ພາກທີ 72
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຄີດແລນ, ລັດໂອໄຮໂອ, ວັນທີ 4 ເດືອນທັນວາ, 1831. ແອວເດີ ແລະ ສະມາຊິກຫລາຍຄົນໄດ້ມາຊຸມນຸມກັນເພື່ອຮຽນຮູ້ໜ້າທີ່ຂອງພວກເຂົາ ແລະ ເພື່ອຈະໄດ້ຮັບການເສີມສ້າງຕໍ່ໄປໃນຄຳສອນຂອງສາດສະໜາຈັກ. ພາກນີ້ເປັນການຮ່ວມການເປີດເຜີຍສາມຄັ້ງທີ່ໄດ້ຮັບໃນວັນດຽວກັນ. ຂໍ້ທີ 1 ຈົນເຖິງ 8 ບອກໃຫ້ຮູ້ເຖິງການເອີ້ນຂອງນິວເອັນ ເຄ ວິດນີ ເປັນອະທິການ. ແລ້ວລາວໄດ້ຮັບການເອີ້ນ ແລະ ໄດ້ຮັບການແຕ່ງຕັ້ງ, ຫລັງຈາກນັ້ນ ກໍໄດ້ຮັບ ຂໍ້ທີ 9 ຈົນເຖິງ 23 ຊຶ່ງໃຫ້ ຂໍ້ມູນເພີ່ມເຕີມ ກ່ຽວກັບໜ້າທີ່ຂອງອະທິການ. ຫລັງຈາກນັ້ນ, ຂໍ້ທີ 24 ຈົນເຖິງ 26 ກໍໄດ້ຖືກມອບໃຫ້, ຊຶ່ງເປັນຄຳແນະນຳກ່ຽວກັບການເຕົ້າໂຮມກັນທີ່ຊີໂອນ.
1–8, ແອວເດີຕ້ອງລາຍງານເລື່ອງລາວກ່ຽວກັບສິ່ງທີ່ຢູ່ໃນຄວາມພິທັກຮັກສາຂອງພວກເຂົາຕໍ່ອະທິການ; 9–15, ອະທິການເປັນຜູ້ຮັກສາຄັງ ແລະ ດູແລຄົນຍາກຈົນ ແລະ ຄົນຂັດສົນ; 16–26, ອະທິການເປັນຜູ້ຮັບຮອງການມີຄ່າຄວນຂອງແອວເດີ.
1 ຈົ່ງເຊື່ອຟັງ, ແລະ ຟັງສຸລະສຽງຂອງພຣະຜູ້ເປັນເຈົ້າ, ໂອ້ ພວກເຈົ້າຜູ້ໄດ້ມາຮ່ວມຊຸມນຸມນຳກັນ, ຜູ້ເປັນ ກມະຫາປະໂລຫິດແຫ່ງສາດສະໜາຈັກຂອງເຮົາ, ຜູ້ຊຶ່ງ ຂອານາຈັກ ແລະ ອຳນາດໄດ້ຖືກມອບໃຫ້.
2 ເພາະຕາມຄວາມຈິງແລ້ວ ພຣະຜູ້ເປັນເຈົ້າໄດ້ກ່າວດັ່ງນີ້, ເຮົາເຫັນສົມຄວນທີ່ຈະກຳນົດ ກອະທິການ ໃຫ້ແກ່ພວກເຈົ້າ, ຫລື ຈາກພວກເຈົ້າ, ໃຫ້ແກ່ໜ່ວຍຂອງສາດສະໜາຈັກ ໃນສວນອະງຸ່ນສ່ວນນີ້ຂອງພຣະຜູ້ເປັນເຈົ້າ.
