເທິງແຜ່ນດິນໂລກ ສິ່ງນັ້ນຈະຖືກຜູກມັດໃນສະຫວັນ; ແລະ ສິ່ງໃດກໍຕາມທີ່ພວກທ່ານຈະແກ້ໃຫ້ຫລຸດເທິງແຜ່ນດິນໂລກ ສິ່ງນັ້ນຈະຖືກແກ້ໃຫ້ຫລຸດໃນສະຫວັນ; ຫລື, ອີກຄຳໜຶ່ງ, ຄວາມໝາຍອີກຢ່າງໜຶ່ງຂອງຄຳແປ, ສິ່ງໃດກໍຕາມທີ່ພວກທ່ານບັນທຶກຢູ່ເທິງແຜ່ນດິນໂລກ ຈະຖືກບັນທຶກໄວ້ໃນສະຫວັນ, ແລະ ສິ່ງໃດກໍຕາມທີ່ພວກທ່ານ ບໍ່ບັນທຶກຢູ່ເທິງແຜ່ນດິນໂລກ ຈະບໍ່ຖືກບັນທຶກໄວ້ໃນສະຫວັນ; ເພາະຈາກໜັງສືທັງຫລາຍ ຄົນຕາຍຂອງພວກທ່ານຈະໄດ້ຮັບການພິພາກສາ, ຕາມວຽກງານຂອງພວກເຂົາເອງ, ບໍ່ວ່າພວກເຂົາເອງໄດ້ປະຕິບັດ ຄພິທີການຂອງພວກເຂົາເອງ, ຫລື ໂດຍອາໄສຕົວແທນຂອງພວກເຂົາເອງ, ຕາມພິທີການຊຶ່ງພຣະເຈົ້າໄດ້ຕຽມໄວ້ເພື່ອ ງຄວາມລອດຂອງພວກເຂົານັບແຕ່ກ່ອນການວາງຮາກຖານຂອງໂລກ, ຕາມບັນທຶກຊຶ່ງພວກເຂົາໄດ້ຂຽນໄວ້ກ່ຽວກັບຄົນຕາຍຂອງພວກເຂົາ.
9 ກັບບາງຄົນ ອາດເບິ່ງຄືວ່າ ມັນເປັນຄຳສອນທີ່ອາດຫານຫລາຍທີ່ພວກເຮົາກ່າວເຖິງ—ເປັນອຳນາດຊຶ່ງບັນທຶກໄວ້ ຫລື ຜູກມັດໄວ້ຢູ່ເທິງແຜ່ນດິນໂລກ ແລະ ຜູກມັດໄວ້ຢູ່ໃນສະຫວັນ. ເຖິງຢ່າງໃດກໍຕາມ, ໃນທຸກຍຸກທຸກສະໄໝຂອງໂລກ, ເມື່ອໃດກໍຕາມທີ່ພຣະຜູ້ເປັນເຈົ້າໄດ້ມອບ ກຍຸກສະໄໝຂອງຖານະປະໂລຫິດໃຫ້ມະນຸດຄົນໃດໂດຍການເປີດເຜີຍໂດຍກົງ, ຫລື ຄົນກຸ່ມໃດກໍຕາມ, ອຳນາດນີ້ກໍໄດ້ຖືກມອບໃຫ້ສະເໝີ. ດ້ວຍເຫດນີ້, ອັນໃດກໍຕາມທີ່ຄົນເຫລົ່ານັ້ນເຮັດໄປໃນ ຂສິດອຳນາດ, ໃນພຣະນາມຂອງພຣະຜູ້ເປັນເຈົ້າ, ແລະ ເຮັດຢ່າງຖືກຕ້ອງ ແລະ ຢ່າງຊື່ສັດ, ແລະ ຂຽນບັນທຶກໃນສິ່ງດຽວກັນໄວ້ຢ່າງຖືກຕ້ອງ ແລະ ຊື່ສັດ, ແລ້ວມັນຈະກາຍເປັນກົດຢູ່ເທິງແຜ່ນດິນໂລກ ແລະ ໃນສະຫວັນ, ແລະ ລົບລ້າງບໍ່ໄດ້, ຕາມຄຳສັ່ງຂອງ ຄພຣະເຢໂຮວາຜູ້ຍິ່ງໃຫຍ່. ຄຳນີ້ເປັນຄວາມຈິງ. ຜູ້ໃດຈະໄດ້ຍິນມັນໄດ້?
