ຂໍ້ປະກາດຢ່າງເປັນທາງການ 1
ພຣະຄຣິສຕະທຳຄຳພີ ແລະ ພຣະຄຳພີມໍມອນ ສິດສອນວ່າ ລະບົບຜົວດຽວເມຍດຽວ ເປັນມາດຕະຖານຂອງພຣະເຈົ້າ ສຳລັບການແຕ່ງງານ ຍົກເວັ້ນແຕ່ ພຣະອົງປະກາດອີກຢ່າງໜຶ່ງ (ເບິ່ງ 2 ຊາມູເອນ 12:7–8 ແລະ ຢາໂຄບ 2:27, 30). ຕໍ່ໄປນີ້ ຄືການເປີດເຜີຍຕໍ່ໂຈເຊັບ ສະມິດ, ເລື່ອງການແຕ່ງເມຍຫລາຍຄົນ ຊຶ່ງໄດ້ປະຕິບັດກັນ ໃນບັນດາສະມາຊິກຂອງສາດສະໜາຈັກ ໃນຕົ້ນປີ 1840 (ເບິ່ງ ພາກທີ 132). ຈາກປີ 1860 ເຖິງປີ 1880, ຝ່າຍລັດຖະບານຂອງສະຫະລັດ ອາເມຣິກາ ໄດ້ຜ່ານກົດທີ່ລະບຸວ່າ ການແຕ່ງເມຍຫລາຍຄົນ ເປັນສິ່ງຜິດກົດໝາຍ. ກົດເຫລົ່ານີ້ ໃນທີ່ສຸດກໍຖືກສະໜັບສະໜູນໂດຍສານສູງສຸດຂອງສະຫະລັດ. ຫລັງຈາກໄດ້ຮັບການເປີດເຜີຍ, ປະທານວິວເຝີດ ວູດດຣັບ ໄດ້ລະບຸຄຳຖະແຫລງນະໂຍບາຍດັ່ງຕໍ່ໄປນີ້, ຊຶ່ງໄດ້ຖືກຮັບຮູ້ໂດຍສາດສະໜາຈັກ ວ່າເປັນຄຳສັ່ງຢ່າງເປັນທາງການ ແລະ ມີອຳນາດ ໃນວັນທີ 6 ເດືອນຕຸລາ, 1890. ສິ່ງນີ້ໄດ້ເຮັດໃຫ້ການແຕ່ງເມຍຫລາຍຄົນ ສິ້ນສຸດລົງ ໃນສາດສະໜາຈັກ.
ເຖິງຜູ້ທີ່ກ່ຽວຂ້ອງ:
ລາຍງານຂ່າວຈາກເມືອງເຊົາເລັກ, ເພື່ອຈຸດປະສົງທາງການເມືອງ, ຊຶ່ງໄດ້ພິມແຈກຢາຍທົ່ວ, ມີເນື້ອຄວາມຄະນະກຳມະການຢູທາ, ໃນການລາຍງານຂອງເຂົາເຈົ້າເຖິງລັດຖະມົນຕີກະຊວງພາຍໃນເມື່ອບໍ່ດົນມານີ້, ອ້າງວ່າການແຕ່ງເມຍຫລາຍຄົນຍັງປະຕິບັດກັນຢູ່ ແລະ ວ່າມີການແຕ່ງງານເຊັ່ນນັ້ນຈຳນວນສີ່ສິບຄົນ ຫລື ຫລາຍກວ່ານັ້ນຢູ່ໃນລັດຢູທາ ນັບຕັ້ງແຕ່ເດືອນມິຖຸນາທີ່ຜ່ານມາ ຫລື ລະຫວ່າງປີທີ່ຜ່ານມາ, ພ້ອມນີ້ວ່າຢູ່ໃນຄຳປາໄສຕໍ່ໜ້າສາທາລະນະຊົນ ຜູ້ນຳຂອງສາດສະໜາຈັກໄດ້ສິດສອນ, ໄດ້ສະໜັບສະໜູນ ແລະ ຊຸກຍູ້ໃຫ້ປະຕິບັດການມີເມຍຫລາຍຄົນຕໍ່ໄປ—