3 ແລະ ຕາມຄວາມຈິງແລ້ວ ໃນເລື່ອງນີ້ພວກເຈົ້າໄດ້ເຮັດໄປຢ່າງສະຫລາດ, ເພາະມັນເປັນການຮຽກຮ້ອງຂອງພຣະຜູ້ເປັນເຈົ້າ, ຈາກມືຂອງ ກຜູ້ພິທັກຮັກສາແຕ່ລະຄົນ, ເພື່ອໃຫ້ລາຍງານ ຂເລື່ອງລາວກ່ຽວກັບສິ່ງທີ່ຢູ່ໃນ ຄຄວາມພິທັກຮັກສາຂອງເຂົາ, ທັງໃນການເວລາ ແລະ ໃນຊົ່ວນິລັນດອນ.
4 ເພາະຄົນທີ່ຊື່ສັດ ແລະ ກສະຫລາດໃນການເວລາຖືວ່າມີຄ່າຄວນທີ່ຈະໄດ້ຮັບ ຂຜາສາດເປັນມູນມໍລະດົກ ຊຶ່ງພຣະບິດາຂອງເຮົາໄດ້ຕຽມໄວ້ສຳລັບເຂົາ.
5 ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ, ພວກແອວເດີຂອງສາດສະໜາຈັກໃນ ກສວນອະງຸ່ນສ່ວນນີ້ຂອງເຮົາ ຈະລາຍງານເລື່ອງລາວກ່ຽວກັບສິ່ງທີ່ຢູ່ໃນຄວາມພິທັກຮັກສາຂອງພວກເຂົາຕໍ່ອະທິການ, ຜູ້ທີ່ເຮົາຈະກຳນົດໄວ້ຢູ່ໃນສວນອະງຸ່ນສ່ວນນີ້ຂອງເຮົາ.
6 ສິ່ງເຫລົ່ານີ້ຈະຖືກບັນທຶກໄວ້, ເພື່ອມອບໃຫ້ແກ່ອະທິການໃນຊີໂອນ.
7 ແລະ ໜ້າທີ່ຂອງ ກອະທິການຈະຖືກເຮັດໃຫ້ເປັນທີ່ຮູ້ຈັກໂດຍບັນຍັດ ຊຶ່ງໄດ້ຖືກມອບໃຫ້, ແລະ ໂດຍສຽງຂອງກອງປະຊຸມໃຫຍ່.
8 ແລະ ບັດນີ້, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ຜູ້ຮັບໃຊ້ຂອງເຮົາ ກນິວເອັນ ເຄ ວິດນີ ຄືຜູ້ທີ່ຈະໄດ້ຮັບການກຳນົດ ແລະ ແຕ່ງຕັ້ງສູ່ອຳນາດນີ້. ນີ້ຄືພຣະປະສົງຂອງພຣະຜູ້ເປັນເຈົ້າອົງເປັນພຣະເຈົ້າຂອງພວກເຈົ້າ, ພຣະຜູ້ໄຖ່ຂອງພວກເຈົ້າ. ແມ່ນເປັນດັ່ງນັ້ນ. ອາແມນ.
9 ພຣະຄຳຂອງພຣະຜູ້ເປັນເຈົ້າ, ນອກຈາກກົດທີ່ໄດ້ມອບໃຫ້ແລ້ວ, ຊຶ່ງເຮັດໃຫ້ຮູ້ໜ້າທີ່ຂອງອະທິການຜູ້ໄດ້ຮັບການແຕ່ງຕັ້ງສຳລັບໜ່ວຍຂອງສາດສະໜາຈັກໃນສວນອະງຸ່ນສ່ວນນີ້, ຊຶ່ງຕາມຄວາມຈິງແລ້ວຄື—
10 ເພື່ອຮັກສາ ກຄັງຂອງພຣະຜູ້ເປັນເຈົ້າ; ເພື່ອຮັບເອົາເງິນທຶນຈາກໜ່ວຍຂອງສາດສະໜາຈັກຂອງສວນອະງຸ່ນສ່ວນນີ້;
11 ເພື່ອຮັບເອົາເລື່ອງລາວຂອງແອວເດີດັ່ງທີ່ໄດ້ບັນຊາໄວ້ກ່ອນນັ້ນ; ແລະ ເພື່ອ ກປະຕິບັດສາດສະໜາກິດຕໍ່ຄວາມຕ້ອງການຂອງພວກເຂົາ, ຜູ້ຈະຈ່າຍສຳລັບສິ່ງທີ່ພວກເຂົາໄດ້ຮັບ, ຕາບໃດທີ່ພວກເຂົາມີທີ່ຈະຈ່າຍ;
12 ເພື່ອສິ່ງນີ້ຈະຖືກອຸທິດຖວາຍເພື່ອຄວາມດີຂອງສາດສະໜາຈັກ, ເພື່ອຄົນຍາກຈົນ ແລະ ຄົນຂັດສົນນຳອີກ.