10 ແລະ ອີກເທື່ອໜຶ່ງ, ຍົກຕົວຢ່າງ, ມັດທາຍ 16:18, 19: ແລະ ຝ່າຍເຮົາຈຶ່ງບອກວ່າເຈົ້າຄືເປໂຕ ເທິງຫີນກ້ອນນີ້ເຮົາຈະສ້າງສາດສະໜາຈັກຂອງເຮົາຂຶ້ນ; ແລະ ປະຕູນະລົກຈະເອົາຊະນະມັນບໍ່ໄດ້. ແລະ ເຮົາຈະມອບຂໍກະແຈຂອງອານາຈັກສະຫວັນໃຫ້ເຈົ້າ: ແລະ ສິ່ງໃດກໍຕາມທີ່ພວກເຈົ້າຜູກມັດໄວ້ເທິງແຜ່ນດິນໂລກນີ້, ສິ່ງນັ້ນຈະຖືກຜູກມັດໄວ້ໃນສະຫວັນ; ແລະ ສິ່ງໃດກໍຕາມທີ່ພວກເຈົ້າຈະແກ້ເທິງແຜ່ນດິນໂລກນີ້, ສິ່ງນັ້ນຈະຖືກແກ້ໃຫ້ຫລຸດແລ້ວໃນສະຫວັນ.
11 ບັດນີ້ ຄວາມລັບອັນສຳຄັນ ແລະ ສູງສຸດຂອງທັງເລື່ອງ, ແລະ ຊຳມຳ ໂບນຳ (ຄວາມວິເສດສຸດ) ຂອງທັງເລື່ອງທີ່ວາງຢູ່ຕໍ່ໜ້າພວກເຮົາ, ຢູ່ໃນການໄດ້ຮັບອຳນາດຂອງຖານະປະໂລຫິດສັກສິດ. ສຳລັບຄົນທີ່ ກຂໍກະແຈເຫລົ່ານີ້ໄດ້ຖືກມອບໃຫ້ ຈະບໍ່ມີຄວາມຫຍຸ້ງຍາກໃນການໄດ້ຮັບຄວາມຮູ້ເລື່ອງຄວາມຈິງແທ້ກ່ຽວກັບ ຂຄວາມລອດຂອງລູກຫລານມະນຸດ, ທັງສຳລັບຄົນຕາຍ ແລະ ສຳລັບຄົນເປັນ.
12 ໃນນີ້ຄື ກລັດສະໝີພາບ ແລະ ຂກຽດຕິຍົດ, ແລະ ຄວາມເປັນ ຄອະມະຕະ ແລະ ຊີວິດນິລັນດອນ—ພິທີການບັບຕິສະມາໂດຍນ້ຳ, ທີ່ຈະ ງລົງໄປໃນນ້ຳໝົດທັງຕົວຊຶ່ງເປັນລັກສະນະຄ້າຍຄືກັບການຕາຍ, ເພື່ອວ່າຫລັກທຳຂໍ້ໜຶ່ງຈະກົງກັນກັບຫລັກທຳອີກຂໍ້ໜຶ່ງ; ທີ່ຈະລົງໄປໃນນ້ຳໝົດທັງຕົວ ແລະ ຂຶ້ນມາຈາກນ້ຳ ເປັນລັກສະນະຄ້າຍຄືກັບການຟື້ນຄືນຊີວິດຂອງຄົນຕາຍໃນການຂຶ້ນມາຈາກຫລຸມສົບຂອງພວກເຂົາ; ດ້ວຍເຫດນີ້, ພິທີການນີ້ຈຶ່ງຖືກແຕ່ງຕັ້ງໄວ້ເພື່ອໃຫ້ມີຄວາມສຳພັນກັບພິທີການບັບຕິສະມາແທນຄົນຕາຍ, ໂດຍເປັນໄປໃນລັກສະນະທີ່ຄ້າຍຄືກັບການຕາຍ.