ສະນັ້ນ, ຂ້າພະເຈົ້າ, ໃນຖານະທີ່ເປັນປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ໃນຕອນນີ້, ໃນຄວາມຈິງຈັງທີ່ສຸດ, ຂໍປະກາດວ່າ ຂໍ້ກ່າວຫາເຫລົ່ານີ້ເປັນຄວາມເທັດ. ພວກເຮົາບໍ່ໄດ້ສິດສອນເລື່ອງການມີເມຍຫລາຍຄົນ ຫລື ການແຕ່ງເມຍຫລາຍຄົນ, ຫລື ອະນຸຍາດໃຫ້ຄົນໃດຄົນໜຶ່ງປະຕິບັດເຊັ່ນນັ້ນ, ແລະ ຂ້າພະເຈົ້າຂໍປະຕິເສດວ່າບໍ່ມີສີ່ສິບຄົນ ຫລື ຈັກຄົນທີ່ໄດ້ແຕ່ງເມຍຫລາຍຄົນໃນໄລຍະເວລານັ້ນຢູ່ໃນພຣະວິຫານຂອງພວກເຮົາ ຫລື ໃນສະຖານທີ່ອື່ນໃດກໍຕາມໃນຂົງເຂດນີ້.
ມີກໍລະນີໜຶ່ງໄດ້ຖືກລາຍງານວ່າ ມີບາງຄົນໄດ້ຖືກກ່າວຫາວ່າໄດ້ແຕ່ງງານຢູ່ໃນບ້ານຮັບຂອງປະທານສັກສິດ, ໃນເມືອງເຊົາເລັກ, ໃນລະດູໃບໄມ້ປົ່ງຂອງປີ 1889, ແຕ່ຂ້າພະເຈົ້າບໍ່ສາມາດຮູ້ໄດ້ວ່າ ແມ່ນໃຜເປັນຜູ້ປະຕິບັດພິທີ; ສິ່ງໃດທີ່ໄດ້ເຮັດໄປໃນເລື່ອງນີ້ແມ່ນປາດສະຈາກຄວາມຮູ້ເຫັນຂອງຂ້າພະເຈົ້າ. ເນື່ອງຈາກຄຳກ່າວຫາກ່ຽວກັບເລື່ອງນີ້, ບ້ານຮັບຂອງປະທານສັກສິດຈຶ່ງຖືກຮື້ຖອນ, ຕາມຄຳແນະນຳຂອງຂ້າພະເຈົ້າ.
ຕາບໃດທີ່ສະພາແຫ່ງລັດຍັງອອກຄຳສັ່ງຫ້າມການແຕ່ງເມຍຫລາຍຄົນ, ຊຶ່ງກົດໝາຍເຫລົ່ານັ້ນໄດ້ຖືກລະບຸໂດຍສານສູງສຸດ, ຂ້າພະເຈົ້າຈຶ່ງປະກາດຄວາມເຈດຕະນາຂອງຂ້າພະເຈົ້າໃນຕອນນີ້ທີ່ຈະຍິນຍອມຕໍ່ກົດໝາຍເຫລົ່ານັ້ນ, ແລະ ຈະໃຊ້ອິດທິພົນຂອງຂ້າພະເຈົ້າທີ່ມີຕໍ່ສະມາຊິກຂອງສາດສະໜາຈັກຊຶ່ງຂ້າພະເຈົ້າຄວບຄຸມຢູ່ ເພື່ອໃຫ້ເຂົາເຈົ້າເຮັດເຊັ່ນດຽວກັນ.
