ພາກທີ 99
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ ເຖິງຈອນ ເມີດ໊ອກ, ວັນທີ 29 ເດືອນສິງຫາ 1832, ທີ່ເມືອງໄຮຣຳ, ລັດໂອໄຮໂອ. ເປັນເວລາຫລາຍກວ່າໜຶ່ງປີ, ຈອນ ເມີດ໊ອກ ໄດ້ສັ່ງສອນພຣະກິດຕິຄຸນ ໃນຂະນະທີ່ລູກໆຂອງລາວ—ຜູ້ບໍ່ມີແມ່ ຫລັງຈາກເມຍຂອງລາວ, ຈູເລຍ ຄະລາບ ໄດ້ເສຍຊີວິດໄປ, ໃນເດືອນເມສາ 1831—ໄດ້ອາໄສຢູ່ກັບຄອບຄົວຂອງຄົນອື່ນ ຢູ່ໃນລັດໂອໄຮໂອ.
1–8, ຈອນ ເມີດ໊ອກ ໄດ້ຖືກເອີ້ນໃຫ້ປະກາດພຣະກິດຕິຄຸນ, ແລະ ຄົນທີ່ຮັບເອົາລາວ ຍ່ອມຮັບເອົາພຣະຜູ້ເປັນເຈົ້າ ແລະ ຈະໄດ້ຮັບຄວາມເມດຕາ.
1 ຈົ່ງເບິ່ງ, ພຣະຜູ້ເປັນເຈົ້າໄດ້ກ່າວດັ່ງນີ້ກັບຜູ້ຮັບໃຊ້ຂອງເຮົາ ຈອນ ເມີດ໊ອກ—ເຈົ້າຖືກເອີ້ນໃຫ້ໄປຫາດິນແດນພາກຕາເວັນອອກ ຈາກເຮືອນໜຶ່ງຫາອີກເຮືອນໜຶ່ງ, ຈາກໝູ່ບ້ານໜຶ່ງໄປຫາອີກໝູ່ບ້ານໜຶ່ງ, ແລະ ຈາກ ເມືອງໜຶ່ງໄປຫາອີກເມືອງໜຶ່ງ, ເພື່ອປະກາດພຣະກິດຕິຄຸນອັນເປັນນິດຂອງເຮົາໃຫ້ແກ່ຜູ້ອາໄສຢູ່ໃນນັ້ນ, ໃນ ທ່າມກາງ ກການຂົ່ມເຫັງ ແລະ ຄວາມຊົ່ວຮ້າຍ.
2 ແລະ ຄົນໃດທີ່ ກຮັບເອົາເຈົ້າ ຍ່ອມຮັບເອົາເຮົາ; ແລະ ເຈົ້າຈະມີອຳນາດທີ່ຈະປະກາດຄຳຂອງເຮົາໂດຍ ຂການສະແດງອອກດ້ວຍພຣະວິນຍານສັກສິດຂອງເຮົາ.
3 ແລະ ຄົນໃດທີ່ຮັບເອົາເຈົ້າ ກດັ່ງເດັກນ້ອຍໆ, ກໍໄດ້ຮັບເອົາ ຂອານາຈັກຂອງເຮົາ; ແລະ ພວກເຂົາເປັນສຸກແລ້ວ, ເພາະພວກເຂົາຈະໄດ້ຮັບ ຄຄວາມເມດຕາ.
4 ແລະ ຜູ້ໃດກໍຕາມທີ່ປະຕິເສດເຈົ້າ ຈະຖືກ ກປະຕິເສດຈາກພຣະບິດາຂອງເຮົາ ແລະ ຄອບຄົວຂອງພຣະອົງ; ແລະເຈົ້າຈະລ້າງ ຂຕີນຂອງເຈົ້າຢູ່ໃນບ່ອນລັບລີ້ໃນລະຫວ່າງທາງ ເພື່ອເປັນປະຈັກພະຍານຟ້ອງພວກເຂົາ.
5 ແລະ ຈົ່ງເບິ່ງ, ແລະ ເບິ່ງແມ, ເຮົາ ກມາຢ່າງໄວເພື່ອ ຂພິພາກສາ, ເພື່ອໃຫ້ພວກເຂົາຍອມຮັບການກະທຳທີ່ອະທຳທັງໝົດຂອງພວກເຂົາຊຶ່ງພວກເຂົາໄດ້ເຮັດຕໍ່ເຮົາ, ດັ່ງທີ່ມີຂຽນໄວ້ກ່ຽວກັບເຮົາໃນໜັງສືເຫລັ້ມໜຶ່ງ.
6 ແລະ ບັດນີ້, ຕາມຄວາມຈິງແລ້ວ ເຮົາກ່າວກັບເຈົ້າວ່າ ມັນບໍ່ເໝາະສົມທີ່ເຈົ້າຈະໄປຈົນກວ່າລູກໆຂອງເຈົ້າຖືກຈັດຫາໃຫ້ກ່ອນ, ແລະ ຖືກສົ່ງໄປຫາອະທິການຂອງຊີໂອນດ້ວຍຄວາມອ່ອນໂຍນ.
7 ແລະ ຫລັງຈາກບໍ່ຫລາຍປີຈາກນັ້ນ, ຖ້າຫາກເຈົ້າປາດຖະໜາຈາກເຮົາ, ເຈົ້າສາມາດຂຶ້ນໄປຍັງແຜ່ນດິນດີ, ເພື່ອຮັບເອົາມູນມໍລະດົກຂອງເຈົ້າ;
8 ຖ້າບໍ່ດັ່ງນັ້ນ ເຈົ້າຈົ່ງສືບຕໍ່ປະກາດພຣະກິດຕິຄຸນຂອງເຮົາ ກຈົນກວ່າເຈົ້າຖືກເອົາໄປ. ອາແມນ.