13 ດັ່ງນັ້ນ, ອ່າງ ກບັບຕິສະມາຈຶ່ງຖືກຕັ້ງໄວ້ເປັນ ຂສັນຍາລັກໃຫ້ຫລຸມຝັງສົບ, ແລະ ຖືກບັນຊາໃຫ້ຢູ່ໃນສະຖານທີ່ບ່ອນທີ່ຄົນເປັນມັກມາຊຸມນຸມກັນ, ເພື່ອສະແດງໃຫ້ເຫັນຄົນເປັນ ແລະ ຄົນຕາຍ, ເພື່ອວ່າທຸກສິ່ງທັງປວງຈະມີບາງສິ່ງທີ່ຄ້າຍຄື, ແລະ ເພື່ອວ່າມັນຈະສອດຄ່ອງກັນແລະກັນ—ວ່າສິ່ງຊຶ່ງເປັນຝ່າຍຂອງໂລກສອດຄ່ອງກັບສິ່ງຊຶ່ງເປັນຝ່າຍສະຫວັນ, ດັ່ງທີ່ໂປໂລໄດ້ປະກາດໃນ, 1 ໂກຣິນໂທ 15:46, 47, ແລະ 48:
14 ແຕ່ກາຍທີ່ເກີດມາກ່ອນນັ້ນ ບໍ່ແມ່ນເປັນກາຍຝ່າຍວິນຍານ, ແຕ່ເປັນກາຍທຳມະດາ; ແລະ ຕໍ່ມາຈຶ່ງເກີດມີຝ່າຍວິນຍານ. ມະນຸດຜູ້ທຳອິດເກີດມາຈາກດິນຈຶ່ງກາຍເປັນຂີ້ຝຸ່ນດິນ; ມະນຸດຜູ້ທີສອງຄື ພຣະຜູ້ເປັນເຈົ້າ ມາຈາກສະຫວັນ. ຜູ້ທີ່ເກີດມາຈາກດິນເປັນຢ່າງໃດ, ຄົນທັງຫລາຍທີ່ເກີດມາຈາກດິນກໍເປັນຢ່າງນັ້ນ; ແລະ ຜູ້ທີ່ສະເດັດມາຈາກສະຫວັນເປັນຢ່າງໃດ, ຄົນທັງຫລາຍທີ່ເປັນຝ່າຍສະຫວັນກໍເປັນຢ່າງນັ້ນ. ແລະ ບັນທຶກຢູ່ເທິງໂລກກ່ຽວກັບຄົນຕາຍຂອງພວກທ່ານ, ຊຶ່ງໄດ້ບັນທຶກໄວ້ແທ້ໆສັນໃດ, ກໍຈະຖືກບັນທຶກໄວ້ຢູ່ໃນສະຫວັນສັນນັ້ນ. ສະນັ້ນ, ນີ້ເປັນອຳນາດ ກການຜະນຶກ ແລະ ການຜູກມັດ, ແລະ, ໃນຄວາມໝາຍໜຶ່ງຂອງເລື່ອງນີ້, ເປັນ ຂຂໍກະແຈຂອງອານາຈັກ, ຊຶ່ງປະກອບດ້ວຍຂໍກະແຈແຫ່ງ ຄຄວາມຮູ້.
