ຂໍ້ປະກາດຢ່າງເປັນທາງການ 2
ພຣະຄຳພີມໍມອນ ສິດສອນວ່າ “ທຸກຄົນເທົ່າທຽມກັນໝົດສຳລັບພຣະເຈົ້າ,” ລວມທັງຄົນ “ດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ” (2 ນີໄຟ 26:33). ຕະຫລອດທົ່ວປະຫວັດສາດຂອງສາດສະໜາຈັກ, ຜູ້ຄົນທຸກເຊື້ອຊາດ ແລະ ຊົນເຜົ່າ ໃນຫລາຍປະເທດ ໄດ້ຮັບບັບຕິສະມາ ແລະ ໄດ້ດຳລົງຊີວິດເປັນສະມາຊິກທີ່ຊື່ສັດຂອງສາດສະໜາຈັກ. ໃນວັນເວລາຂອງໂຈເຊັບ ສະມິດ, ມີຜູ້ຊາຍຄົນອາຟຣິກາສອງສາມຄົນ ທີ່ເປັນສະມາຊິກຂອງສາດສະໜາຈັກ ໄດ້ຖືກແຕ່ງຕັ້ງສູ່ຖານະປະໂລຫິດ. ໃນຕອນຕົ້ນຂອງປະຫວັດສາດ, ຜູ້ນຳຂອງສາດສະໜາຈັກໄດ້ຢຸດການມອບຖານະປະໂລຫິດໃຫ້ແກ່ເຊື້ອສາຍທີ່ເປັນຜູ້ຊາຍຂອງຄົນອາຟຣິກາ. ບັນທຶກຂອງສາດສະໜາຈັກ ບໍ່ມີຂໍ້ມູນທີ່ແຈ່ມແຈ້ງກ່ຽວກັບສາເຫດຂອງການປະຕິບັດນີ້. ຜູ້ນຳຂອງສາດສະໜາຈັກເຊື່ອວ່າ ຈຳເປັນຕ້ອງໄດ້ຮັບການເປີດເຜີຍຈາກພຣະເຈົ້າ ສຳລັບການປ່ຽນແປງ ແລະ ກໍໄດ້ອະທິຖານ ທູນຂໍການຊົງນຳ. ການເປີດເຜີຍໄດ້ມາເຖິງ ປະທານຂອງສາດສະໜາຈັກ ສະເປັນເຊີ ດັບເບິນຢູ ຄິມໂບ ແລະ ໄດ້ຖືກຢືນຢັນຕໍ່ຜູ້ນຳຄົນອື່ນໆຂອງສາດສະໜາຈັກ ໃນພຣະວິຫານເຊົາເລັກ ໃນວັນທີ 1 ເດືອນມິຖຸນາ, 1978. ການເປີດເຜີຍໄດ້ຍົກເລີກເງື່ອນໄຂທັງໝົດ ກ່ຽວກັບເຊື້ອຊາດ ທີ່ຄັ້ງໜຶ່ງ ເຄີຍກ່ຽວຂ້ອງກັບຖານະປະໂລຫິດ.
ເຖິງຜູ້ທີ່ກ່ຽວຂ້ອງ:
ໃນວັນທີ 30 ເດືອນກັນຍາ 1978, ທີ່ກອງປະຊຸມໃຫຍ່ສາມັນເຄິ່ງປີ ຄັ້ງທີ 148 ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເລື່ອງຕໍ່ໄປນີ້ໄດ້ຖືກນຳສະເໜີໂດຍປະທານເອັນ ແອວດອນ ແທນເນີ, ທີ່ປຶກສາທີໜຶ່ງໃນຝ່າຍປະທານສູງສຸດຂອງສາດສະໜາຈັກ:
ໃນຕົ້ນເດືອນມິຖຸນາຂອງປີນີ້, ຝ່າຍປະທານສູງສຸດໄດ້ປະກາດວ່າ ປະທານສະເປັນເຊີ ດັບເບິນຢູ ຄິມໂບ ໄດ້ຮັບການເປີດເຜີຍໃຫ້ມອບພອນຂອງຖານະປະໂລຫິດ ແລະ ພອນຂອງພຣະວິຫານໃຫ້ແກ່ສະມາຊິກຜູ້ຊາຍທີ່ມີຄ່າຄວນທຸກຄົນຂອງສາດສະໜາຈັກ. ປະທານຄິມໂບ ໄດ້ຂໍໃຫ້ຂ້າພະເຈົ້າແຈ້ງບອກຢູ່ໃນກອງປະຊຸມໃຫຍ່ວ່າ ຫລັງຈາກເພິ່ນໄດ້ຮັບການເປີດເຜີຍນີ້, ຊຶ່ງມາເຖິງເພິ່ນຫລັງຈາກທີ່ໄດ້ຄິດໄຕ່ຕອງ ແລະ ອະທິຖານເປັນເວລາດົນນານຢູ່ໃນຫ້ອງສັກສິດຢູ່ໃນພຣະວິຫານທີ່ສັກສິດ, ແລ້ວເພິ່ນໄດ້ສະເໜີມັນຕໍ່ທີ່ປຶກສາຂອງເພິ່ນ, ຜູ້ຊຶ່ງຍອມຮັບ ແລະ ເຫັນພ້ອມ. ຈາກນັ້ນມັນໄດ້ຖືກສະເໜີຕໍ່ກຸ່ມອັກຄະສາວົກສິບສອງ, ຜູ້ຊຶ່ງໄດ້ເຫັນພ້ອມຢ່າງເປັນເອກະສັນ, ແລະ ຕໍ່ມາໄດ້ຖືກສະເໜີຕໍ່ເຈົ້າໜ້າທີ່ຊັ້ນຜູ້ໃຫຍ່ທັງໝົດ, ຜູ້ຊຶ່ງໄດ້ເຫັນພ້ອມຢ່າງເປັນເອກະສັນເຊັ່ນດຽວກັນ.