ບໍ່ມີຂໍ້ຄວາມໃດໃນຄຳສອນຂອງຂ້າພະເຈົ້າຕໍ່ສາດສະໜາຈັກ ຫລື ໃນຄຳສອນຂອງຜູ້ຮ່ວມງານຂອງຂ້າພະເຈົ້າ, ໃນໄລຍະເວລາທີ່ລະບຸໄວ້, ຊຶ່ງຈະຕີຄວາມໝາຍໄດ້ຢ່າງມີເຫດຜົນເພື່ອສົ່ງເສີມ ຫລື ສະໜັບສະໜູນການມີເມຍຫລາຍຄົນ; ແລະ ເມື່ອແອວເດີຄົນໃດຂອງສາດສະໜາຈັກໃຊ້ພາສາຊຶ່ງເບິ່ງຄືວ່າເປັນການກ່າວເຖິງຄຳສອນໃດໆເຊັ່ນນັ້ນ, ເຂົາກໍໄດ້ຖືກຕຳນິທັນທີ. ແລະ ບັດນີ້ຂ້າພະເຈົ້າຂໍປະກາດຕໍ່ສາທາລະນະຊົນວ່າ ຄຳແນະນຳຕໍ່ໄພ່ພົນຍຸກສຸດທ້າຍຄືໃຫ້ຫລີກເວັ້ນຈາກການເຂົ້າພິທີແຕ່ງງານໃດໆທີ່ຖືກສັ່ງຫ້າມໂດຍກົດໝາຍຂອງບ້ານເມືອງ.
ວິວເຝີດ ວູດຣັບ
ປະທານຂອງສາດສະໜາຈັກຂອງພຣະເຢຊູຄຣິດ
ແຫ່ງໄພ່ພົນຍຸກສຸດທ້າຍ.
ປະທານໂລເຣັນໂຊ ສະໂນ ໄດ້ກ່າວໄວ້ດັ່ງນີ້:
“ຂ້າພະເຈົ້າຂໍສະເໜີວ່າ, ໂດຍການຮັບຮູ້ ວິວເຝີດ ວູດຣັບ ເປັນປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ແລະ ເປັນມະນຸດພຽງຄົນດຽວຢູ່ເທິງແຜ່ນດິນໂລກໃນປະຈຸບັນນີ້ທີ່ຖືຂໍກະແຈຂອງພິທີການຜະນຶກ, ພວກເຮົາຖືວ່າເພິ່ນມີສິດອຳນາດເຕັມ ທີ່ໂດຍອີງຕາມຕຳແໜ່ງຂອງເພິ່ນທີ່ຈະອອກຄຳຖະແຫລງນະໂຍບາຍຊຶ່ງໄດ້ອ່ານໃຫ້ພວກເຮົາຟັງແລ້ວ, ແລະ ຊຶ່ງລົງວັນທີ 24 ເດືອນກັນຍາ, 1890, ແລະ ວ່າໃນຖານະສາດສະໜາຈັກທີ່ມາຊຸມນຸມກັນໃນກອງປະຊຸມໃຫຍ່ສາມັນ, ພວກເຮົາຍອມຮັບຂໍ້ປະກາດຂອງເພິ່ນກ່ຽວກັບ ການແຕ່ງເມຍຫລາຍຄົນວ່າເປັນຄຳສັ່ງຢ່າງເປັນທາງການ ແລະ ມີອຳນາດບັງຄັບ.”
ເມືອງເຊົາເລັກ, ລັດຢູທາ, ວັນທີ 6 ເດືອນຕຸລາ, 1890.
