ພາກທີ 108
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຄີດແລນ, ລັດໂອໄຮໂອ, ວັນທີ 26 ເດືອນທັນວາ, 1835. ພາກນີ້ໄດ້ຮັບຕາມຄຳຂໍຮ້ອງຂອງໄລມັນ ເຊີແມນ, ຜູ້ຫາກໍໄດ້ຖືກແຕ່ງຕັ້ງເປັນສາວົກເຈັດສິບ ແລະ ໄດ້ມາຫາສາດສະດາພ້ອມກັບຄຳຂໍຮ້ອງການເປີດເຜີຍເພື່ອຈະໄດ້ຮູ້ຈັກໜ້າທີ່ຂອງລາວ.
1–3, ໄລມັນ ເຊີແມນ ໄດ້ຖືກອະໄພບາບໃຫ້; 4–5, ລາວຈະຖືກນັບເຂົ້າຢູ່ໃນບັນດາພວກແອວເດີທີ່ເປັນຜູ້ນຳຂອງສາດສະໜາຈັກ; 6–8, ລາວຖືກເອີ້ນໃຫ້ສັ່ງສອນພຣະກິດຕິຄຸນ ແລະ ເພີ່ມຄວາມເຂັ້ມແຂງໃຫ້ແກ່ພວກອ້າຍນ້ອງຂອງລາວ.
1 ຕາມຄວາມຈິງແລ້ວ ພຣະຜູ້ເປັນເຈົ້າໄດ້ກ່າວດັ່ງນີ້ກັບເຈົ້າ, ຜູ້ຮັບໃຊ້ຂອງເຮົາ ໄລມັນ: ບາບຂອງເຈົ້າໄດ້ຖືກອະໄພໃຫ້ແລ້ວ, ເພາະເຈົ້າໄດ້ເຊື່ອຟັງສຽງຂອງເຮົາໃນການຂຶ້ນມາທີ່ນີ້ ເພື່ອຮັບຄຳແນະນຳຈາກລາວ ຜູ້ທີ່ເຮົາໄດ້ແຕ່ງຕັ້ງໄວ້.
2 ສະນັ້ນ, ໃຫ້ຈິດວິນຍານຂອງເຈົ້າ ກສະຫງົບກ່ຽວກັບສະພາບການທາງວິນຍານຂອງເຈົ້າ, ແລະ ຢ່າຂັດຂືນສຽງຂອງເຮົາອີກເລີຍ.
3 ແລະ ຈົ່ງລຸກຂຶ້ນ ແລະ ລະມັດລະວັງນັບແຕ່ນີ້ເປັນຕົ້ນໄປໃນການຍຶດຖືຄຳປະຕິຍານຂອງເຈົ້າ, ຊຶ່ງເຈົ້າໄດ້ເຮັດໄວ້ ແລະ ເຮັດຢູ່, ແລະ ເຈົ້າຈະໄດ້ຮັບພອນ ດ້ວຍພອນອັນຍິ່ງໃຫຍ່.
4 ຈົ່ງລໍຖ້າຢ່າງອົດທົນຈົນກວ່າຈະເອີ້ນ ກການຊຸມນຸມທີ່ສັກສິດຂອງຜູ້ຮັບໃຊ້ຂອງເຮົາ, ເມື່ອນັ້ນເຈົ້າຈະໄດ້ຖືກຈື່ຈຳພ້ອມກັບແອວເດີກຸ່ມທຳອິດຂອງເຮົາ, ແລະ ຮັບສິດໂດຍຜ່ານການແຕ່ງຕັ້ງພ້ອມກັບແອວເດີທີ່ເຫລືອຢູ່ຂອງເຮົາ ຜູ້ທີ່ເຮົາໄດ້ເລືອກໄວ້.
5 ຈົ່ງເບິ່ງ, ສິ່ງນີ້ຄື ກຄຳສັນຍາຂອງພຣະບິດາແກ່ເຈົ້າ ຖ້າເຈົ້າຊື່ສັດຕໍ່ໄປ.
6 ແລະ ມັນຈະບັງເກີດຂຶ້ນກັບເຈົ້າໃນວັນນັ້ນທີ່ເຈົ້າຈະມີສິດທີ່ຈະ ກສັ່ງສອນພຣະກິດຕິຄຸນຂອງເຮົາ ໃນບ່ອນໃດກໍຕາມທີ່ເຮົາຈະສົ່ງເຈົ້າໄປ, ນັບແຕ່ເວລານັ້ນເປັນຕົ້ນໄປ.
7 ສະນັ້ນ, ຈົ່ງເພີ່ມ ກຄວາມເຂັ້ມແຂງໃຫ້ແກ່ອ້າຍນ້ອງຂອງເຈົ້າໃນການສົນທະນາທຸກຢ່າງຂອງເຈົ້າ, ໃນຄຳອະທິຖານທັງໝົດຂອງເຈົ້າ, ໃນຄຳແນະນຳທັງປວງຂອງເຈົ້າ, ແລະ ໃນການກະທຳທັງໝົດຂອງເຈົ້າ.
8 ແລະ ຈົ່ງເບິ່ງ, ແລະ ເບິ່ງແມ, ເຮົາຢູ່ກັບເຈົ້າ ເພື່ອອວຍພອນເຈົ້າ ແລະ ກປົດປ່ອຍເຈົ້າຕະຫລອດການ. ອາແມນ.