ປະທານຄິມໂບ ໄດ້ຂໍໃຫ້ຂ້າພະເຈົ້າອ່ານຈົດໝາຍສະບັບນີ້ໃນເວລານີ້:
ວັນທີ 8 ເດືອນມິຖຸນາ, 1978
ເຖິງເຈົ້າໜ້າທີ່ຖານະປະໂລຫິດສາມັນ ແລະ ໃນທ້ອງຖິ່ນທັງຫລາຍຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຕະຫລອດທົ່ວໂລກ:
ອ້າຍນ້ອງທີ່ຮັກແພງທັງຫລາຍ:
ດັ່ງທີ່ພວກເຮົາໄດ້ເປັນພະຍານເຖິງການຂະຫຍາຍວຽກງານ ຂອງພຣະຜູ້ເປັນເຈົ້າຢູ່ເທິງແຜ່ນດິນໂລກ, ພວກເຮົາມີຄວາມກະຕັນຍູຫລາຍ ທີ່ຜູ້ຄົນໃນຫລາຍປະຊາຊາດ ຮັບເອົາຂ່າວສານຂອງພຣະກິດຕິຄຸນ ທີ່ໄດ້ຟື້ນຟູຄືນມາໃໝ່, ແລະ ໄດ້ເຂົ້າຮ່ວມສາດສະໜາຈັກ ເປັນຈຳນວນທີ່ເພີ່ມຂຶ້ນເລື້ອຍໆ. ຜົນກໍຄື ເລື່ອງນີ້ໄດ້ດົນໃຈພວກເຮົາ ໃຫ້ມີຄວາມປາດຖະໜາທີ່ຈະມອບສິດທິພິເສດ ແລະ ພອນທັງປວງ ຊຶ່ງພຣະກິດຕິຄຸນມີໄວ້ສຳລັບສະມາຊິກ ທີ່ມີຄ່າຄວນທຸກຄົນຂອງສາດສະໜາຈັກ.
ໂດຍທີ່ຮູ້ເຖິງຄຳສັນຍາທີ່ໄດ້ເຮັດໄວ້ໂດຍສາດສະດາ ແລະ ປະທານຂອງສາດສະໜາຈັກຜູ້ທີ່ໄດ້ມີຊີວິດຢູ່ກ່ອນພວກເຮົາໃນເວລາໜຶ່ງ, ໃນແຜນນິລັນດອນຂອງພຣະເຈົ້າ, ອ້າຍນ້ອງທີ່ມີຄ່າຄວນທຸກຄົນສາມາດໄດ້ຮັບຖານະປະໂລຫິດ, ແລະ ໂດຍການເປັນພະຍານເຖິງຄວາມຊື່ສັດຂອງຄົນເຫລົ່ານັ້ນທີ່ບໍ່ອາດໄດ້ຮັບຖານະປະໂລຫິດ, ພວກເຮົາຈຶ່ງໄດ້ອ້ອນວອນເປັນເວລາດົນນານ ແລະ ດ້ວຍຄວາມຈິງຈັງແທນຜູ້ຄົນເຫລົ່ານັ້ນ, ອ້າຍນ້ອງຜູ້ຊື່ສັດຂອງພວກເຮົາ, ໂດຍໄດ້ໃຊ້ຫລາຍຊົ່ວໂມງຢູ່ໃນຫ້ອງຊັ້ນເທິງຂອງພຣະວິຫານອ້ອນວອນພຣະຜູ້ເປັນເຈົ້າເພື່ອຂໍການນຳພາຈາກສະຫວັນ.