ຂໍ້ຄວາມທີ່ຂັດເລືອກອອກມາຈາກຄຳປາໄສສາມບົດ ຊຶ່ງກ່າວໂດຍ
ປະທານວິວເຝີດ ວູດຣັບ
ກ່ຽວກັບຄຳຖະແຫລງນະໂຍບາຍ
ພຣະຜູ້ເປັນເຈົ້າຈະບໍ່ມີວັນອະນຸຍາດໃຫ້ຂ້າພະເຈົ້າ ຫລື ຊາຍຄົນໃດກໍຕາມຊຶ່ງດຳລົງຖານະປະທານຂອງສາດສະໜາຈັກນີ້ນຳພາພວກທ່ານໄປຜິດທາງ. ມັນບໍ່ໄດ້ຢູ່ໃນແຜນ. ມັນບໍ່ໄດ້ເປັນພຣະປະສົງຂອງພຣະເຈົ້າ. ຖ້າຫາກຂ້າພະເຈົ້າພະຍາຍາມຈະເຮັດເຊັ່ນນັ້ນ, ພຣະຜູ້ເປັນເຈົ້າຈະຍ້າຍຂ້າພະເຈົ້າອອກຈາກຕຳແໜ່ງຂອງຂ້າພະເຈົ້າ, ແລະ ພຣະອົງຈະເຮັດເຊັ່ນນັ້ນກັບຊາຍຄົນໃດກໍຕາມທີ່ພະຍາຍາມນຳພາລູກຫລານມະນຸດ ໄປຜິດທາງຈາກການຮັບການເປີດເຜີຍຈາກພຣະເຈົ້າ ແລະ ຈາກໜ້າທີ່ຂອງເຂົາເຈົ້າ. (ກອງປະຊຸມໃຫຍ່ສາມັນເຄິ່ງປີຂອງສາດສະໜາຈັກ, ວັນຈັນ, ວັນທີ 6 ເດືອນຕຸລາ, 1890, ເມືອງເຊົາເລັກ, ລັດຢູທາ. ລາຍງານໃນ Deseret Evening News, ວັນທີ 11 ເດືອນຕຸລາ, 1890, ໜ້າທີ 2.)
ບໍ່ສຳຄັນວ່າໃຜມີຊີວິດຢູ່ ຫລື ໃຜຕາຍ, ຫລື ຜູ້ໃດຖືກເອີ້ນໃຫ້ນຳພາສາດສະໜາຈັກນີ້, ເຂົາເຈົ້າຕ້ອງນຳພາມັນໂດຍການດົນໃຈຈາກພຣະເຈົ້າຜູ້ຊົງລິດອຳນາດຍິ່ງໃຫຍ່. ຖ້າຫາກເຂົາເຈົ້າບໍ່ເຮັດໃນວິທີນີ້, ພວກເຂົາຈະບໍ່ສາມາດເຮັດໄດ້ເລີຍ. …
ຂ້າພະເຈົ້າໄດ້ຮັບການເປີດເຜີຍບາງເລື່ອງເມື່ອບໍ່ດົນມານີ້, ແລະ ສຳຄັນຫລາຍຕໍ່ຂ້າພະເຈົ້າ, ແລະ ຂ້າພະເຈົ້າຈະບອກພວກທ່ານເຖິງສິ່ງທີ່ພຣະຜູ້ເປັນເຈົ້າໄດ້ກ່າວກັບຂ້າພະເຈົ້າ. ຂໍໃຫ້ຂ້າພະເຈົ້ານຳຄວາມຄິດຂອງພວກທ່ານມາສູ່ສິ່ງທີ່ເອີ້ນກັນວ່າຄຳຖະແຫລງນະໂຍບາຍ. …
ພຣະຜູ້ເປັນເຈົ້າໄດ້ບອກໃຫ້ຂ້າພະເຈົ້າຖາມໄພ່ພົນຍຸກສຸດທ້າຍຄຳຖາມໜຶ່ງ, ແລະ ພຣະອົງໄດ້ບອກຂ້າພະເຈົ້າອີກວ່າ ຖ້າຫາກເຂົາເຈົ້າຈະຟັງສິ່ງທີ່ຂ້າພະເຈົ້າໄດ້ກ່າວກັບເຂົາເຈົ້າ ແລະ ຕອບຄຳຖາມທີ່ຖາມເຂົາເຈົ້າ, ໂດຍພຣະວິນຍານ ແລະ ອຳນາດຂອງພຣະເຈົ້າ, ເຂົາເຈົ້າທຸກຄົນຈະຕອບຄືກັນ, ແລະ ເຂົາເຈົ້າທຸກຄົນຈະເຊື່ອຄືກັນກ່ຽວກັບເລື່ອງນີ້.