15 ແລະ ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍໃຫ້ຂ້າພະເຈົ້າຢືນຢັນກັບພວກທ່ານວ່າ ນີ້ເປັນຫລັກທຳກ່ຽວກັບຄົນຕາຍ ແລະ ຄົນເປັນ ຊຶ່ງຕ້ອງເຮັດແບບເອົາຈິງເອົາຈັງ, ກ່ຽວກັບຄວາມລອດຂອງເຮົາ. ເພາະວ່າຄວາມລອດຂອງພວກເຂົາຈຳເປັນ ແລະ ສຳຄັນຕໍ່ ກຄວາມລອດຂອງເຮົາ, ດັ່ງທີ່ໂປໂລໄດ້ກ່າວກ່ຽວກັບບັນພະບຸລຸດ—ຖ້າຫາກປາດສະຈາກພວກເຮົາ, ພວກເຂົາຈະ ຂດີພ້ອມບໍ່ໄດ້—ທັງພວກເຮົາກໍຄືກັນ ຈະດີພ້ອມບໍ່ໄດ້ ຖ້າຫາກປາດສະຈາກຄົນຕາຍຂອງພວກເຮົາ.
16 ແລະ ບັດນີ້, ກ່ຽວກັບການບັບຕິສະມາແທນຄົນຕາຍ, ຂ້າພະເຈົ້າຈະໃຫ້ຂໍ້ອ້າງອີງຂອງໂປໂລອີກຕອນໜຶ່ງ, 1 ໂກຣິນໂທ 15:29: ຖ້າບໍ່ເປັນຢ່າງນັ້ນຄົນທັງຫລາຍທີ່ຮັບບັບຕິສະມາແທນຄົນຕາຍນັ້ນ ຈະໝາຍຄວາມວ່າຢ່າງໃດ ຖ້າພຣະເຈົ້າບໍ່ບັນດານໃຫ້ຄົນຕາຍຄືນຂຶ້ນມາແທ້? ດ້ວຍເຫດໃດຈຶ່ງມີຄົນຮັບບັບຕິສະມາແທນຄົນຕາຍ?
17 ແລະ ອີກເທື່ອໜຶ່ງ, ກ່ຽວກັບຂໍ້ອ້າງອີງນີ້ ຂ້າພະເຈົ້າຈະໃຫ້ຂໍ້ອ້າງອີງຈາກສາດສະດາຄົນໜຶ່ງແກ່ພວກທ່ານ, ຊຶ່ງສາຍຕາຂອງເພິ່ນຈົດຈໍ່ຢູ່ທີ່ ກການຟື້ນຟູຂອງຖານະປະໂລຫິດ, ລັດສະໝີພາບທີ່ຈະຖືກເປີດເຜີຍໃນຍຸກສຸດທ້າຍ, ແລະ ໃນວິທີການພິເສດ ເລື່ອງອັນເລີດລ້ຳທີ່ສຸດນີ້ໃນບັນດາເລື່ອງທັງໝົດທີ່ເປັນຂອງພຣະກິດຕິຄຸນອັນເປັນນິດ, ນັ້ນຄື, ການບັບຕິສະມາແທນຄົນຕາຍ; ເພາະວ່າມາລາກີໄດ້ກ່າວ, ໃນບົດສຸດທ້າຍ, ຂໍ້ 5 ແລະ 6: ແຕ່ກ່ອນມື້ຍິ່ງໃຫຍ່ ແລະ ໜ້າຢ້ານກົວຂອງພຣະຜູ້ເປັນເຈົ້າຈະມາເຖິງ, ເຮົາຈະໃຊ້ ຂເອລີຢາຜູ້ປະກາດພຣະຄຳຂອງເຮົາມາ. ລາວຈະຫັນໃຈພໍ່ມາຫາລູກ, ແລະ ຫັນໃຈລູກໄປຫາພໍ່. ບໍ່ດັ່ງນັ້ນ ເຮົາຈະມາ ແລະ ທຳລາຍແຜ່ນດິນໂລກດ້ວຍຄຳສາບແຊ່ງ.