ພຣະອົງໄດ້ຍິນຄຳອະທິຖານຂອງພວກເຮົາ, ແລະ ໂດຍການເປີດເຜີຍໄດ້ຢືນຢັນວ່າ ວັນທີ່ໄດ້ສັນຍາໄວ້ແຕ່ດົນນານໄດ້ມາເຖິງແລ້ວ ເມື່ອຊາຍຜູ້ມີຄ່າຄວນ, ທີ່ຊື່ສັດທຸກຄົນໃນສາດສະໜາຈັກຈະໄດ້ຮັບຖານະປະໂລຫິດສັກສິດ, ພ້ອມດ້ວຍອຳນາດທີ່ຈະໃຊ້ສິດອຳນາດຈາກສະຫວັນ, ແລະ ຊື່ນຊົມກັບຄົນທີ່ເຂົາຮັກໃນພອນທຸກປະການທີ່ຫລັ່ງໄຫລມາຈາກຖານະປະໂລຫິດ, ລວມທັງພອນຂອງພຣະວິຫານ. ດັ່ງນັ້ນ, ສະມາຊິກຜູ້ຊາຍທີ່ມີຄ່າຄວນທຸກຄົນໃນສາດສະໜາຈັກຈະໄດ້ຮັບການແຕ່ງຕັ້ງສູ່ຖານະປະໂລຫິດໂດຍບໍ່ຄຳນຶງເຖິງເຊື້ອຊາດ ຫລື ຜິວພັນ. ຜູ້ນຳຖານະປະໂລຫິດໄດ້ຮັບຄຳແນະນຳໃຫ້ເຮັດຕາມນະໂຍບາຍຂອງການສຳພາດຜູ້ຖືກພິຈາລະນາທັງໝົດຢ່າງລະມັດລະວັງ ສຳລັບການແຕ່ງຕັ້ງບໍ່ວ່າຈະເປັນຖານະປະໂລຫິດ ແຫ່ງອາໂຣນ ຫລື ຖານະປະໂລຫິດແຫ່ງເມນຄີເສເດັກ ເພື່ອໃຫ້ແນ່ໃຈວ່າເຂົາເຈົ້າມີຄຸນສົມບັດຕາມມາດຕະຖານທີ່ໄດ້ຈັດຕັ້ງໄວ້ສຳລັບການມີຄ່າຄວນ.
ພວກເຮົາຂໍປະກາດດ້ວຍສະຕິສຳປະສັນຍະວ່າ ບັດນີ້ພຣະຜູ້ເປັນເຈົ້າໄດ້ເຮັດໃຫ້ພຣະປະສົງຂອງພຣະອົງເປັນທີ່ຮູ້ຈັກແກ່ລູກໆທັງປວງຂອງພຣະອົງຕະຫລອດທົ່ວທັງແຜ່ນດິນໂລກ ຜູ້ຈະເຊື່ອຟັງສຽງຂອງຜູ້ຮັບໃຊ້ທີ່ໄດ້ຮັບສິດອຳນາດຈາກພຣະອົງ, ແລະ ຕຽມຕົນເອງໃຫ້ພ້ອມທີ່ຈະຮັບເອົາພອນທຸກປະການຂອງພຣະກິດຕິຄຸນ.
ດ້ວຍຄວາມຈິງໃຈ,
ສະເປັນເຊີ ດັບເບິນຢູ ຄິມໂບ
ເອັນ ແອວດອນ ແທນເນີ
ແມຣິອອນ ຈີ ຣອມນີ
ຝ່າຍປະທານສູງສຸດ
ໂດຍການຮັບຮູ້ສະເປັນເຊີ ດັບເບິນຢູ ຄິມໂບ ເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ, ແລະ ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຈຶ່ງຂໍສະເໜີວ່າພວກເຮົາໃນຖານະທີ່ເປັນກຳມະການຝ່າຍກົດໝາຍຍອມຮັບວ່າການເປີດເຜີຍນີ້ເປັນພຣະຄຳ ແລະ ພຣະປະສົງຂອງພຣະຜູ້ເປັນເຈົ້າ. ທຸກຄົນທີ່ເຫັນດ້ວຍຂໍໃຫ້ຍົກມືຂວາຂອງທ່ານຂຶ້ນ. ຄົນທີ່ຄັດຄ້ານຂໍໃຫ້ຍົກມືຂຶ້ນ.
ການອອກສຽງສະໜັບສະໜູນຂໍ້ສະເໜີທີ່ກ່າວມາແລ້ວຢູ່ຂ້າງເທິງແມ່ນເຫັນພ້ອມເປັນເອກະສັນ.
ເມືອງເຊົາເລັກ, ລັດຢູທາ, ວັນທີ 30 ເດືອນກັນຍາ, 1978.