ນີ້ຄືຄຳຖາມ: ວິທີທາງໃດທີ່ສະຫລາດທີ່ສຸດສຳລັບໄພ່ພົນຍຸກສຸດທ້າຍທີ່ຈະດຳເນີນຕໍ່ໄປ—ພະຍາຍາມປະຕິບັດການແຕ່ງເມຍຫລາຍຄົນຕໍ່ໄປ, ໂດຍມີກົດໝາຍຂອງປະເທດຊາດຄັດຄ້ານເລື່ອງນີ້ ແລະ ມີການຕໍ່ຕ້ານຈາກປະຊາຊົນຫົກສິບລ້ານຄົນ, ແລະ ແລກດ້ວຍການຖືກຍຶດ ແລະ ສູນເສຍພຣະວິຫານທັງໝົດ, ແລະ ຢຸດເຮັດພິທີການທັງປວງຢູ່ໃນນັ້ນ, ທັງສຳລັບຄົນເປັນ ແລະ ຄົນຕາຍ, ແລະ ການຄຸມຂັງຝ່າຍປະທານສູງສຸດ ແລະ ສະພາອັກຄະສາວົກສິບສອງ ແລະ ຫົວໜ້າຄອບຄົວໃນສາດສະໜາຈັກ, ແລະ ການຖືກຍຶດຊັບສິນສ່ວນຕົວຂອງຜູ້ຄົນ (ທັງໝົດທີ່ກ່າວມານັ້ນຈະເຮັດໃຫ້ຢຸດການແຕ່ງເມຍຫລາຍຄົນ); ຫລື, ຫລັງຈາກສິ່ງທີ່ພວກເຮົາໄດ້ເຮັດໄປ ແລະ ໄດ້ຮັບທຸກທໍລະມານໂດຍການຍຶດໝັ້ນຕໍ່ຫລັກທຳນີ້ ພວກເຮົາຈະເຊົາປະຕິບັດ ແລະ ຍິນຍອມຕໍ່ກົດໝາຍ, ແລະ ຜ່ານການກະທຳເຊັ່ນນັ້ນ ຈະປ່ອຍໃຫ້ສາດສະດາ, ອັກຄະສາວົກ ແລະ ພໍ່ຢູ່ບ້ານ, ເພື່ອວ່າເຂົາເຈົ້າຈະສາມາດແນະນຳຜູ້ຄົນ ແລະ ເອົາໃຈໃສ່ຕໍ່ໜ້າທີ່ຂອງສາດສະໜາຈັກ, ແລະ ປະພຣະວິຫານຢູ່ໃນມືຂອງໄພ່ພົນຂອງພຣະເຈົ້າ, ເພື່ອວ່າເຂົາເຈົ້າຈະສາມາດເອົາໃຈໃສ່ຕໍ່ພິທີການຂອງພຣະກິດຕິຄຸນ, ທັງຄົນເປັນ ແລະ ຄົນຕາຍ?