18 ຂ້າພະເຈົ້າອາດຈະໃຫ້ຄຳແປທີ່ ກແຈ່ມແຈ້ງຫລາຍກວ່ານີ້ກ່ຽວກັບເລື່ອງນີ້, ແຕ່ສິ່ງທີ່ໃຫ້ໄວ້ກໍພຽງພໍແລ້ວສຳລັບຈຸດປະສົງຂອງຂ້າພະເຈົ້າ. ມັນພຽງພໍທີ່ຈະຮູ້, ໃນກໍລະນີນີ້, ວ່າແຜ່ນດິນໂລກຈະຖືກທຳລາຍດ້ວຍຄຳສາບແຊ່ງ ຍົກເວັ້ນແຕ່ຈະມີ ຂບ້ວງບາງຊະນິດ ຫລື ບາງປະເພດ ເພື່ອເຊື່ອມບັນພະບຸລຸດໃສ່ກັບລູກຫລານ, ໄວ້ໃນບາງເລື່ອງ ຫລື ບາງຢ່າງ—ແລະ ຈົ່ງເບິ່ງ ເລື່ອງນັ້ນຄືເລື່ອງໃດ? ມັນຄື ຄການບັບຕິສະມາແທນຄົນຕາຍ. ເພາະວ່າຖ້າຫາກປາດສະຈາກພວກເຂົາ, ພວກເຮົາຈະດີພ້ອມບໍ່ໄດ້; ທັງພວກເຂົາກໍຄືກັນ ຈະດີພ້ອມບໍ່ໄດ້ ຖ້າຫາກປາດສະຈາກພວກເຮົາ. ທັງພວກເຂົາ ຫລື ພວກເຮົາ ຈະດີພ້ອມບໍ່ໄດ້ຄືກັນ ຖ້າຫາກປາດສະຈາກຄົນທີ່ໄດ້ຕາຍໃນພຣະກິດຕິຄຸນ; ເພາະມັນຈຳເປັນໃນການເລີ່ມຕົ້ນ ງຍຸກສະໄໝຂອງຄວາມສົມບູນແຫ່ງເວລາ, ຊຶ່ງບັດນີ້ ຍຸກສະໄໝດັ່ງກ່າວເລີ່ມຕົ້ນແລ້ວ, ວ່າການມາຮ່ວມກັນທີ່ເປັນໜຶ່ງ ແລະ ສົມບູນ ແລະ ດີພ້ອມ, ແລະ ການເຊື່ອມເຂົ້າກັນຂອງຍຸກສະໄໝຕ່າງໆ, ແລະ ຂໍກະແຈ, ແລະ ອຳນາດ, ແລະ ລັດສະໝີພາບຈະເກີດຂຶ້ນ, ແລະ ຖືກເປີດເຜີຍນັບຕັ້ງແຕ່ວັນເວລາຂອງອາດາມ ແມ່ນແຕ່ຈົນເຖິງເວລາປະຈຸບັນ. ແລະ ບໍ່ພຽງເທົ່ານີ້, ແຕ່ສິ່ງທີ່ບໍ່ເຄີຍຖືກເປີດເຜີຍນັບຕັ້ງແຕ່ການວາງ ຈຮາກຖານຂອງໂລກ, ແຕ່ໄດ້ຖືກເກັບຊ້ອນໄວ້ໃຫ້ພົ້ນຈາກຄົນມີປັນຍາ ແລະ ຄົນຮອບຄອບ, ຈະຖືກເປີດເຜີຍແກ່ ສເດັກນ້ອຍ ແລະ ເດັກແດງທາລົກໃນຍຸກນີ້, ໃນຍຸກສະໄໝຂອງຄວາມສົມບູນແຫ່ງເວລາ.
19 ບັດນີ້, ພວກເຮົາໄດ້ຍິນຫຍັງໃນພຣະກິດຕິຄຸນທີ່ເຮົາໄດ້ຮັບ? ສຽງແຫ່ງຄວາມຍິນດີ! ສຽງແຫ່ງຄວາມເມດຕາຈາກສະຫວັນ; ແລະ ສຽງແຫ່ງ ກຄວາມຈິງອອກຈາກແຜ່ນດິນໂລກ; ຂ່າວອັນໜ້າຊື່ນຊົມສຳລັບຄົນຕາຍ; ສຽງແຫ່ງຄວາມຍິນດີສຳລັບຄົນເປັນ ແລະ ຄົນຕາຍ; ຂຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່. ຄຕີນຂອງຜູ້ທີ່ຢູ່ເທິງພູນັ້ນງາມພຽງໃດ ຜູ້ທີ່ໄດ້ນຳເອົາຂ່າວອັນໜ້າຊື່ນຊົມມາ, ທີ່ກ່າວກັບຊີໂອນວ່າ: ຈົ່ງເບິ່ງ, ພຣະເຈົ້າຂອງເຈົ້າຊົງປົກຄອງ! ດັ່ງ ງນ້ຳຄ້າງແຫ່ງກາເມນສັນໃດ, ຄວາມຮູ້ຂອງພຣະເຈົ້າຈະລົງມາ ເທິງພວກເຂົາສັນນັ້ນ!