13 ແລະ ຄົນທີ່ບໍ່ ກມີທີ່ຈະຈ່າຍ, ເລື່ອງລາວຈະຖືກບັນທຶກໄວ້ ແລະ ສົ່ງໄປໃຫ້ອະທິການຂອງຊີໂອນ, ຜູ້ຈະຈ່າຍຄ່າໜີ້ສິນນັ້ນຈາກສິ່ງທີ່ພຣະຜູ້ເປັນເຈົ້າຈະໃສ່ໄວ້ໃນມືຂອງເຂົາ.
14 ແລະ ວຽກງານຂອງຄົນຊື່ສັດ ຜູ້ທຳງານໃນເລື່ອງທາງວິນຍານ, ໃນການປະຕິບັດພຣະກິດຕິຄຸນ ແລະ ເລື່ອງຂອງອານາຈັກແກ່ສາດສະໜາຈັກ, ແລະ ແກ່ໂລກ, ຈະຊຳລະໜີ້ສິນໃຫ້ອະທິການໃນຊີໂອນ;
15 ດັ່ງນັ້ນມັນຈຶ່ງອອກມາຈາກສາດສະໜາຈັກ, ເພາະຕາມ ກກົດແລ້ວ ທຸກຄົນທີ່ຂຶ້ນມາຍັງຊີໂອນຕ້ອງວາງທຸກສິ່ງໄວ້ຕໍ່ໜ້າອະທິການໃນຊີໂອນ.
16 ແລະ ບັດນີ້, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ແອວເດີທຸກຄົນໃນສວນອະງຸ່ນສ່ວນນີ້ ຈະຕ້ອງລາຍງານເລື່ອງລາວກ່ຽວກັບສິ່ງທີ່ຢູ່ໃນຄວາມພິທັກຮັກສາຂອງເຂົາຕໍ່ອະທິການໃນສວນອະງຸ່ນສ່ວນນີ້ຂອງເຮົາ—
17 ກໃບຮັບຮອງຈາກຜູ້ພິພາກສາ ຫລື ອະທິການໃນສວນອະງຸ່ນສ່ວນນີ້, ເຖິງອະທິການໃນຊີໂອນ, ຈະເຮັດໃຫ້ທຸກຄົນເປັນທີ່ຍອມຮັບ, ແລະ ຜ່ານຂໍ້ກຳນົດທຸກຂໍ້, ເພື່ອເປັນມູນມໍລະດົກ, ແລະ ເພື່ອຈະໄດ້ຖືກຮັບໄວ້ເປັນ ຂຜູ້ພິທັກຮັກສາທີ່ສະຫລາດ ແລະ ເປັນຄົນງານທີ່ຊື່ສັດ;
18 ຖ້າບໍ່ດັ່ງນັ້ນ ອະທິການຂອງຊີໂອນຈະບໍ່ຍອມຮັບເຂົາ.