ພຣະຜູ້ເປັນເຈົ້າໄດ້ສະແດງໃຫ້ຂ້າພະເຈົ້າເຫັນພາບນິມິດ ແລະ ການເປີດເຜີຍເຖິງສິ່ງທີ່ຈະເກີດຂຶ້ນຢ່າງແນ່ນອນຖ້າຫາກພວກເຮົາບໍ່ເຊົາການປະຕິບັດນີ້. ຖ້າຫາພວກເຮົາບໍ່ເຊົາປະຕິບັດ, ພວກທ່ານບໍ່ຈຳເປັນຕ້ອງມີ … ຊາຍຄົນໃດເລີຍໃນພຣະວິຫານນີ້ທີ່ໂລແກນ; ເພາະວ່າພິທີການທັງໝົດຈະຖືກເຮັດໃຫ້ຢຸດຕະຫລອດທົ່ວແຜ່ນດິນຊີໂອນ. ຄວາມສັບສົນຈະປົກຄອງຕະຫລອດທົ່ວອິດສະຣາເອນ, ແລະ ຜູ້ຊາຍຢ່າງຫລວງຫລາຍຈະຖືກຄຸມຂັງ. ຄວາມເດືອດຮ້ອນນີ້ຈະມາເຖິງສາດສະໜາຈັກທັງໝົດ, ແລະ ພວກເຮົາຈະຖືກບັງຄັບໃຫ້ເຊົາການປະຕິບັດ. ບັດນີ້, ຄຳຖາມຄື, ບໍ່ວ່າມັນຈະຖືກຢຸດຕິໃນລັກສະນະນີ້, ຫລື ໃນວິທີທີ່ພຣະຜູ້ເປັນເຈົ້າໄດ້ສະແດງໃຫ້ປະຈັກແກ່ພວກເຮົາ, ແລະ ປ່ອຍໃຫ້ສາດສະດາ ແລະ ອັກຄະສາວົກ ແລະ ພໍ່ຂອງພວກເຮົາເປັນອິດສະລະ, ແລະ ພຣະວິຫານຢູ່ໃນມືຂອງຜູ້ຄົນ, ເພື່ອວ່າຄົນຕາຍຈະໄດ້ຮັບການໄຖ່. ຈຳນວນຫລວງຫລາຍໄດ້ຮັບການປົດປ່ອຍແລ້ວຈາກຄຸກຢູ່ໃນໂລກວິນຍານໂດຍຜູ້ຄົນເຫລົ່ານີ້, ແລະ ວຽກງານຄວນຈະດຳເນີນຕໍ່ໄປ ຫລື ຢຸດ? ນີ້ຄືຄຳຖາມທີ່ຂ້າພະເຈົ້າວາງໄວ້ຕໍ່ໜ້າໄພ່ພົນຍຸກສຸດທ້າຍ. ພວກທ່ານຕ້ອງຕັດສິນດ້ວຍຕົວພວກທ່ານເອງ. ຂ້າພະເຈົ້າຈະບໍ່ຕອບຄຳຖາມນີ້; ແຕ່ຂ້າພະເຈົ້າກ່າວກັບພວກທ່ານວ່າ ນັ້ນຄືສະພາບທີ່ພວກເຮົາໃນຖານະເປັນຜູ້ຄົນກຸ່ມໜຶ່ງຈະຕ້ອງຕົກຢູ່ຖ້າຫາກພວກເຮົາບໍ່ໄດ້ເລືອກວິທີທາງທີ່ພວກເຮົາໄດ້ເລືອກ.
… ຂ້າພະເຈົ້າໄດ້ເຫັນຢ່າງແນ່ນອນສິ່ງທີ່ຈະເກີດຂຶ້ນຖ້າຫາກບໍ່ໄດ້ເຮັດບາງສິ່ງບາງຢ່າງ. ຂ້າພະເຈົ້າມີຄວາມຮູ້ສຶກເຊັ່ນນີ້ມາເປັນເວລາດົນນານ. ແຕ່ຂ້າພະເຈົ້າຢາກກ່າວດັ່ງນີ້: ຂ້າພະເຈົ້າຈະປ່ອຍໃຫ້ພຣະວິຫານທັງໝົດຫລຸດມືຂອງພວກເຮົາໄປ; ຂ້າພະເຈົ້າເອງຈະເຂົ້າໄປຢູ່ໃນຄຸກ, ແລະ ໃຫ້ຊາຍຄົນອື່ນໆທຸກຄົນໄປບ່ອນນັ້ນ, ຖ້າຫາກພຣະເຈົ້າແຫ່ງສະຫວັນບໍ່ໄດ້ບັນຊາຂ້າພະເຈົ້າໃຫ້ເຮັດສິ່ງທີ່ຂ້າພະເຈົ້າໄດ້ເຮັດໄປນັ້ນ; ແລະ ເມື່ອຊົ່ວໂມງນັ້ນມາເຖິງ ຊຶ່ງຂ້າພະເຈົ້າໄດ້ຮັບບັນຊາໃຫ້ເຮັດການນັ້ນ ທຸກຢ່າງແຈ່ມແຈ້ງຕໍ່ຂ້າພະເຈົ້າ. ຂ້າພະເຈົ້າໄດ້ເຂົ້າຫາພຣະຜູ້ເປັນເຈົ້າ, ແລະ ຂ້າພະເຈົ້າໄດ້ຂຽນສິ່ງທີ່ພຣະຜູ້ເປັນເຈົ້າບອກໃຫ້ຂ້າພະເຈົ້າຂຽນ. …
ຂ້າພະເຈົ້າຝາກເລື່ອງນີ້ໄວ້ກັບພວກທ່ານເພື່ອໃຫ້ໄຕ່ຕອງ ແລະ ພິຈາລະນາ. ພຣະຜູ້ເປັນເຈົ້າໄດ້ເຮັດວຽກງານຢູ່ກັບພວກເຮົາ. (ກອງປະຊຸມສະເຕກແຄສ໌, ໂລແກນ, ລັດຢູທາ, ວັນອາທິດ, ວັນທີ 1 ເດືອນພະຈິກ, 1891. ລາຍງານໃນ Deseret Weekly, ວັນທີ 14 ເດືອນພະຈິກ, 1891.)