20 ແລະ ອີກເທື່ອໜຶ່ງ, ພວກເຮົາໄດ້ຍິນຫຍັງ? ຂ່າວອັນໜ້າຊື່ນຊົມຈາກ ກຄູໂມຣາ! ຂໂມໂຣໄນ, ທູດ ຈາກ ສະຫວັນ, ຜູ້ປະກາດຄວາມສຳເລັດຂອງຖ້ອຍຄຳຂອງສາດສະດາ—ຄໜັງສືທີ່ຈະຖືກເປີດເຜີຍ. ສຸລະສຽງຂອງພຣະຜູ້ເປັນເຈົ້າໃນຖິ່ນແຫ້ງແລ້ງກັນດານຂອງເມືອງ ງເຟແອດ, ເຂດເຊເນກາ, ຈປະກາດພະຍານສາມຄົນທີ່ຈະກ່າວຄຳພະຍານເຖິງໜັງສື! ສຽງຂອງ ສມີຄາເອນຢູ່ແຄມຝັ່ງຊັສຄູຮັນນາ, ສັງເກດເຫັນມານ ເມື່ອມັນໄດ້ປະກົດເປັນທູດແຫ່ງ ຊຄວາມສະຫວ່າງ! ສຽງຂອງ ຍເປໂຕ, ຢາໂກໂບ, ແລະ ໂຢຮັນ ໃນຖິ່ນແຫ້ງແລ້ງກັນດານລະຫວ່າງເມືອງຮາມໂມນີ ເຂດຊັສຄູຮັນນາ, ແລະ ໂຄນສະວຽວ, ເຂດບຣູມ, ທີ່ ແມ່ນ້ຳຊັສຄູຮັນນາ, ຜູ້ປະກາດຕົນວ່າໄດ້ຄອບຄອງ ດຂໍກະແຈຂອງອານາຈັກ, ແລະ ຂອງຍຸກສະໄໝຂອງຄວາມສົມບູນແຫ່ງເວລາ!
21 ແລະ ອີກເທື່ອໜຶ່ງ, ສຸລະສຽງຂອງພຣະເຈົ້າໃນຫ້ອງຂອງ ກພໍ່ຕູ້ວິດເມີ, ໃນເມືອງເຟແອດ, ເຂດເຊເນກາ, ແລະ ໃນເວລາຕ່າງໆ, ແລະ ໃນສະຖານທີ່ຕ່າງໆຕະຫລອດການເດີນທາງ ແລະ ຄວາມທຸກຍາກລຳບາກ ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ! ແລະ ສຽງຂອງມີຄາເອນ, ຫົວໜ້າທູດ; ສຽງຂອງ ຂຄັບຣີເອນ, ແລະ ຂອງ ຄຣາຟາເອນ, ແລະ ຂອງ ງທູດຕ່າງໆ, ຈາກມີຄາເອນ ຫລື ຈອາດາມ ລົງໄປ ເຖິງເວລາປະຈຸບັນ, ທຸກຄົນປະກາດ ສຍຸກສະໄໝຂອງພວກເຂົາ, ສິດຂອງພວກເຂົາ, ຂໍກະແຈຂອງພວກເຂົາ, ກຽດຕິຍົດຂອງພວກເຂົາ, ເດຊານຸພາບ ແລະ ລັດສະໝີພາບຂອງພວກເຂົາ, ແລະ ອຳນາດຂອງຖານະປະໂລຫິດຂອງພວກເຂົາ; ໂດຍໃຫ້ເປັນບັນທັດ, ເປັນ ຊຂໍ້ເລັກໆໜ້ອຍໆ; ນີ້ໜ້ອຍໜຶ່ງ, ແລະ ນັ້ນໜ້ອຍໜຶ່ງ; ໃຫ້ການປອບໂຍນແກ່ພວກເຮົາໂດຍການປ່າວປະກາດເຖິງສິ່ງທີ່ຈະມາເຖິງ, ໂດຍການຢືນຢັນ ຍຄວາມຫວັງຂອງພວກເຮົາ!