19 ແລະ ບັດນີ້, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ໃຫ້ແອວເດີທຸກຄົນຜູ້ຈະລາຍງານເລື່ອງລາວແກ່ອະທິການຂອງສາດສະໜາຈັກໃນສວນອະງຸ່ນສ່ວນນີ້ ໄດ້ຮັບການຮັບຮອງໂດຍສາດສະໜາຈັກ ຫລື ໜ່ວຍຕ່າງໆຂອງສາດສະໜາຈັກ, ໃນບ່ອນທີ່ເຂົາທຳງານ, ເພື່ອວ່າເຂົາຈະເຮັດໃຫ້ຕົນເອງ ແລະ ການລາຍງານຂອງເຂົາ ເປັນທີ່ຍອມຮັບໃນທຸກສິ່ງ.
20 ແລະ ອີກເທື່ອໜຶ່ງ, ໃຫ້ຜູ້ຮັບໃຊ້ຂອງເຮົາ ຜູ້ໄດ້ຖືກກຳນົດໃຫ້ເປັນຜູ້ພິທັກຮັກສາ ກເອກະສານຂອງສາດສະໜາຈັກຂອງເຮົາ ມີສິດໄດ້ຮັບຄວາມຊ່ວຍເຫລືອຈາກອະທິການ ຫລື ອະທິການທັງຫລາຍໃນທຸກສິ່ງທັງປວງ—
21 ເພື່ອວ່າ ກການເປີດເຜີຍຈະໄດ້ຖືກພິມ, ແລະ ອອກໄປຈົນເຖິງທີ່ສຸດຂອງແຜ່ນດິນໂລກ; ເພື່ອວ່າພວກເຂົາຈະໄດ້ຮັບເງິນທຶນ ຊຶ່ງຈະເປັນປະໂຫຍດໃຫ້ແກ່ສາດສະໜາຈັກໃນທຸກສິ່ງທັງປວງ;
22 ເພື່ອວ່າພວກເຂົາຈະໄດ້ເຮັດໃຫ້ຕົນເອງເປັນທີ່ຍອມຮັບໃນທຸກສິ່ງທັງປວງນຳອີກ, ແລະ ຖືກຮັບຮູ້ວ່າເປັນຜູ້ພິທັກຮັກສາທີ່ສະຫລາດ.
23 ແລະ ບັດນີ້, ຈົ່ງເບິ່ງ, ສິ່ງນີ້ຈະເປັນແບບຢ່າງໃຫ້ແກ່ສາຂາຕ່າງໆທີ່ແຜ່ລາມອອກໄປຂອງສາດສະໜາຈັກຂອງເຮົາ, ໃນແຜ່ນດິນໃດກໍຕາມທີ່ມັນຖືກຈັດຕັ້ງຂຶ້ນ. ແລະ ບັດນີ້ ເຮົາຢຸດຕິການກ່າວຂອງເຮົາ. ອາແມນ.
24 ສອງສາມຄຳຕື່ມອີກທີ່ນອກເໜືອໄປຈາກກົດຂອງອານາຈັກ, ກ່ຽວກັບສະມາຊິກຂອງສາດສະໜາຈັກ—ຄົນທີ່ໄດ້ຖືກ ກກຳນົດໂດຍພຣະວິນຍານສັກສິດໃຫ້ຂຶ້ນໄປຍັງຊີໂອນ, ແລະ ຄົນທີ່ໄດ້ຮັບສິດທິພິເສດໃຫ້ຂຶ້ນໄປຍັງຊີໂອນ—
25 ໃຫ້ພວກເຂົາເອົາໃບຮັບຮອງຈາກແອວເດີສາມຄົນຂອງສາດສະໜາຈັກ ຫລື ໃບຮັບຮອງຈາກອະທິການຂຶ້ນໄປໃຫ້ອະທິການ;
26 ຖ້າບໍ່ດັ່ງນັ້ນ ຄົນທີ່ຈະຂຶ້ນໄປຍັງແຜ່ນດິນຂອງຊີໂອນ ຈະບໍ່ຖືກຮັບຮູ້ວ່າເປັນຜູ້ພິທັກຮັກສາທີ່ສະຫລາດ. ສິ່ງນີ້ກໍເປັນແບບຢ່າງຄືກັນ. ອາແມນ.