ບັດນີ້ຂ້າພະເຈົ້າຈະບອກພວກທ່ານເຖິງສິ່ງທີ່ຖືກສະແດງໃຫ້ປະຈັກແກ່ຂ້າພະເຈົ້າ ແລະ ສິ່ງທີ່ພຣະບຸດຂອງພຣະເຈົ້າໄດ້ກະທຳໃນເລື່ອງນີ້. … ທຸກສິ່ງທັງປວງເຫລົ່ານີ້ຈະເກີດຂຶ້ນ, ດັ່ງທີ່ພຣະເຈົ້າຜູ້ຊົງລິດອຳນາດຍິ່ງໃຫຍ່ ຊົງພຣະຊົນຢູ່, ຖ້າຫາກຄຳຖະແຫລງນະໂຍບາຍບໍ່ໄດ້ຖືກມອບໃຫ້. ສະນັ້ນ, ພຣະບຸດຂອງພຣະເຈົ້າຈຶ່ງຮູ້ສຶກໂນ້ມອ່ຽງທີ່ຈະສະເໜີສິ່ງນີ້ຕໍ່ສາດສະໜາຈັກ ແລະ ຕໍ່ໂລກເພື່ອຈຸດປະສົງໃນຄວາມຄິດຂອງພຣະອົງເອງ. ພຣະຜູ້ເປັນເຈົ້າໄດ້ອອກຄຳສັ່ງໃຫ້ສ້າງຕັ້ງຊີໂອນ. ພຣະອົງໄດ້ອອກຄຳສັ່ງໃຫ້ສ້າງພຣະວິຫານແຫ່ງນີ້ໃຫ້ສຳເລັດ. ພຣະອົງໄດ້ອອກຄຳສັ່ງວ່າຄວາມລອດຂອງຄົນເປັນ ແລະ ຄົນຕາຍຄວນຈະຖືກມອບໃຫ້ໃນຫ່ອມພູເຫລົ່ານີ້. ແລະ ພຣະເຈົ້າຜູ້ຊົງລິດອຳນາດຍິ່ງໃຫຍ່ໄດ້ອອກຄຳສັ່ງວ່າ ມານຈະບໍ່ມາຂັດຂວາງ. ຖ້າຫາກພວກທ່ານສາມາດເຂົ້າໃຈມັນ, ນັ້ນຄືຂໍກະແຈສູ່ສິ່ງນີ້. (ຈາກຄຳປາໄສໃນພາກທີຫົກຂອງການອຸທິດພຣະວິຫານເຊົາເລັກ, ເດືອນເມສາ 1893. ເອກະສານພິມດີດຂອງພິທີການອຸທິດ, ເອກະສານເກົ່າທີ່ສຳຄັນ, ພະແນກປະຫວັດສາດຂອງສາດສະໜາຈັກ, ເມືອງເຊົາເລັກ, ລັດຢູທາ.)