22 ອ້າຍເອື້ອຍນ້ອງທັງຫລາຍ, ພວກເຮົາຈະບໍ່ກ້າວຕໍ່ໄປໃນອຸດົມການອັນຍິ່ງໃຫຍ່ເຊັ່ນນີ້ບໍ? ກ້າວໄປໜ້າ ແລະ ບໍ່ຖອຍກັບ. ຈົ່ງກ້າຫານ, ພີ່ນ້ອງທັງຫລາຍ; ແລະ ກ້າວຕໍ່ໄປ, ຕໍ່ໄປເຖິງໄຊຊະນະ! ໃຫ້ໃຈຂອງພວກທ່ານປິຕິຍິນດີເຖີດ, ແລະ ດີໃຈຢ່າງຍິ່ງ. ໃຫ້ແຜ່ນດິນໂລກເປັ່ງສຽງ ກຮ້ອງເພງເຖີດ. ໃຫ້ຄົນຕາຍເປັ່ງສຽງຮ້ອງສັນລະເສີນນິລັນດອນຖວາຍກະສັດ ຂເອມານູເອນ, ຜູ້ໄດ້ແຕ່ງຕັ້ງ, ກ່ອນໂລກມີມາ, ຊຶ່ງຈະເຮັດໃຫ້ພວກເຮົາສາມາດ ຄໄຖ່ພວກເຂົາອອກຈາກທີ່ ງຄຸມຂັງຂອງພວກເຂົາ; ເພາະນັກໂທດຈະອອກໄປເປັນອິດສະລະ.
23 ໃຫ້ ກພູເຂົາຮ້ອງດ້ວຍຄວາມຊື່ນຊົມ, ແລະ ເຈົ້າຮ່ອມພູທັງປວງປ່າວຮ້ອງໃຫ້ດັງ; ແລະ ເຈົ້າທ້ອງທະເລ ແລະ ແຜ່ນດິນແຫ້ງທັງປວງຈົ່ງບອກເຖິງສິ່ງມະຫັດສະຈັນຂອງກະສັດນິລັນດອນຂອງເຈົ້າ! ແລະ ເຈົ້າແມ່ນ້ຳ, ຫ້ວຍຮ່ອງ, ແລະ ຄອງນ້ຳທັງປວງ, ຈົ່ງໄຫລລົງດ້ວຍຄວາມຍິນດີ. ໃຫ້ປ່າດົງ ແລະ ພົງໄພທັງປວງຢູ່ໃນທົ່ງຈົ່ງສັນລະເສີນພຣະຜູ້ເປັນເຈົ້າ; ແລະ ເຈົ້າ ຂຫີນສີລາທັງຫລາຍຈົ່ງຮ້ອງໄຫ້ດ້ວຍຄວາມຊື່ນຊົມ! ແລະ ໃຫ້ ດວງຕາເວັນ, ດວງເດືອນ, ແລະ ດວງ ຄຮຸ່ງອາລຸນຮ່ວມກັນຮ້ອງເພງ, ແລະ ໃຫ້ບຸດທັງປວງຂອງພຣະເຈົ້າຮ້ອງດ້ວຍຄວາມຊື່ນຊົມ! ແລະ ໃຫ້ການສ້າງນິລັນດອນປະກາດພຣະນາມຂອງພຣະອົງຕະຫລອດໄປ ແລະ ຕະຫລອດການ! ແລະ ອີກເທື່ອໜຶ່ງ ເຮົາກ່າວວ່າ ສຽງທີ່ເຮົາໄດ້ຍິນຈາກສະຫວັນຊ່າງປະເສີດພຽງໃດນໍ, ທີ່ປະກາດລັດສະໝີພາບ, ແລະ ຄວາມລອດ, ແລະ ກຽດຕິຍົດ, ແລະ ຄວາມເປັນ ງອະມະຕະ, ແລະ ຈຊີວິດນິລັນດອນ; ອານາຈັກ, ເຂດປົກຄອງ, ແລະ ອຳນາດ ເຂົ້າຫູຂອງພວກເຮົາ!
24 ຈົ່ງເບິ່ງ, ກວັນອັນຍິ່ງໃຫຍ່ຂອງພຣະຜູ້ເປັນເຈົ້າໃກ້ເຂົ້າມາເຖິງແລ້ວ; ແລະ ໃຜຈະຍັງ ຂທົນຢູ່ໄດ້ໃນວັນແຫ່ງການສະເດັດມາຂອງພຣະອົງ, ແລະ ໃຜຈະຢືນຢູ່ໄດ້ເມື່ອພຣະອົງມາປະກົດ? ເພາະວ່າພຣະອົງເປັນເໝືອນດັ່ງໄຟທີ່ ຄຫລອມໂລຫະ, ແລະ ເປັນເໝືອນດັ່ງສະບູທີ່ມີພະລັງແຮງຂອງຄົນຊັກຜ້າ; ແລະ ພຣະອົງຈະປະທັບນັ່ງຢູ່ດັ່ງຜູ້ ງຫລອມເງິນໃຫ້ບໍລິສຸດ, ແລະ ພຣະອົງຈະຊຳລະພວກລູກຊາຍຂອງ ຈເລວີ, ແລະ ເຮັດໃຫ້ພວກເຂົາບໍລິສຸດ, ດັ່ງດຽວກັນກັບຄຳ ແລະ ເງິນ, ເພື່ອວ່າພວກເຂົາຈະນຳ ສເຄື່ອງຖວາຍບູຊາມາຖວາຍແດ່ພຣະຜູ້ເປັນເຈົ້າໃນຄວາມຊອບທຳ. ສະນັ້ນ ໃຫ້ພວກເຮົາ, ໃນຖານະສາດສະໜາຈັກໜຶ່ງ ແລະ ຜູ້ຄົນກຸ່ມໜຶ່ງ, ແລະ ໃນຖານະໄພ່ພົນຍຸກສຸດທ້າຍ, ຖວາຍເຄື່ອງບູຊາແດ່ພຣະຜູ້ເປັນເຈົ້າໃນຄວາມຊອບທຳ; ແລະ ໃຫ້ພວກເຮົາຖວາຍໜັງສືເຫລັ້ມໜຶ່ງ ທີ່ມີ ຊບັນທຶກຂອງຄົນຕາຍຂອງພວກເຮົາ ໃນພຣະວິຫານທີ່ສັກສິດຂອງພຣະອົງ ເມື່ອມັນສຳເລັດ, ຊຶ່ງຈະສົມຄວນກັບການຍອມຮັບທັງປວງ.
25 ອ້າຍນ້ອງທັງຫລາຍ, ຂ້າພະເຈົ້າມີຫລາຍສິ່ງທີ່ຈະກ່າວກັບພວກທ່ານກ່ຽວກັບເລື່ອງນີ້; ແຕ່ບັດນີ້ຈະຢຸດຕິພຽງເທົ່ານີ້ສຳລັບເວລານີ້, ແລະ ຈະກ່າວກ່ຽວກັບເລື່ອງນີ້ອີກໃນເວລາອື່ນ. ຂ້າພະເຈົ້າເປັນຜູ້ຮັບໃຊ້ທີ່ຕ່ຳຕ້ອຍຂອງພວກທ່ານຕະຫລອດໄປ, ແລະ ເປັນເພື່ອນຜູ້ບໍ່ເຄີຍປ່ຽນແປງ,
ໂຈເຊັບ ສະມິດ.